أول محاورة بين الشاعر معتق العياضي الشاعر الكبير حبيب العازمي

[مشتآق !]

بسم الله الرحمن الرحيم
السلام عليكم ورحمة الله وبركاته

هذه المحاورة بين الشاعر الكبير حبيب العازمي
والشاعر الشاب معتق العياضي

وهي أول محاورة يقابل بها الشاعر معتق العياضي الشاعر حبيب العازمي



معتق العياضي ::
يامرحبا ترحيب وافي من عزيزيـن الجنـاب // أقولهـا وأعيدهـا باسـم المدينـة كلهـا
امنولٍ ناويك ياحبيب بسوطٍ مـن عـذاب // وشلون مرت قدم عينك وأنت ماتفطنلهـا

حبيب العازمي ::
دام البقاء لك والمدينة مالنا فيهـا اغتـراب // هذي مدينـة سيـد الأمـه محـد يحتلهـا
بدري عليك اللي تقوله وانتبه يابو الشبـاب // أنا عطيت الأولـه ماقلـت معتـق خلهـا

معتق العياضي ::
أنته تقوله مير حنا اللي بها عصـر الركـاب // تـرى العتيبـي مـن قبـل والله ماينزلهـا
ياصاحبي وشلون جمعت النمورة والذيـاب // وتقول من عنده سيـوف يالعيـال يسلهـا

حبيب العازمي ::
أقرب إلي من الثرى وأبعد عليك من السحاب // كم ديـرة وصلتهـا والنـاس ماتاصلهـا
ترى القوافل ماشيه ماهمها نبـح الكـلاب // مالك ومال أهل الفتن أنته صلاتـك صلهـا

معتق العياضي ::
حنا نزلنا وسط طيبة يوم خلـق الله تهـاب // والترك حنا اللي طردها مير ربعـك قلهـا
أنته تقوله ياحبيب ميـر فـات الاكتتـاب // ترى القوافل لو توقـف بالطريـق أحسلهـا

حبيب العازمي ::
ماتعلم إن جدي أنا بالسيف مصقول النصاب // الترك في هضبـة وعيـرة دونكـم قابلهـا
خلاص قفل بنك الانماء مابقى الا بنك ساب // واللي فلوسه دوبها المصـروف وش يعملهـا

معتق العياضي ::

قابلهم جدك لكنه مـدرق سـد الهضـاب // يومين ثم روح وكبـده باقيـه فـي غلهـا
خلاص مانبغاه جعله للتشتـت والذهـاب // الأولـه راحـت وباقيـة الدفاتـر فلهـا

آخر تعديل مشتآق ! يوم 08-Sep-2008 في 02:55 PM.

[عبدالرحمن الهيلوم]

ابداع من الملك // حبيب
مشكوووور يالغالي

[محمد العتيبي]

صح لسان الشاعر العلم / حبيّب العازمي..

و

نتمنى التوفيق للشاعر الشاب / معتق العياضي .. وصح لسانه

تحيتي
...

التوقيع

للتواصل عبر twitter تويتر al_bargawy@

[فهد الزهراني]

صراحة ماشاء الله عليه معتق ماتوقعته بهذا المستوى
..
طبعا حبيب مايحتاج شهادة علم في شعر المحاورة

[صريح وحريص]

معتق العياضي لم يتجاوز سنه العشرين سنة ويلعب مع شاعر عملاق بحجم حبيب يجعلك تتأكد

أن هناك شاعر قادم للساحة وبكل قوة وسيكون له شأن كبير في المستقبل القريب والله أعلم

[الجوراسي]

سئل حبيب العازمي وهو استاذ في الشعر عن كيفية الحكم على مدى قوة شاعر قال يكون ذلك بالحكم على مستواه خلال فترة لاتقل عن خمس سنوات....

وكذلك قال في مجمل كلامه عن كيفية معرفة مستوى شاعر شاب قال لا بد يكون البادئ أنا معه في اللعب. يعني يجب أن لايكون البادئ الشاعر المبتدئ...


وقال في سياق حديثة لعبت مع شاعر في المدينة كان يلعب معي ببيوت لعبتها انا مع صياف عام 1414 وقال كنت ارد عليه بنفس رد صياف حتى اذكره ولكنه مع الخيل يا شقراء

معتق العياضي شاب نتمنى له التوفيق ولكن يبيلة وقت حتى يتهلم ما هو الشعر ؟؟؟؟؟؟؟

تحياتي

آخر تعديل الجوراسي يوم 10-Sep-2008 في 03:28 PM.

[نصر الشمال]

صح لسانك محاورة ممتازة ومن ابداع
شاعر عتيبة الاول والشاعر معتق
تحياتي

[راع العبيه]

محاورة طيبه ومعتق قادم بقوة الله يوفقه ولا حبيب معروف

[ابن طامي]

محــاوره رائعـه .. وهذي كانت في المديـنه المنوره .. وانــا حاضرهـا ..


بس ان كانها عندك صوتيه .. ياليت تجيبها .. الله لايهينــك ..



’’,,


يعطيــك العافيــه ..



.

[مشتآق !]

( عبدالرحمن الهيلوم .. محمد العتيبي .. فهد الزهراني .. صريح وحريص .. الحوراسي .. نصر الشمال .. راع العبيه .. ابو طامي )


الف شكر اخواني الغالين على هذه المشاركه اسعدني ردودكم الجميله
وبالنسبه لهذين الشاعرين
حبيب العازمي شاعر علم له ثقله بشعر المحاوره ومدرسه لحاله
ومعتق العياضي شاعر شاب وقدامه طريق مبهر دام هذي بداياته وكله كم سنه وانشوفه من عمالقة الشعر والله يوفقه

والمعذره ياابوطامي المحاوره هذي ماهي عندي بالصوت لكن ان حصلتها تبشر اجيبها لك,,

وتحيــــــاتي لجميع من أطلع على هذا الموضوع

الفيصل المخلفي

آخر تعديل مشتآق ! يوم 16-Sep-2008 في 10:22 PM.