هذه القصيدة للشاعر/ عايد بن شباط المشعبي السبيعي في جاره العقيد/ منيف بن زيد المسعودي النفيعي.
اليا نصيت أنصى بعيد الهقاوي=اللي قصيره رافعٍ هامته فوق
سلام يا أبو زيد راع النخاوي=سلامٍ أحلى من لبن شمخ النوق
حرن على الطالات والطيب قاوي=تنشر له البيضاء مع كل مخلوق
لك فزعةٍ من كل همٍ تداوي=اليا اصطفق من عج الأيام صافوق
فزعتك يالحر العديم النداوي=يومٍ غيرك فزعته مالها ذوق
يانادرٍ لا صاع عطب المهاوي=ترف له بيض النواميس والتوق
يجزع ويبتع وإن بتع مايراوي=رجله على مرقا العلا ساقها سوق
يرهي ولا يلحق عليه الرهاوي=حرن على الطالات ماهوب مسبوق
ويوم أمدحك قلبي لمدحك نحاوي=ومدايحن في غيركم مالها سوق
ومن عد فيك الطيب ماهوب غاوي=طيبٍ على الجدان ماهوب ملحوق
لك عزوةٍ فالحرب ماهيب تاوي=سلاتهم من أحمر الدم مسفوق
ألاد النفيعي طيبين العزاوي=تاريخهم في قمة المجد من فوق
أهل الكرم ويزبنون الجلاوي=ودخيلهم يامن من الغدر والبوق
يقولها اللي فالمعاني قصاوي=يختار طيبها على كل طاروق
وختامها عود أزرق وطيب جاوي=يغش الوجيه اللي لها يطرب الشوق
وصلاة ربي عد ماخط راوي=على النبي اللي من النار معتوق