من أروع قصائد أبن جريذي

[داهية عتيبة]

هذه القصيدة قيلت في أحد المناسبات ويستعرض فيها الشاعر بعض أمجاد قبيلة الدلابحة من الروقه من عتيبة
للشاعر عبداللة بن جريذي بن لفا الدلبحي

ياسعـود انا ليه خـوال وبني عـــم ### في وسط نجـد مثبتين الـرسومي
آمـن القـرى محوالهم لزرق الجـــم ### خلو زعاميط الحصى في الرجومي
دارو بكشب ليارجــــوم مرجــــم ### مغير راس وشاح في كشب يومي
تحـدرو ومــــردد الخـــال يعـلــــم ### أمـا نشـد ولا تجيـة العلـومي
خـال(ن) على جنبـــــه نذرع ونهتم ### أن جـاه من ضيم الليالي ثلـومي
طبوا بنجد إلى معـار أحمــر الـــدم ### مافيـه بالمعـروف شين يـدومي
صالوا وجـالوا وأفترق شمل وألتم ### لين ارتكوا بنـحورهم لسهـومي
من الـــــذويبي للديـــاحين لـــدهم* ### لمداوي الزيدي* كلـوه القـرومي
يوم أعترض من دون وادي الموسم ### مالو على ربعه مطيـح النجومي
وابو دخـن جــــابه نهـــــار مغنـم ### أول نهـاره قسمنا في القسـومي
وأنشـد بني سالم وتلقى معـــــلم ### عن ليليتن فيها تضـيع العـزومي
منـهم ذبحنا كل قـرمــن محـــــزم ### لو أذبحـو خـالي ولحقو لحـومي
ومع الخوي يشهدلهم جمع مزحم ### شالو خوي الجنب رغم الخشومي
شيل المطيري والعرافة مـــكضـم* ### قيده حـديد وبالربـاط محـزومي
هيجين قدم نحـورهم رمـــيها زم ### لين أنكفوا يصقل بياض الهـدومي
واليوم من عرض المخاليق ننعـم ### في ضل حـكامن علينا عمـومي
نرقـد تحت راية فهدنا المــعظـم ### ألي يزيد ألنا المـذاهب سلـومي
في سلمنا عـود الجـماعة محشم ### كبيرنا طـول الليـال محشـومي
صغــــيرنا لو ينهمه قـالـــه سـم ### أرحـامنا وصا عليها الـرحومي
من لاعمـل بوصات ربه تــــهذرم ### هذاك من كـل الجميل محـرومي
قصـيرنا ماقــــالـه ورعنـا بـــم ### وأن زارنا العـاني تنسى الهمومي
على القصيرة نضفي العين والكم ### دايم علـى غراتهـا ما نحـومـي
مثل النـذول ألي دورها تقمقـــم ### ألي على الجاره تقول محمـومـي
أن ما مشت رجله قفاها ونمنم ### خبل على راسه تحوم الرخومـي
ودخيلنا يـرقد عزيز مكـــــرم ### لين أنتحرفله بسد الخصـومـي
أمـا دفعناهم بسـلم مسـلــــم ### ولا كفلناله بوجـهن هـجومي
والضيـف ترحيبه علينا مقــــدم ### ماننشده ويش جايبة من لزومـي
يمضي الشهر دوله علينا معمم ### يقلط على حيل غطتها الشحومي
عادتنا يوم القضـامه تقضـم ### يوم القليل مع الكثير معدومـي
بوجارنا تلقى الخلاص المعجم ### في حيد صفرن نجرهن ماينومـي
صفرن جدادن شغلهنه مبهم ### رسلان ختمه فـوقهن مختومـي
نصفحلهن هيل خشومه مزمم ### هيل عليه من العويـدي رسومـي
دايم علية العود الأزرق معجرم ### عـود الهـنود ألي غلاه محتومـي
والبـوق وألي للبلايس يخـرم ### نكفاله الفنجـال وسط اللمـومي
وألنا على سد الذواريب مغرم ### دم الخطـى بين الجميـع مغرومـي
يشهد علينا كل رجل مذمـم ### والنذل والحاسد عسـى مايقـومي
هذي فعـايل ربعتن مـاتندم ### الاد دلبـح مـدركـين النعـومي

*ويقصد الشاعر الذويبي أمير بني سالم من حرب وجماعته عندما حصل بينهم وبين
بعض قبيلة الدلابحه مواجهه والقصه معروفه ….
وكذالك الدياحين من مطير وقبيلة أدهم في الجنوب وماحصل من مواجهات مماثلة..
*ويقصد الشاعر مداوي الزيدي أحد المنشقين هو وجماعته عن طاعه ولي الأمر
الملك سعود رحمه الله أنا ذاك أثناء محاصرة نجران والقرى التابعة له وقد كلف رحمه الله
بعض قبيلة الدلابحه المشاركين في الغزو بالأستيلاء على المذكور وأحضاره ورفع العلم
في منطقتهم..
*ويقصد الشاعر أحضار خوي الدلابحه ابن مدلج المطيري من قبضت
الأمير سعود العرافة ومن معه من أتباعه والقصه معروفه عند قبيله عتيبة …