ياهيه ياللي كل همك حياتك قم والتفت للآخرة ويش سويت

[خالد بن متروك]

ياهيه ياللي كل همك حياتك
قم والتفت للآخرة ويش سويت
وراجع حساباتك بلحظة سكاتك
وشوف إش خذيت من الليالي وخليت
أغنم حياتك قبل لحظة مماتك
وأرجع لربك كل ما أصبحت وأمسيت
لاتظن طيبك يشفع لسيئاتك
الطيب بالدنيا هوالعز والصيت
وبالآخرة ربي يحاسبك ذاتك
ويحاسبك عن كل ذنب به أخطيت
خل التواضع والعقل من صفاتك
وأستغفر الله وأعترف كان زليت
وخل التأني دايماً من سماتك
والصبر مفتاح الفرج كانك أزريت
وإن كان به كلمة من الغير جاتك
لاتعتمدها دون بحث وتثبيت
وأعراض غيرك عدها من خواتك
وأحسب حساب لخطوتك لاتخطيت
وأخشع لربك دايماً في صلاتك
وأوصيك بالجنة ليا من تمنيت
والصدق زين إن كان تبغى نجاتك
وأحذر يقال إنك بيوم ترديت
وخلك قنوع دايماً بإمنياتك
وأنص الرجال الطيبة لاتعزويت
وبالوالدين أحسن وتلقى جزاتك
هذي وصية ربنا حافظ البيت