والعرب من قل مالـه يكرهونـه

[ابو ضيف الله]

قال من عدى حجا نفنوف عالـي
ضايقٍ صدره وكاثـرةٍ شطونـه
ابدع القيفان من ضيقـات بالـي
والغناء ماهيب تخفانـي لحونـه
هاضني ياهل الوفاء شئٍ طرالـي
وقلت قول وبعلمـه للـي يبونـه
أشهد أن العز في كثـر الحلالـي
والعرب من قل مالـه يكرهونـه
من معه مالٍ تراه يصيـر غالـي
والفقير النـاس لازم يرخصونـه
يرخصه حتى الرفيق اللي موالـي
وأسرتـه لَقـل مالـه يبغضونـه
مايريـده لاعمـام ولا خـوالـي
ويمكن أن عيال أبـوه يقاطعونـه
والله لو هو مثل أبو زيد الهلالـي
مايحسبـونـه ولا يستعبـرونـه
والغني لو كان مايسـوى ريالـي
غاليٍ عنـد العـرب ويقدرونـه
ويمدحونه كل ما جاء له مجالـي
وأن بدى له لازمٍ يقضون شونـه
لو ذليـلٍ يخلعـه زول الظلالـي
ما يكافح لو يدفـل فـي عيونـه
أو بخيل عن مزايا الجود خالـي
ياخـذون بخاطـره ويجاملونـه
وعندهم هرجه كما السمن الزلالي
والفقير اليـا هـرج يستنكرونـه
وكم يعز المال من جـالٍ هيالـي
وكم عزيزٍ معسرٍ كثـرت ديونـه
وكم ردي حيث بيده راس مالـي
جو عكفان الشـوراب يخدمونـه
حدت الحاجة كريميـن السبالـي
يسمعون أمر الـردي وينفذونـه
وغيرت مجرى الدهر سود الليالي
والطلب طبع الخلايق عن يكونـه
واليمين اليوم صارت كالشمالـي
والعوارف مقصدي ما يجهلونـه
كل من كثـرت فلوسـه مايبالـي
}وأن خطب عند الرجال يزوجونـه{
والبني البيض حلـوات الدلالـي
من عجز في المرجلة عافن فنونه
والمراجـل ماتهيّـا للرجـالـي
غير من عقب اجتهـادٍ يبذلونـه
من بغا كسب العلا سهر الليالـي
والكسل يرث لراعيـه المهونـه
صدقونـي يامداغيـش العيالـي
وأتركوا نوم الضحى لاترقدونـه
ودي أرشدكم ولو ما أرشدت حالي
منصحٍ بالنصـح للـي يقبلونـه
والرجاء يالعارفين من الرجالـي
لابـدى منـي قصـورٍ تكملونـه
وأسمحوا لي يالنشاما في مقالـي
والسلام ختـام للـي يسمعونـه
قاله اللـي ذايـقٍ مـرٍ وحالـي
له روابع وأخلفت بقعاء ضنونـه

حمد بن هادي المسردي القحطاني

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة. قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة. اللهم أنصر من نصر الدين وأخذل من خذل الدين