محاورة ابن شايق وصياف الحربي.....

[.العبيدي.]

أبن شايق :

أنته كليت اللقمه اللي بان لك مفعولها *** مير أنتبه للقمه المره ولاهي حاليه

صياف :

لا والله الا جاتنا بقعا تدق حجولها *** لآكن مدري من يجيب السيف والخياليه

لديت عينك يمها والناس ما لدو لها *** واللي ما يعرف موقع القصيا يجيب موآليه

أبن شايق :

لا والله ألا جات بقعا يقطع الله زولها *** أبشر بسيف ذياب لين تروح نفسك ساليه

أنته بعقلك يالسحيمي والعرب بعقولها *** وبغض السوالف تجرح العقال و الجهاليه

صياف :

أخذ عشر لفات بالكعبه وخلك حولها *** لا تكبر الدله عليك وتكسر الفنجاليه

هرج الشرف ما يجرح أديار الشرف ونزولها *** ماني من اللي يارد الجمه بغير حباليه

أبن شايق :

أن كانها متعقده عندك بجيب حلولها *** أنا تراي أعرف خروج البيت والمدخاليه

ماني براعي الجره اللي ردها في فولها *** وأنته تعرف المرجله وتجوز الرجاليه

صياف :

اللي يعقد أسرارها يمسك على محلولها *** وتجيه روس وآطيه وتجيه روس عاليه

الناس شافوا جمرة حمرا ولا راحو لها *** واللي يخاف من العجم عساه لسلاليه

أبن شايق :

بنت الهوى باعتك يالحربي وبعت حجولها *** تبغى تشيل طويق مير طويق ما ينشاليه

أن كان هذي معرفتكم ما نبي محصولها *** أفلح قبل ياتيك من كفي عصى وعقاليه

صياف :

أنا مجود راسها والناس تحت رجولها *** ما يعترض فالحلق غير دلالة الدلاليه

أن كان جات مهوله قحطان تمسك هولها *** الناس ما تحسب شهر واحد بغير هلاليه

أبن شايق :

ماني مثل ذيك التيوس اللي تهز ذيولها *** أدلالتي ذالليل لو تزعل دفعت رياليه

أن كان حرب أهل الحجاز يقودها مهبولها *** حنا قبايل نجد ما نرضا خطا وهباليه

صياف :

أنته تدور للعلوم ولا تعرف أصولها *** أشوف عينك يالغليم تقل رأس خلاليه

وآجب علي أخاطب العالم بقدر عقولها *** يا مدور المكسب معي يا ليت رأس الماليه

أبن شايق :

شهد على نقض المعاني وأعرف لمفتولها *** العلم من صوبك وأنا النقاض والفتاليه

الله يعيد ألك الحلول اللي نسيت حلولها *** حتى تعود ما لبست ثويبك التفصاليه

صياف :

ماني مغير حفرة الزهلول عن زهلولها *** لا والله ألا كثرت الهرجات والأقواليه

الليل حطوا حاجة الهندول في هندولها *** ماني مزعل صاحبي وأزعل الرجاليه

أبن شايق :

يا والله اللي قامت الدنيا تزيد خبولها *** يالله تعوض بخير يا محيي العضام الباليه

[محمد العتيبي]

الله يرحم الشاعر / صياف الحربي .. فقيد الشعر والشعراء ..

وصح لسان الشاعر الكبير والمبدع / عبدالله بن شايق

تحيتي
...

التوقيع

للتواصل عبر twitter تويتر al_bargawy@

[صريح وحريص]

الله الله تسلم يالذيب على النقل وحقيقة شعراء عمالقة فنلاحظ دهاء الشاعر الكبير وعملاق من

عمالقة الشعر شاعر الخليج صياف الحربي رحمه الله الذي من وجهة نظري لن يتكرر هو ومطلق

رحمهما الله

ولايهون ابن شايق وحبيب ومستور

[راع العبيه]

الله يرحمك يا صياف ويبقي بن شايق ويعطيك العافية يالعبيدي

[.العبيدي.]

لا هنتو على المرور وبيض الله وجيهكم ولا خلى ولا عدم .......................
.
.
.
.
.
.
.
.
.
.
.
.
.