السلام عليكم ورحمة الله وبركاته
قصيده جديده تحكي عن نفسها
اتمنى انها تعجبكم
الا ياهاجسي حياك ماني قايلن بعد ايش=دعيتك من عصر والليل حل وجتني جيوشه
طغى صمت الضلام العتم وانته مشيتك بشويش=تقول انك هنوفن تقصر الخطوه على الكوشه
عسى ماشر يالبطاش ياالي تعشق التبطيش=ورى جيتك هالحزه وانا من عصر لي شوشه
وش الي غيبك عني ترى وضعك يبا تفتيش=من اول لادعيتك جيت لو الروس مدشوشه
اذا قصدك وفاء الوافين صعب وللعرب تنبيش=عليك الله وامانه مايجيك من الحكي نوشه
صحيح ان الشعر يعجز يوفي والكلام يطيش=ولكن السيوف الباطشه ماهي بمبطوشه
حذاري تعتذر دام العذر مايروي العطيّش=ولا يبري قلوبن من صدوف الوقت مخدوشه
لكنك حاول وكافح تراها قفلت بالشيش=وترى ثلثين ليلي من عيون النور مطشوشه
بلاش من القصيد الي يجيب الهم والتشويش=مادام ان العرب تال الليالي جالها غوشه
انا مطري على بالي كلامن حارب التهميش=لو إن الفكره من اصحابي الشعار معروشه
لكني صغتها صادق مشاعر واكره التغشيش=ولا اصدق من بيوتن من ورى الاضلاع منبوشه
يقولون الفخر بين الرجال اهل الفعول يعيش=وانا اقول الرجال بدون فخر تعيش مخروشه
صحيح ان المهايط مايفيد ولايوكل عيش=ولكن عيب تبقى امجادنا فالصدر مخشوشه
ابا افخر والفخر نعمه وانا ماعشت للتطنيش=خلقني ربي بعزه امد الطيب واحوشه
ابا افخر في بلادن يمها كل العيون تشيش=عيون الي ترك سجادته من صبح مفروشه
بلادن لجلها ناقف وناطا من يبا التخييش=ولن مست دمانا فوقها بالعز مرشوشه
مادام اني سعودي ليش ما افخر في بلادي ليش=وانا من شعب ليثن ما ارمشت بالذله رموشه
سعودي من ديار الصاملين اهل الرمك والجيش=سلاطين الرجال الي رقوا للمجد وعروشه
سعودي والسعودي طير حرٍ ماسقطله ريش=فعوله في جبين المجد والتاريخ منقوشه
لنا هيبة ملوك الارض مانرضى هوان العيش=ولاعشنا على الخيبه ولاضعنا مع الطوشه
لنا بين العرب فعلن يركد من براسه طيش=ليا جبنا صوارمنا وقمنا في نحى الهوشه
تربينا على دين الإله وسنة ابن قريش=واخذنا الطيب غصبا يوم بعض الناس مغشوشه
اقوله والرجال مقدره في كل دار وجيش=ولايهظم حقوق الناس غير اللاش وطروشه
اقوله واحمي القاله واركد من براسه طيش= مادام اني سعودي من ديار المجد وعروشه
شعر... ابراهيم الزراقي
آخر تعديل ابراهيم الزراقي يوم 26-Jul-2009 في 01:37 AM.
« آخـــر الـــمـــشـــاركــــات »
26-Jul-2009, 01:32 AM
طغى صمت الضلام العتم وانته مشيتك بشويش؟؟
العرض العادي
