وش إسمها ؟؟

[عبدالله بن طلال]

إهداء متواضع لعشاق القصائد الغزليه

صدفه بلا ميعاد مع كامل الزين = راعي الحلا اللي ماخلق له حليّا
قلت السلام ورد بمسلهم العين = ياوجد عيني من عيونه عليّا
انا اشهد انه صاب قلبي بسهمين = لا ميت(ن) منهن ولانيب حيّا
طلبت منه العطف واللطف واللين = واعطيه ما املك في حياتي وعيّا
اثر الترجي مهزله والجفا شين = ماكنت اظن يصير بي هالسويّا
ذليت له نفسي مذلة مسيكين = وطمعت فيه ومطمعي ماتهيّا
ياليت من يدري بعنوانها وين؟؟ = والا اسمها؟؟والا عربها من أيّا
ان شفتها والله لسوق الملايين = يفداه مالي بس اشوفه هنيّا
وجدي لو ان الوجد ماله براهين = ولو المناوي ماتجي بالحكيّا
وجود من حده نصيبه على دين = واستدخل الخمسين بحساب ميّا
نار(ن) بصدري تصطلي من هكالحين = لا قال ابيك ولا رفضني جفيّا
عليه قلبي نابت(ن) له جناحين = ويمه يتيه وفيه يزداد غيّا
بين الضلوع اليا رجف قالن آمين = تسعين رجفه كان ماهي شويا
اخفهن قوّ انفجار الثلاثين = اللي صلاة الظهر رج العليا
وحرام انا ما أنساه والاّ طرى لين = يطوى علي بداخل القبر طيا