جاني بطرق الثوب ناسي عباته

[يجيلك يوم]

قصيده جميله ومعبره عن نفسها أعجبتني

وهي للشاعر بندر العتيبي




ساعة ركبنا فوقهنّه مقفيّن***جاني بطرق الثوب ناسي عباته

رد السلام ومدّ لي كفّه الزين***يحوز عني ما بدا من صفاته

الوجه كنّه والنحر والذراعين***لون الحليب اليا انعزل عن رغاته

وجدي لو ان الوجد ماله براهين***ان ما تهيّت للبنادم مناته

وجود راعي هجمة ٍ حاله شين****ردّنه الأشوار دون اشهواته

يبا الربيع ومشغلينه هل الضين***لين ان ذوده شان والوسم فاته

على عشيرن خابره في اول الحين****يمدي مقاسيمه من الله جاته

أمّا رمنّه في قصور وبساتين***وألاّ عليه الوقت دارت رحاته

طرشّت له وارد ثمان وثمانين***سوّاه من سوّاه واحسن سوته

البهبهاني ما اشتغل غير تمرين***اللي حدود المملكه مانعاته

فوقه من العتبان من يقضي الدين***قرم ٍ تسدّك فزعته عن وصاته

اليا كفخ له كنّ حس القزوزين***هدير هرشن في مراح أمّهاته

ملفاه ما ينعاق ربعن مسميّن***فراج ولاّ عند مقحم مباته

رجالهم تلقاه في العسر واللين***ما سال عن فقره ولا عن غناته

ممتاز في الدنيا وممتاز في الدين***وأخير ما عند البنادم صلاته

تحرّ مردود الرساله نهارين***والثالث أخذ العلم منهم وهاته

وان كان ما يدرون عن داعج العين***راحوا محابيس الهوى مع قضاته