من قصص سعود المطرفي من اهل الشويهات

[عزيزقوم]

كان الفارس / سعود بن ذيب المطرفي من أشجع الرجال ويقال :

ان صوته يرعب الخيل عندما يزعق عليها يرعجها فتزعج عيالها .

ومن الروايات التي تنسب لسعود بن ذيب كان عند أحد القبائل ولا يعرفون عنه شي وأغارت

على إبل القوم غاره فلحقوا ولا حالفهم الحظ باسترجاع الابل فذهب سعود بن ذيب المطرفي بمفرده

ورد الابل ورمى بعض الفرسان واخذ خيلهم فاصبح معروف وصار له قدر وصيت بعد ذلك .

ومن قصص سعود بن ذيب :

يقال انه نزل على قبيلة بني خالد أثناء حكم الشيخ ابن عريعر وكان يتوق إلى القهوة والتتن

وحيث لم يجدهن فسمع صوت نجر آخر الليل وتوجه ناحية الصوت ودخل البيت الذي يدق به النجر

وعندما دخل وجد نفسه في منزل الشيخ ابن عريعر وهو عند زوجته فرحب به الشيخ ولم يتحشد منه

لكونه غريب ومشتاق إلى القهوة والتتن فأمر العبد ان يقهويه ويعطيه كيس من التتن وبعد ان تقهوى

وعمر اسبيل سأل العبد فاخبره ان هذا الشيخ ابن عريعر فشعر بحرج شديد بسبب دخوله على الشيخ

وهو في غير مجلس الرجال وقال هذه القصيده يوضح قصته ويعّرف بنفسه بحيث ان ابن عريعر يسمع

عنه ولا يعرفه يقول سعود :

ياشيخ سامح زلتي طلعت سهيـل = النجر جض وصوب حسه مشينـا
ياللي عيون اعداك ما تمرح الليل = من جود جودك جاد عبدك علينـا
حميت بيض الخرش بأم المحاحيل = بيض النحور وميتمـات الجنينـا
من الشاوري والبن حنا مقاليـل = مع الهوا يا شيخ ريحـه غشينـا
من عقب مز العظم ورقط الفناجيل = عطيتنـا مطلوبـنـا وأنثنيـنـا
أقفيت عن هرج القلوب المغاليـل = أمـا بلونـا بشـر ولا ابتليـنـا
وذكرت أنا ربعي فهود الرجاجيـل= هم انتحوا عنـي وحنـا انتحينـا
ربعي هل العشوى إلى جدع الشيل = هـذا نجـي يمـه وهـذا يجينـا
قريبهم يحشم عن النقص والميل = والجار عده واحـدٍ مـن حدينـا
وهرج بليا شهود مالـه دواليـل = والى نخانا الجـار دونـه ثنينـا
جانا النفيشي ناير يزعج الويـل = باقه بيـوق فـوق بوقـه يبينـا
واشهودها شمر قروم المشاكيـل = هـل اللحيسـة منـوة الجايعينـا
وصاح الصياح بنابي يا اهل الخيل= غز اللوا من فوق نابـي البطينـا
ثم اعتلوا قحص المهار المشاويل = وبأيمانهم حدب النمش والعرينـا
وعدوانهم عادوا بياس وغرابيـل = وخيـل تولـت خيلهـم مدبرينـا
نطحهم الصابور عوق المقابيـل = من لابة بالكون حبـس الكمينـا
ويوم انتحوا بمغذيـات المخاليـل = هنف الخشوم ودقهـن يرتجينـا
طلبت انا منشي المزون الهماليل = يـا فاتـح التوبـات للتايبيـنـا
والله نصرني بالنمش شلتهم شيل = لعيون زرفـات البكـار انتخينـا
عندي شهود ولا بها قول ما قيل = أرسان الخيل اللي لأهلها رمينـا

آخر تعديل عزيزقوم يوم 13-Nov-2008 في 09:09 AM.