نصائح مجرب

[عبرود نيمس]

السلام عليكم ورحمة الله وبركاته

ارجوا من الأخوه الشعار ان يقيموا قصيدتي هذه من كل النواحي وارغب في نقدكم البناء

ارفعك يا ثوبي عـن اللـي يشنيـك =واربطك فحزامي عن رخوم تشنـاك
لا صينت اطرافـك تبيـض بواقيـك =وان سلمت اطرافك ترا العيب عـداك
لا تلامس الجربان وابعـد لا يعديـك =وان ناشك المقروح امرضك واعـداك
اشمر عن اللي لونهـا فيـه تشكيـك =ما ينقلب حالـك ولا صـرت شكـاك
بعض العـرب وده بشـره يوطيـك =واحذر من اللي ضحكته كان وطـاك
دور على اللي وان حصل شق يرفيك =لا شـاف خملاتـك يلمـك ويرفـاك
ما هو كما اللي بالقفى يفتـري فيـك=مثـل المقـص لسانـه اللـي تقفـاك
لونك يشـادي للبـن فـي غداريـك =ابيض ولا همـك ظلامـك وغـدراك
وان حاول الحساد طمسـة مواريـك =تحت التراب ابقى كما نبتـة الـراك
اغصانها اللي باينـه مـي مساويـك =واليا بحثت العـرق تطلـع بمسـواك
يا ثوبـي المصيـون تكفـا حذاريـك =لا يلطخك طين المراغـه وحـذراك
صنتك بدمي عـن شماتـة عدويـك =بالله لا تقـارب خسيـس تـعـدواك
انت البحر والخـوف يمـة موانيـك =لا يرسي فـي المينـا عـدو تنـواك
اكمامك اللي فضلهـا فـوق اياديـك =تحميك مـن حـر اللواهـب وتاقـاك
صفق الهوأ في اطرافك البيض يآذيـك =ميـر احتمـل جهلـة سفيـه تـوذاك
يا ثوبي اسمع جابتـي يـوم احاكيـك =وافطن لنصح اللـي تهمـه وحاكـاك
نصح الذي شاف الثيـاب المداهيـك =من بعد زينتها بهـا دهـك وانهـاك
من بعد ثوبـي يـا لسانـي اناديـك =جاوب على صوت الفتى يوم نـاداك
لا تبـرم الجابـه وكلمـه تـرديـك =كم من جـواب فـي المهاليـك ارداك
بعض الكـلام يزيـد رفعـة معاليـك =واشكـل كلامـك للشرابـيـك وداك
قول الصواب مـن المراجـل يدنيـك =قول الخطا ابعـدك عنهـا واقصـاك
قول الصحيح وحفـظ ربـي يذريـك =لا تخاف والله من بلى الناس يـدراك
من بعدها يـا عيـن تكثـر بلاويـك =ان ما قصرتي الشوف يا كبر بلـواك
بين الرموش السود بانـت مغازيـك =لا لد طرفك بـان امـرك ومغـزاك
غضي بنظراتك عن امرا مـا يعنيـك =لا تكثريـن اللـد واصـون يبـراك
نظرة حرام تغـز طرفـك وتعميـك =لا عاد شوفك كان ربي هـو اعمـاك
واوصيك يا ساقي واوصي خطاويـك =درب الخطا محفوف مرصوف بأشواك
درب الزلـل جمـر ونـاره تكويـك =ما يطفـي المـا كيتـه كـان كـواك
الله يـا ساقـي يسـهـل مماشـيـك =بدروب خير يا عسى الخير ممشـاك
يـا نيـه!الله مطلـع فـي خوافيـك =ما نعلم اسرارك وربي هـو اخفـاك
دسك مريض القلب مـن دون يبديـك =وسط الضلوع وقال غيرك ولا ابـداك
نية خـزى لا فـاز منهـو يخاويـك =يضحك بوجهك وان تقفـاك عضـاك
تمت وذكـر الله مـن الشـر ينجيـك =ثم الصلاه اللي بهـا تطيـب دنيـاك