قصيدة الاسعدي 2

[راع الجود]

انا لا عرج بالراس هاجوس غنيته ** على ملتقى الخطين تفرق معاناته
ليا هجرس الطاروق بالصدر خليته ** يداعب بنات الفكر في كل حالاته
مداد الحروف ليا ندهلي ولبيته ** يحل بحلاله وابرك الوقت حزاته
على غير موعد جيته كان ماجيته ** يوجه خفوقي في مراده ومشهاته
يجيه صدى صوت (ن) على النفس بديته ** تباريح قلبتوجع الصدر زفراته
تحيل الروابع بين جبته ووديته ** على ماردن دونه انياب حياته
تحديت نفسي والتحدي تحديته ** ولو خاطري تسبق ليالية ساعاته
ولا جت لي الدنيا على ماتمنيته ** ولا هزت إيماني بربي وبآياته
وانا في حضور الجرح بالجرح داويته ** وكم واحدن يسكت ولا فاده سكاته
تغير زمان الصمت واحداث تسكيته ** على ذمة الحاسوب تنبيك خاناته
ما بين المصدق والمكذب ثوابيته ** وكلن ليا سولف يسند بياناته
تسارع زمنا والمسافات مخليته ** عسى الله يكافينا هوانا وميلاته
تعدى الحمايا قاصرن ما سمك بيته **حدوده مدى شوفه على قرب شوفاته
تعداه وتعانق سماها بعاليته ** على هامة الجدي الشمالي وجاراته
على الكوكب القطبي ولله تثبيته ** ورى حد تفكير الاوادم مداراته
يقرب مسافاته شموخه وتوقيته ** ولا ضاع من عينه ليا شافه مراته
كذا الوقت علمني وانا ما تهجيته ** قريته تجارب عقب ما ذقت صكاته
تعلمت مآخذ علم من لا توحيته ** ولا اخوض بحرن كلن يغوض غباته
تعلمت مانزل عن مكانن تعليته **ولا اخيل برقن عاقبتني مسافاته
تعلمت لا زعلني زماني ترضيته ** واقول الخطا مني على كثر غلطاته
تعلمت مسرى الليل ماخشى عفاريته ** ولا اكذب الخفاق واحساس نبضاته
تعلمت ابت الراي لاحترت واخفيته ** بعد ما درسته والخفايا ملفاته
تعلمت ما اخلف عهد لا مني اعطيته ** ولا اسمع مشورة واحدن ما نفع ذاته
وانا شرهتي لا هيب حيه ولا ميته ** على من خلط حسنات طيبه بسياته
عبث ما بدى والعقل ما هان تشتيته ** عسير المنال ودون عاجه متاهاته
غثى البال واجد يا كثر ما تعديته ** ولا ارجي من احدن غير مولاي مداته
على البال شكوى خاطري يوم رديته ** على مد بحر العرف واعماق داناته
على شان ما عود على من تناسيته ** غلاً لا ذكرته يقفي الليل ما باته
يا كثر الحسايف يوم بالعقل جافيته ** على عكس رغبة خافقي عشت ماساته
وانا حالفن للقلب ما قول ياليته ** لو ان الجفا ياخذ من الصدر دقاته
وانا لا عرج بالراس هاجوس غنيته ** على ملتقى الخطين تفرق معاناته