 |
|
|
اختيار تصميم الجوال
 |
 |
 |
|
|||||||
 |
 |
 |
 « آخـــر الـــمـــشـــاركــــات » |
 |
| أدوات الموضوع | انواع عرض الموضوع |
|
|
|
|
26-Mar-2009, 01:39 PM
|
رقم المشاركة : 1 | |||||||||
|
مكتبة الشاعر: وصل بن مشهور العطياني المقاطي ((صوتيه &وفديو& كتابه))
السلام عليكم ورحمة الله وبركاته أعزائي أعضاء منتدي الهيلا يسرني ان اضع بين يديكم مااستطعت ان اجمعه من قصايد و محاورة الشاعر العلم وصل بن مشهور العطياني المقاطي  ونشاء الله تنال علي رضاكم ((محاورته الصوتيه )) وصل العطياني... فيصل الرياحي وصل العطياني حمدان العصيمي - راشد السحيمي وفلاح صياف وصل العطياني عبدالعزيز العازمي ... عبدالله القثامي وسلطان المنصوري وصل العطياني .... صقر سليم وصل العطياني.... علي البقيلي وصل العطياني حبيب العازمي ... وعلي البقيلي وصقر سليم وصل العطياني... عوض الله ابو مشعاب وصل العطياني سلطان الجلاوي ... بخيت السناني وصقر سليم وصل العطياني .... ومصلح بن عياد الحارثي وصل العطياني .... وفلاح القرقاح وصل العطياني ... وعبد العزيز العازمي ((محاورته فديو )) وصل العطياني... وحبيب العازمي وحمدان العصيمي وصل العطياني... راشد السحيمي وفلاح بن صياف ووصل العطياني... صقر سليم ((قصائد النظم الصوتيه )) اسم العتيبي فخر حتى فـ"الإثبات وهذا قصيدته في الشيخ / بندر بن نايف بن حميد ((امير عتيبه )) وهذا قصيدته في حفل بن عتقان http://m7ml.com//download.php?filename=6222819fd7. amr المعذاره لم اجد رابط الحفط له ((قصايد النظم الكتابيه)) (الطـِّيب مرضان والرُّفقة في غيبوبة) ملابس العيـد يـوم العيـد مطلوبـة غترة وثوبٍ جديد وبشـت وعقالـي فالمشهد اللي يروحون العرب صوبه تسمع لهم مع صلاة الصبح ولوالـي كلٍ تلبّس وجـاك يمسّـس جنوبـه مشتـال سبحـة ونظـارة وجوالـي ما غير موضات والموضات مرغوبة والاّ الحقايق تراها عكس الأشكالـي لو كلّ واحـد تعابيـره علـى ثوبـه تشوف لك شيء ما يخطر على البالي كمْ ناس تلبس ثياب العيـد مقلوبـة تعبير عن ما نعيشه وقتنـا الحالـي ما عاد للعيـد فرحـة عندنـا نوبـة ما عاد له فرحة الاّ عنـد الأطفالـي الناس صارت تجي للعيـد مغصوبـة ولا يعايدك غيـر الصاحـب الغالـي عايدك ثم حـكّ عرقوبـه بعرقوبـه سلام وإلى اللقـا فالمشهـد التالـي صرنا ما نعرف بعَضْنا يالله التوبـة ما أعرف ولد عمّي الاّ من ولد خالي ورفيقي اللي يجينـي نافـخ ذروبـه آخذ سنة كاملة ما سال عـن حالـي من حقّه أعايـده وأعطيـه ماجوبـه ومن حقّي أوادعه وأنسـاه طوّالـي والله لـولا صـلاة العيـد مكتوبـة لتصير من بين ربعك كنّـك الجالـي ليش المحبّة من القاموس مشطوبـة ليش التباغض وليش القيل والقالـي الطِّيب مرضان والرُّفقة في غيبوبـة ما خلّت أجيال أبويه شـيّ لأجيالـي وإن صار جيلي هذا ممشاه وأسلوبه لا والله العلم كيـف أوصِّـي عيالـي العاقل الفاهم اللـي يعـرف دروبـه يشوف ما شفت ويصادق على أقوالي واللي يحسْب إنّ ثوبه يستر عيوبـه يقـول عيـدك مبـارك ويتحلوالـي لكـنّ عيديّتـه ماهـي بمحسـوبـة عيديّة اللي ضميـره بالـرّدى كالـي اللي يعيّـد برفقـة شبـه مسلوبـة أحسن يعيّد علـى هنـدي وبنقالـي واللّي يعيّد بدون يشـوف محبوبـه كنّه معيّـد لحالـه فالخـلا الخالـي (مفروض يعطي ثوبه الحرمة ويلبس ثوبها.!!) العمر يفنـى والحيـاة أحـلام والدنيـا متـاع يا كـمّ نفـسٍ روّحـت مـا حقّقـت مطلوبهـا يا منخدع في ضحكة الدنيا ترى الضحكة خـداع لا تأمن الدنيا ولو تضحـك لـك مْـع جنوبهـا إن ما تغانمت المراجل قبـل ساعـات الـوداع بَعَد وفاتك ماهي بصوبـك ولا انـت بصوبهـا والمرجلة ماهيـب سلعـة تنشـرى والاّ تبـاع كم ناسٍ يقومون ويطيحـون مـا فرْحـوا بهـا اللي مولّع بالضياع يـروح لـدروب الضيـاع واللـي مولّـع بالمراجـل مـا يغـرّ دروبهـا الطّيب بيِّن ومتعيِّـن مـا علـى وجهـه قنـاع لكن بعض النـاس عميـا والجَهَـل عذروبهـا والغيب ما يُعلم لكـنّ العقـل سِيـد الإختـراع ليا اشتغل عقلك عرفت الناس وش ف"قلوبهـا" وإن كان ما انته مستفيد من الدّماغ الاّ الصّداع ما غير حـظ الصّيدليّـة مـا تبـور حبوبهـا لا صرت ما تتعب على ( والنِّعم ) قدر المستطاع صدّت ولفّت لك ظهَرهـا واعْطَتِـك عرقوبهـا وليا تملّكْت الكـرم والحكمـة وطـول الـذراع لا تشغلك نفسـك تـراك اعطيتهـا ماجوبهـا والواحد اللي لا كريـم ولا حكيـم ولا شجـاع مفروض يعطي ثوبه الحرمـة ويلبـس ثوبهـا (لا رِحم أبو ساعةٍ قابلتني فيها) الطّيب مثل الطّويل النايـف العالـي قمّة علـى ضلـع مـا كـلٍ يعدّيهـا يرهي بها الأوّل ولا يرهـي التالـي ويغرّها اللي ما يسمع غير طاريهـا والنّاس في هالحياة ألـوان وأشكالـي ما يعرف الناس غير اللـي يخاويهـا ناسٍ على مـا تمنّـى دِرْع وظلالـي وناسٍ تجيك المشاكـل مـن تواليهـا النّار لو من قربهـا يسْلَـم الصّالـي ما قالوا النّار تحْرِق رِجـل واطيهـا والحنضلة لو ّ تسقى السكّـر الحالـي وتُغْسَل من الورد ما ربّـي محلّيهـا وما كلّ صاحب يجي في القلب طوّالي يا كمّ ناسٍ ما نحفظ غيـر أساميهـا نعْرِف تواصيف قوم القيـل والقالـي وسـاعٍ حلوقهـا ووسـاع أذانيـهـا إن جابوا علوم نـاسٍ مالهـم والـي ودّوهم علومنـا عـن بكـرة أبيهـا إن كان ودّك تصير الصاحب الغالـي خلّك ورى الهقوة اللي فيـك هاقيهـا والله لأنصفك من حالي ومـن مالـي مانيب من طقّـة أُخذْهـا وعطنيهـا إعرف ترى رفقة الطّيب هوى بالـي يبيعهـا الـلاش والرّجـال يشريهـا وإن كان صحبتك معطِيةٍ خلاً خالـي صحبة رخا ما تبيّض وجه راعيهـا واللّه عليّ الحرام إنـك مـا تبرالـي لا رِحْم أبـو ساعـةٍ قابلْتنـي فيهـا من قلب جوّالك إمسح رقـم جوّالـي ومن قلبك إمسح نواياً كنـت ناويهـا عرفتك أو ما عرفتك ما اختلف حالي نفسي لا يمكن تغيّـر عـن مباديهـا مـا فالـي بفالـك ولا فالـك بفالـي تلقى من أشكالـك أشكـالٍ تماشيهـا وأدعي لكم بالصّلاح وحُسْن الأعمالي مانيب هـادي عـرب مالله بهاديهـا (رحنا على أفواه المهبـّـل مساويك ..!!) خوّة عزيز الأصل تبقى كما الشيك حتى لو أنه عـن ديـارك تنحّـى وخوّة خبيثين الطبوع الصعاليـك أقْصر من مفلّى الغنم فالمضحّـى واللي على شأن المصالح يخاويك ليا انتهى منها ؛ بصحبتْك ضحّـى واللي يبيعـك لا تحـرّاه يشريـك والمزن لن جات العواصيف صحّى وياللي ابليس مفشّخٍ بيـن أذانيـك قلبك عليه ستـار مـا ينتصحّـى بالهرج تقفانـي وتنفـخ علابيـك هذي رجولة نعنبوا ذا الملحّـى ؟ أنا ليا منّي بغيـت الحكـي فيـك هرجت باللي فيك وأذنـك توحّـى ألقاك قـدام الرياجيـل وأعطيـك كلمـة بسبّتْهـا نسمْـك يتفـحّـى رحنا على افواه المهبّل مساويـك وحلوقهم من وسعها مـا تسحّـى (أقوى من البيرة..!!) العام قلبي معذّبنـي يبـى الدّيـرة واليوم ما يعشق الديـرة ولا همّـه قلبي ما غير أشغله عقلي بتفكيـره وأنا ضحيّة ثنيـنٍ مـا لهـم ذمـة خلوني أقعد وراحـوا يالله الخيـرة مع بنت شيخٍ يصرّ العلم في كمـه بنتٍ صغيرة وعندي ما هي صغيرة أشوفها عندي أروع بنت في الأمة لو شافها اللي مايعرف للهوى سيرة يلزم شعر رأسه ويخطيـه ويخمّـه من زينها خلّت العقّال فـي حيـرة أطيب ولد عمّ يحْسدها ولـد عمـه الزين ما يستطيع العقـل تصويـره بس الأكيد إنّها ترقص على القمّـة أخذ عليها القمـر لفـة وتدويـرة قالت وش المشكلة قال أنتي مهمـة والشمس قدّام تغرب جاتها مغيـرة وفلّت شعرها الطويل وقامت تلمّـه والورد الأحمر بهيج اللون ما غيره من حينما شمّته والشمـة الشمـة راح يتثنى على بعضه من الغيـرة وعلى شفاها تكسّر وانتثـر دمـه وترياقها للمزاج أقوى من البيـرة رشفة منه تِنْسِي الواحد حليب أمـه والباقي من الوصايف تمّ تشفيـره لو أتمادى شويّـة جيـت بمطمـة الحبّ أبا أموت وأنا أدفع فواتيـره ماهو برايح وباقي شي في الذمـة (مـيّـت دماغيـاً) غرقت في الحب من رأسي إلى ساسي وما زلت فـي بحـره الغـدّار حاليّـاً الظاهر إنّي غشيم وما اعرف قياسـي حتى تجرّعت كـأس المـوت فعليـاًّ وأصبحت منحاس والتفكير منحاسـي والخدّ يروى مـن العبـرات يوميـاًّ إن ناموا الناس رحت وجبت كراسـي وترجمت مشاعر الأشـواق شعريـاًّ أطلق عنان القصيـد ودقّ هوجاسـي هذي علومـي علـى هالحـال ليليـاًّ من غيبتك يالغلا يا عقـد الألماسـي لا والله أغلى مـن الألمـاس دوليـاًّ راحت علومي بَعَدك أخماس وأسداسي ما غير أترجم لـك أشواقـي غيابيـاًّ وسوالفي لوّ في موضـوعٍ سياسـي أجيـب سيرتـك فيهـا لا شعوريـاًّ القُرب نعمة لا صار القلب حسّاسـي والبعد يثّـر علـى العشّـاق سلبيـاًّ وإن طوّل البعد أبا آكلها على رأسـي هذي هـي نهايـة العشّـاق حرفيـاًّ لو ما تشوفك عيوني يا بعـد ناسـي والله لتلقيـنّـي مـيّـت دمـاغـيـاًّ بس إجبري خاطري قبل ألفظ أنفاسي وأروح وأفـارق الدنـيـا نهائـيـاً رسالتي وصلتك من صادق إحساسـي وأنا غريقٍ في بحـر الحـبّ حاليـاّ (شوفوا لنا حاجة تغيّب بالعقل غير السكار) لا والله الاّ راحت بقلبـي جهـار مـن النهـار وأنـا إذا واحـد سألنـي قلـت تكـرم عينهـا ماهو ما غيـر القلـب لا والله تفداهـا العَمَـار الدرّة اللـي مـا خلـق زيـنٍ يشابـه زينهـا إن جيت أوصّفها يصيب الشّعر وقفة واحتيـار لو قلت ما جاء مثلها في الكون أخاف أهينهـا شمس الضحى تغار منها والقمـر منهـا يغـار والأرض تقلـب ورد عنّابـي تحـت رجلينهـا حبيتها حـبّ الغريـب اللـي تشـوّق للديـار يذكر دياره ثـمّ سالـت دمعتـه مـن حينهـا حبيتهـا لـو أدري إن الحـبّ للعاشـق دمـار ذوقـي وتفكيـري وعقلـي كلّهـم هاوينـهـا لو قالت اليسرى يمين وقالـت اليمنـى يسـار أقـول كيفـك يـا حياتـي زيّ مـا تبغينهـا من حبّها جت في خلايا المخّ يعنـي باختصـار أشوفهـا حتـى إذا صلّيـت ,, ينصـر دينهـا وإذا لبست الثـوب أصـكّ زرار وأخلّـي زرار وألبس شماغي وأنشد أصحابي شماغي وينهـا صبرت وانّ الصبر نار ؛ إشتقت وإن الشوق نار حالت سلوم البدو من بيـن الوصـال وبينهـا عشرين عام من الوصال ولا نهاريـن إنتظـار الأولـة يـا زينهـا و الثانيـة يـا شينـهـا البعد عن من تعشقه موتٍ حمر والمـوت حـار الله يوم أذكر دمـوووع الشـوق مـع خدّينهـا من دونها مـا كنّـي الاّ عايـشٍ فـي قندهـار روحي مهدّدها الخطر ف " يسارهـا " ويمينهـا أحيان أقول آآآبو حياتـي مالـي الاّ الإنتحـار واحيان أقـول العافيـة والعافيـة يـا زينهـا شوفوا لنا حاجة تغيّب بالعقـل غيـر السّكـار ودّي يغيَّب بي ولا اصحى غيـر بيـن يدينهـا ((محاورات كتابيه )) وصل العطياني ... خالد الحصين الحصين: نيابه عن مفرح .. وبندر .. وابن عوجان هلا مرحبا من قلبي وعظمـة السانـي انا لي ثلاث سنين اسولف مـع العتبـان سوالف بوصّلهـا .. لوصـل العطيانـي! وصل : من الهاجس اللي من صخر ينحت القيفان يدوم البقا بالربع واحد ورى الثاني عسا خير سولف بسّ خلّك فصيح لسان ولن كان عندك علم معروف عنواني الحصين: يقولـون هـذي شجـرةٍ .. كلهـا رمّـان وانا اقول غصنٍ يابـس وعـرق رويانـي من الطايف اليا بقيق .. تصهل صهيل حصان وراسك تقـادح فيـه .. شعلـه ودخانـي! وصل : ما كنــّك تعاين فالثمر ميـّل الأغصان ؟ وظلٍ ظليل يدخـّلك جوّ روحـاني أنا أمشي على كيفي مخاويني الرحمن أسيـّر بحفظ الله ما معي قحطاني الحصين : تقوله .. لكن تبقى النظافه من الايمان تنظّف قبـل لا تنهشـك روس نيبانـي اعرفك كريم وشهم ومشـرّع البيبـان لكن جاي تستذيب على الذيب سرحاني! وصل : يا شين التـّعب فالبني كانه بلا سيسان يضيـّع تعب راعيه ويروح مجـاني على الهون على الهون يا ذيب يا سرحان ذبحـتك غدا وانته تفكـّر تعشــّاني ؟ الحصين : انا ما جبرتك .. تطلع الـدر والمرجـان تعال استرح .. مابيك تتعب على شانـي بطشنا بكم .. لكن ما كـن شـيٍ كـان وهالحين راسك راس .. وبعيرك عماني! وصل: انا احسبك تحمل للتعب يا صبي قحطان ولكن ابا أريـّح هجوسي ووجداني هذيك الليالي يوم انا وانت والشيطان تطيع الامر ماني بخابرك تعصاني الحصين : ما معنا عصا موسى ولا خاتم سليمان لكن ابتسم .. يا بعد حيـي وحيّانـي ليا عوّدت للهوش في ماضي الازمان يسولف لك التاريخ عن فعل جدانـي! وصل : ليا صار ماهي معك لا تنزل الميدان انا معي سيفٍ يقطع الروس من داني بسبـّت ذيابٍ فعلها يخلي المرحان زبنت الكويت تسابق الريح عجلاني الحصين : عطيناك وجه .. ونبت لك مخلب وجنحان ولا باقي الا اعطيك من ريش جنحانـي ابشرك عن ربعك تداحم .. ورا خيطـان وعانك في جده تصطفق كنك جيزانـي! وصل: ما يحتاج , انا معطيني الله وجه إنسان لو اقبل وجيه الفقر ظلّيت فقراني علومك غدت مثل الكتابة على الجدران صراحة تذكـّرني حرَكات ورعاني وصل العطياني ... وحمد الشيباني وصل العطياني يا أهل الحجاز اللي مبانيكم على روس الحيود يالله عساكـم سالميـن وغانميـن وطيبيـن حصلت يوم أمركم في رحلتي هرش وقعـود الهرش طايع والقعود مجودن راسـه اثنيـن وصل العطياني في نجد والاّ فالحجاز , الحكم حكم ابن سعود الله يسلّمهـم ويجعلهـم ذخـر للمسلمـيـن حصّلت لك هرش وقعودٍ ما تقيّدهـا القيـود والاّ النياق تروح وتعـوّد تقـرْوِع بالحنيـن حمد الشيباني حنا يكفينا هوى نجد العذي مع كـل نـود اللي حميناها بحد السيف والرمح السنيـن أنتم على شاط البحر والصادرات مع الورد وحنا ليا جينا لكم نقلط على سمن وسميـن وصل العطياني خابر يكفّيكم هوى نجد العذيّة يالنجـود أهمّ حاجة فالحياة نشوفكـم مستانسيـن ياللي على سطح النفود ولا تعدّون النفود ليا بغيناكم نجيكم كلّ وقت وكـلّ حيـن حمد الشيباني الله وأكبر لو يلوح البرق وتحن الرعـود ياوصل ابن مشهور في يوم يروع الغافلين حياكم الله فالعرين اللي ما فيه الا الأسود ليا لفيتوا من ديار(ن) طلعها خوخه وتين وصل العطياني صدوركم فيها السعة ودميّكم فيها البـرود حنّ الرعد والاّ ما حنّ ؛ الباردين الباردين حنا ليا جينا نعرف الدرب ونعرف العدود ناصل ونرجع بالسلامة وش ندوّر فالعرين وصل العطياني... وفواز العزيزي فواز العزيزي هلا يا مرحبا ترحيبة (ن)تسبق سلام الضيف = وضيف الله بحكم الله وفي حكمـة معازيبـه أبومشعاب رمز الشعر واسمه زادنا تشريف = حقيقه قالها شاعر مطير و شاعـر عتيبـه وصل العطياني يدوم إلك البقا من هاجسٍ يبتع سوات السيف = ولا يُستغرب إنّه يسبـق التسليـم ترحيبـة أبو مشعاب شاعر والمعرّف ما يبا تعريف = نعرف الطّيّب اللي فالمواقف يشهره طيبـه فواز العزيزي نبي نلعب سوا والشعر دله من دلال الكيف = تهيضني لحـون الشعـر يومنـا نغنيبـه يقولون الضحيه دمها بين البحر و السيف = وهذا حلم مدري علم بين الشك والريبـه فواز العزيزي نبي نلعب سوا والشعر دله من دلال الكيف = تهيضني لحـون الشعـر يومنـا نغنيبـه يقولون الضحيه دمها بين البحر و السيف = وهذا حلم مدري علم بين الشك والريبـه وصل العطياني ألا يالشاعر الحرّيف جاك الشاعر الحرّيف = ليا منّه رمى الأهداف ما تخطي مضاريبـه غدت من رأس مفلاها وراعيها غدا ما شيف = على كفّ القدر ما ندري الله وش يسوي به فواز العزيزي الايالشاعر الحريف مال السالفـه تصريـف = لكن اللي طلـب قومـوا ولبولـه مطاليبـه تقص من الحقايق وانتبه للمكـر والتزييـف = قبل تجرح بجرح(ن) فالحشا تصبح و تمسيبه وصل العطياني تصنّف يالعزيزي والعلوم أكبر من التّصنيف = ترى رأيك هذا قرّبْك علمٍ ما انت داري بـه تبا تكثر علوم الناس والدعوى سحابة صيف = ونعطيك الخبر مضمون تسرح به وتضوي به فواز العزيزي لو الله كبرت الدعوى ولامرت مرور الطيف = ولاينفعك من يضحك معك بسنـون تركيبـه الاياوصل حبل الوصل بين الخوف والتحريف = لكن خلك سياسي لا تضوي فوقـك مصيبـه وصل العطياني الأخضر ما عليه خلاف لن حضْروا عيال عطيف = عيـال عطيـف معروفيـن فالميـدان لعّيـبـة أبا أجوّد حزامي وأظهر العسكر مـن التوقيـف = ومـن لا يحمـي الميقـاف يـا فـواز والخيبـة وصل العطياني ... وسلطان المنصوري سلطان المنصوري سلامي وراعي الحفل مشكور مشكور دعانا على حشمة وطيـب وكرامـة يا وصل العطياني قبل يبدي النـور تبانا نجـي فـي نجـد ولا تهامـة وصل العطياني هلا والله بشعارنا الـي لهـم دور بعد جابهم ربي بكـف السلامـة صحيبك معه محزم وبندق وناظور يصيب الهدف قدام يفرد حزامـه سلطان المنصوري ما ينزل بسوق الاسهم يكود هامور ترا بحر الاسهم فوق تسعين قامة لو ان المراجل تنفع العمي والعور تمرجل شعيل الي تراقل عضامـه وصل العطياني نعرف البحر مايقطعه كل بابور كلامي هذا حطه براسك عمامـة بغوا يصنعون العش شهادة الزور لكن الهوا روح بعـش الحمامـة سلطان المنصوري على الدين ماعاشرت في شهر عاشور وبكرة على المخطـي تقـوم القيامـة ضعيف البخت لو شال سبحة وباكور مصيره يوقـع فـوق ريـع الندامـة وصل العطياني ابوزيد شاف الشيخ غاضب ومقهور وسوا براسه مثـل راس النعامـة ولو يعطي المعذار ماهو بمعـذور اكلها وصارت له على الخد شامـة سلطان المنصوري فرحنا بعد ما طاح ناصر ومنصور تحسب المواقف ضحكةٍ وابتسامـة وفي الختام تقبلو تحياتي اخوكم : رايد بن هلال الهديبي |
|||||||||
|
|
|
|
|
|
|
|
|
|
26-Mar-2009, 06:08 PM
|
رقم المشاركة : 4 | |||||
|
بيض الله وجهك
ووصل العطياني شاعر خلوق ومتواضع |
|||||
|
|
|
|
|
|
|
|
|
|
|
26-Mar-2009, 08:01 PM
|
رقم المشاركة : 5 | |||||
|
لاهنت يا ذيبان مكتبه متكامله وميه الميه لشاعر غني عن التعريف |
|||||
|
|
|
|
|
|
|
|
|
|
|
26-Mar-2009, 10:32 PM
|
رقم المشاركة : 6 | |||||||
|
يستاهل هذا الجهد الكبير شاعرنا المبدع / وصل العطيّاني . الف شكر يارايد .. تحيتي ...
|
|||||||
|
|
|
|
|
|
|
|
|
|
|
26-Mar-2009, 11:19 PM
|
رقم المشاركة : 7 | |||||
|
لاهنتو علي المرور وابو مشهور يستاهل اكثر |
|||||
|
|
|
|
|
|
|
|
|
|
|
26-Mar-2009, 11:35 PM
|
رقم المشاركة : 8 | |||||
|
رايد الهديبي
اشهد بالله انك ما قصرت تحياتي |
|||||
|
|
|
|
|
|
|
|
|
|
|
26-Mar-2009, 11:37 PM
|
رقم المشاركة : 9 | |||||||
|
مجهوود طيب ونقل موفق..
تشكر عليه يارايد .. الله يعطيك العافيه ...
|
|||||||
|
|
|
|
|
|
|
| العلامات المرجعية |
| يتصفح الموضوع حالياً : 1 (0 عضو و 1 ضيف) | |
|
|
 |
 |
العرض العادي
