السلام عليكم ورحمة الله وبركاته
هذا ديوان الشاعر المبدع: بندر بن محيا..
نبدا بقصائد الغزل:13 قصيدة غزل
من يوم حبيتك!
اخرج من القلب وارجع لي بعد بكرة = اليوم ماني فـ حاجة شوفة عيونك
خذ معك نبض الحنين ودمعه وسُكره= وشي ٍ يشابه جنون ٍ يشبه جنونك !
يومين تكفي حزين القلب تفتكره= من بعدها ارجع لو انك ترجع بدونك !
ياللي غيابك عن الغيّاب تحتكره=. أنا لو اني نسيتك كني آخونك !
بديت اخافك يامستهتر على فكرة! :=.. غيري محبين من رمشك يخافونك
من يوم حبيتك أكثر عاجز ٍ لا اكره=والكره من (حُب) لاابطى جاب مكنونك!
و النادر اللي يذوق السجن في وكره =. حريته معك لو ماهوب مسجونك!
لاتشكر اللي يقدّم للولي شكره=.. مااخترت احبك..عشان تقول مجنونك!
غب من حناياي وارجع لي بعد بكرة=... اليوم ابا اكتب قصيدة حب فـ عيونك !
صورة بالالوان
عزيزي القاريء النبيل، هذه القصيدة لن أُهادن على موتها، لأنها تخصك، تخصني، تخص كل الألوان، ليسَ معنى ذلك أنها جميلة، بل لأنها كُتبت في طقوس لن أنساها.
والله يابو ضحكة ٍ فيها نهاريـن =....قبل اتكسّر على صورتك الأوزان
لقيت فيها السما والأرض والطين =..وتاريخ غامض بلا معنى وعنوان
فـ خيوطها ثرثرة شاعر وقافين =....وبحر ٍ تحت زرقته لولو ومرجان!
وفيها من التوت مايغريك يالتين =.......ومن الثمر لاتدّلى عَقْد رمّان
وفيها العنب سلسل غصون البساتين =...يوم البنفسج تحضنها بالاحضان!
سْقوفها من زبرجد طـّل مابين : =.....ستاير ٍ ما حكت للريح نسيان!
يسولف السمع فيها جنب ليلين =.....لين اختنق شمعدان وطار دخان!
فيها تلّفت يسار وعينك يمين =.وعلى التفاتـك يصب الغيث ودان
وعلى شفاهك تلعثم حدّ سكين =.......وخيانة الأحمر النافر للالوان!
كن الخشب في براويزه ربيعين =..وأنهار وأعشاب في صدري وهتان
يحرث بها الظل حبـْر وتزهر يدين =...ويحفر لها الحلق صوت وينطق لسان!
وتجلس وفي جلسْتك يبيّض نسرين =..وتاقف وفي وقفتك ينهار وجدان!
وكم حاجبك عقّل هْبَال المجانين =وكم هي رموشك تجَغْرف بيد و أوطان!
وكم رغّدت خدك عْيون الفقيرين؟ =.وكم في عيونك سَرح طرقي وهجّان!
ماقلت في صورْتك حرب ومعادين =..ولاقلت فيها رمي بندق ونيشان
أقول فيها يزغرد صبح ويبين =..وأطير فيها ..سما..من غير جنحان!
أو قل طريق ٍ تواعد فيه قلبين =واحد نسى قلب واحد كان ولهان!
لين احترق فـ انتظاره وامتلت عين =..وانهدمت ضلوع في صدره وجدران
وياهي ملامحك يشربها الغريبين =..ومن أربعين الشبه ماتشبه إنسان!
أشوفها اصْدق من دموع المساجين =..اليا اطلبوا رحمة ٍ من كف سّجان
وأحس لاشفتها تاقف بي سنين =.وإن جيت بـ اصد عنها..تمضي ازمان!
وأشوفها جملة ٍ مابين قوسين =.تفسيرها الدمع والحيرة والأحزان
شبّرتها ماتجي بالطول شبرين =...لكنها السرمدية بعض الاحيان
وباقي من الثلث ليل وراح ثلثين =.وأنا اتدّفى على صـورتك بردان
سامرتها وانفجر شاعر وصدرين =ومْن الوله والحنين ارتبكت أوزان
لين نْعَسَت عين..وشوي نْعَسَت عين =ونمت وتركتك تحاكي صمت الالوان!
طويلة، لكن تخصكم، ثقوا بي!
عليـــــــــــــاء..
تهب الريح فـ اوراق الشجر ويغرد العصفور=...وأنا تحت الهجير وصمتي أحياناً يكون ظلال
وتتكسر خلاخيل الرعد في بارق ٍ مغرور=..وأحس اني تكسّرت وبقى في داخلي رجال
أطش بفم هذا الضي حزن وبعض من ديجور=..وأغمض جفن من تحته سديم ٍ واقف ٍ مامال
يالارض أخذي سنابل وجهي اللي مانبت فيْ البور=.تعب حتى أساريره غدت بعد الغياب أطلال!
خذي بعض الجهات ومن ملامح شاعر ٍ مجبور=.وهو يذبح من عروق الزمن ساعه على الترحال
يالارض البارحه همّ الستاير والنجف والدور =..وحزن أمي وجوعي والفراغ ودفتر ٍ دجال
خذت أغلى الدّموع مْن العيون وخاطري مكسور =وصوتي ينسكب فوق الورق واحس به لاسال
قبل ذيك المدينه والنعاس وبابها المبتور=.تعلمت البداوه والحضاره هي سراب اللال
أمانه قولي لـ(عليا) قراح الما وطهر النور=..تراني طفل مامل البكا لو ملت الأطفال!
طفل مات بهدبها والخدود وشعرها المنثور =قبل يمشي بزهو ويلبس الغتره بدون عقال!
طفل كان يتشيطن فيْ السطوح ويدِّرج فـ السور =..ويسرح فيْ النياق مواعد ٍ عشره وهو جمال
يشوف بعين عليا صورته وبثغرها البلور=ويْتنفس غلاها ويهذي لامرّته بالشــال
يالارض الوقت خليّته مزيف واحترف لي دور =.وأنا مالي سوى عليا وحلمي والهوى القتال
فبعض أحيان أحس اني كذا ..شاعر وله جمهور=وأحس اني في بعض أحيان أقول أشياء ماتنقال
ورى هذا الكلام يحسّب الشاعر بليد شعور=.لوى معصم حديثه والقلم بيدينه الأغلال؟!
وخيول ٍ تركض بصدري وتجمح ويْغشاها عثور=.وتعاود ركضها عقب المطيح ويرتجل خيّال
يجيني من قبل هالحال ..حال..وحالي المستور=.رضيت بقسمتي لو "نصف تفاحه" على ايّة حال
يقولون البشر عنتر وهو عنتر يخاف الثور =.وأنا أقول المخافه وارده في سيرة الابطال!
أجل ..ملّيت أنوّخ حيرتي لعتابي المقهور=.ومليت آتسلل فالسطور المظلمه واختال
يالارض أخذي يديني مالقيت اللي يمد الشور =..وأنا تحت الهجير وصمتي احياناً يكون ظلال
عـيونك أم الشجـب والتنديـد!
أريــد امـوت مْـن الـولـه وأريــد=... أبـكـي وأنا اصـّلـي عـلى السـجــاد!
لـو رمـشــك المســتهـتر العـربــيـد =. كـنّه عـلى حـدب الـضـلوع أصـفــاد!
لحظة تـمـّـل النبـضه الترديــد= ويـبـكي ورى حــدب الضـلوع فـْـواد
مـرت ثـمـان ســنـين وأنت بعــيد=. مابـيـن نـار وأسـئـله وإبـعــاد
واليـوم أنا اطريتك وجبـت العيــد= فيـنـي .. وقابـلتــك بـلا مـيـعـاد!
وهـزّيـت لك قلـبي مـن التغـريـد=.. قـمّ وافـتــح أبواب الحـكي للضـاد
هاذي ضلوعي من عــرار وبيــــد=ووصلك رفـيــف البـرق والــرعـّــاد!
مولود أنا الليله من التنهيـــد=طفـــل ٍ ويصــرخ صـرخــة الميـــلاد
وموعود أنا الليــله من التسهيــد=لو ســال في واد ِ العيــــــون رقــاد
ومسجـون فعيــونــك بليـّـا قيـــــد= وغريـب عـن صـــدرك بليـّـا بـــلاد
يابـو جــروح ٍ كـل يــوم تـزيـــد = كــل شــي زاد إلا الـفــرح مــا زاد !
حــاول تشــب بصـوتـك المجـّـيــد:= نبضـــة "ولـــه" لاجيــت لك منــقــاد
وعـيـونك أم الشـجــب والتـنـديـــد= اليا ضـْـحكت لـي ضحكـة الأولاد
خلتني البــارح من التنهــيـــــد= أفيـق وأصــرخ صــرخة المــيــلاد!
شارع شعول
دنـّت بساق الهجوس المغرم حجول =.وزيّـنت فوق الشماغ المترف عقال
قلت اقلطي ماورى الحرمان موصول =..في صدر من ميـّل احزانه ولا مال
سكنت بيت ٍ جديد بشارع (شعول)=.وفقدت لي زول يسوى عشرة أزوال
ووقفت جنب السهر والنوم معزول=عن جفن من رمـّدت عينيه وأهتال
من وين اببدا كلامي ويش ابا أقول!=.والناس ماتسـمع المجروح لاقال !
والقاتل البارحه حطوه مـقـتول =وفـ عيونهم شفت أنا المقتول قتال!
والناس لوصـّدقت بالخلّ والغول=..ماصّدقت بالقصيد..ألوان وأشكال!
والشِّعر انا واصله عرض وعلى طول=عد ٍ رويـّتـه يوم ٍ أفكاري حـبال
في ذمتي كنـّه المرجـان واللـول =على الورق وإن قصر فالقاف وإن طال
ويامبعد ٍ حول دار الحول والحول!=وأنـا على حال مامثـله ولا حــال!
ياعمّ كل الجروح الزرق .. يحول!= وراك ماصرت لجروح الغلا : خال!
من غبت والما ظما! والحلم مشلول=والحزن جرهد ودمعي وادي ٍ سـال!
ولاتحسب إني عن الاحزان مسئـول =أنت اتحمـّل ذنوبـي يوم الاهوال
لاترمع اللغز دام اللغز محـلول =ولاتعتذر لي بعذر ..وتضرب أمثال
قضيّتي معك دايم ضد مجهـول!=وجرايمك صدّ واحسانك لي وصال
والبال مشغول! ليه البال مشغول؟!=وطعونك الخضر ماجت لي على البال!
يبل قلبي ليا من جيت هملـول=وإن رحت قلبي جفاف ونصفه رمال
كم نافذه تشتهيك وباب مقـفول=وكم ريح عطر ٍ لبيتك جرّت رجَـال!
ياللي صباحك معي بالحب مغسول! =ترى غيابك دجا وأعمالك أعمال!
ان غبت غابت سنين (وكلّت حمول=.متني) ..ومتني عليه حمول ٍ ثقال
وبعض الغلا كان مايبنى على آصول=مثل الرجل كان مات ولا له عيـال !
((قصيدة حب))
ذَهَب كل الكَلام وفْضّتَه يْوم السَّكوْت نْحَاس=. قَبْل مَا اشْوفك أشْوفك نَهَر مِن مَنْبَع عْذوبَهْ
أحْبَك مِنْ زَمَانْ البَردْ..أحْبَك مِنْ زَمَاْن اليَاسْ= كْثر مَا اْصْحَى مِنَ أيْام الْوْلَه وأدخْل فْـ غَيْبوبَة
أنَا وحْدِي حَبِيْبْكْ لو قَريْتك فِي وجِيْه النَّاسْ= وَلَوْ وجْهَكْ ذَنُوب ٍ مَالهَا فِي سَجْدتِي تْوْبَة
تْجِي مِثْلَ العَزَا بَعْدَ العَزَا فِي غَيْبَة الأعْرَاسْ=وْتْروْح أشْبَهْ بْـ دَمْعَة فـْ الْوَرَقْ بـْ الصَّمتْ مَكْتُوْبَة
مَعَكْ حِلمي مِنَ المَا وَالميَاهْ تْكَذّب الْغَطَّاس= ياكْثر الليْ غْطسَوْا فِي حُبك الهَايجْ وغَرْقوبهْ
مْجَارِيْح ٍ نَفَاهُم دَربهُم لـْ عْيونِك النّعَاسْ= تَعَدّوا يَنْشدونْ الْصُّبحْ عَنْ رمْشك وضَاعوا بْه
يْحَطبُونَ الضّلْوع فـْ غَابَةْ أَيَّامكْ بَلْيّا فَاسْ= شِتَاهُم ضِحْكَةْ شْفَاهكْ..وشَافوْا نَاْر مَشبُوْبَةْ
تَخَاوّو بَيْنْ مِنْ دَوَّر ذهِيْبْ* ومِنْ سَرَحْ عَسَّاس= حَيَارىً غَرّهُمْ كَاذِب هَدَبْك وْ وجَّهوا صوبْه
وانَا الْبَارح عِيْونِي فِي عْيونْك مَرّهَا وسْوَاس= بَنَيْت سْنِينِي البَيْضَا لْهَا طوبَهْ عَلَى طـوبَهْ
أردّك للحَدِيثْ بـْ لَهْفَةْ الْبَاردْ بَليَّا قْيَاس= وتْسولِف سَالِفَةْ لَلْيّ عَشَقْ مَا هِيْبْ مَرغُوبَةْ
قمْ اجْلِسْ فـْ الْحَنَايَا قَبْل مَا يْغْتَالكْ الْقرْطَاسْ= شَعَرْتْ انِّك تَبْي تَهْرُبْ وَرَى النِّسْيَانْ لـْ دروْبهْ
أنَا محْتَاج لْك..مَا احْتَاجْ ليْ لاتَنْشد الأنْفَاسْ=عَنْ أكْبَر حَاجة ٍ فـْ أقْصَى نَفَسْ شَاعِرْك مَحْجوبَةْ
طَويْلةْ طَاولتْنَا واسْتَقّرَّ المَا بـْ قَاعْ الكَاسْ=. كأنَّ السَّالفَةْ غْيمَةْ عَلَى شْفَّتْك مَسْكوبَةْ
جَلَسْت مْقَابلك وَجْهَاً لـِ وَجْهْ بـْ جَنبِْيْ الهُوجَاسْ= إذَا مُستَقْبَلي وَجْهَك ورَى الأحْلاَم مَرعوبَةْ
نسِيتْ يْدَيّ بـْ يْدينَك بـْ صُدفَةْ كنَّها الإحسَاسْ=وذكَرْتْ إنِي نسيْت أذْكُر يْديْنكْ كَانَت أعْجوبَةْ
تَهَيّلتكْ طَعَمْ هيْل بـْ فَميْ مِنْ بَعْد طَعْم عْمَاس= بـْ فِنْجَال ٍ نَعَسْ مِن نَظْرَتْكْ بـْ أَهْدَابْ مَصْبوبَةْ
سَرَىْ الليْلَ البَهِيم بـْ رِمْشكْ المُسْتَهْتِر الخَنَّاس= وليلَةْ غيرْ هَاذِيْ مِنْ لَيَاليْ العُمْر مَشْطوبةْ
إذَا مَا يَعْشَقْ العَاشِق سَهَرْ شَكواهْ بَعْد نْعَاسْ=يَنَامْ أحْسَنْ لِه ويمَسَحْ دمُوعه فِي طَرَفْ ثْوبَهْ
إذَا مافَجَّرَ الشَّاعر قَصيْدة صِدقَهَاْ نِبْرَاس= يبّل الدَّفْتَر ويَشرَبْ حبْر كِذْبه ومَكتوبهْ
وانَا أعْظَم مِن يْحب إليَا هَدَا بَاله عقْب مَا انحَاس= أعيْشْ بـْ كبْرِيا والقَلبْ بَيْن يْديْن مَحْبوبهْ
مْطَر هَذَا الوصِل يومَ الهَجْر يمْلا الضْلْوعْ يْبَاسْ= وعَسَى المَاطِرْ عَلَى يابِسْ ضْلْوعيْ يْرخْي نْصوبهْ
مْن الليْ يشْبهَكْ؟ يالفَاتِنْ المُسْتَصْعِب الحَسَّاس= ليَا حَاولتْ أشوفَكْ فـْ المَلامِحْ قَبْلْ هَا النُّوبةْ
يذّكرنيْ بِـ مِنْ لايشْبهكْ مِنْ يشْبهك لادَاسْ:=عَلَى أعْصَابِيْ سَفَركْ ودوبْه أيْقَظ غَافْلكْ دوبْه
وأنَا قَلبيْ وطَنْ أرضَهْ سمَاكْ وبيتَهْ الكُراس=جبِينَك شَمسَهْ فـْ صُبحَ الوَلَهْ وجْروحَكْ شعوبهْ
أنَا قدّامك اخْتَرنيْ حَبيبكْ قَبْل كِل النَّاسْ= أوْ إنِيْ مثْلْ عشَاق ٍ هَووّ رمشكْ وضَاعوا بهْ!
بنت ٍ تهزّ الأسئلة !
فيْ المقهى أربع طاولات= وفيْ الركن الأقصى..طاولة
مرمي عليها الأُمنيات= ووحْده عليها المهْزلـة !
سالت سواليف البنات= وأنا أسترق سمع وَ وَلَه!
وحدة تقول إن الحياة= حياة ..لكن مُعضلـة !
ووحدة تقول إن الجهات=تشير له والبـوصلـة !
ووحدة تقول إن الممات=أرحم من أكبر منزلة..
ووحدة تقول إن الشتات=في الحب..كل المشكلة..
..في الطاولة ذيك، الثبات=بنت ٍ تهزّ الأسئلة !
في يدينها النعناع مات=والكاس في فمها : دَلَه! *
فستانها كان التفات=تشعر بحده فـ اوله!
وفي يدينها كانت تبات*=محابس الها..خلخلة
قلت: الهوى، قالت: صِفات=قلت: السهر، قالت: صِلة!
قلت: الظما، قالت: شمات=قلت : الحقايق سلسلة..
قامت وفي روحي صلاة=.ومرّت بحلم ٍ ما اجهله!
وهي تعدّى الأُخريات= للباب .. قالت: سجّله
عنواني : إني فيْ الحياة=فيْ حيّ موته..مَعْزِله
اسمي: جنون المُغريات=عمري : مراحل، مرحلة
شهادتي: حزن أمهات= وميلادي: أصعب مسألة
أسكن ببيت الأمنيات=فيْ الشارع آبو الأسئلة!
أطلق فمي!
قلت لك والخوف فعيون الصَّبَايا= "آه ِ مِن قَيْدكَ أدمى مِعصَمي"
"أعطني حريتي أطلق يدايا"=. مِن سجون الصَّمت ِ بل أطلِق فَمْي!
وآنا متخفيّ ورى بيض النوايا= ناشف ٍ ريقي قبل يَنْشَف دمـْي
ليت ذاكْـرتـْي مثـل وجه المرايا=تعكس اللي وسْط بالي : فـ قْلْمي
طاح قلبـك فوق طاولـْة الهدايا؟= طيّب : يديني .. وصوتي ونسمي؟!
أطول الحرمان : روحي مو معايا= وأبخـل الأيـام : حزن ٍ حاتمي !
تسجن احلامي ورى شك النـوايا= وش يفيــد ان كان تطلق معصمي؟!َ
لاتعتذر لي لو سمحت!
كثر ماأخسْر كل شيّ =. كثر ماأنسى اني ربحت
الحزن :هو الدمعه:هيّ=. لاتعتذر لي لو سمحت
اطلع من الخفـّـاق زيّ= ذرة صخر من فعـْل نحت
لي حق.. لك حق ٍ عليّ=إذا جرحـت ولا انجرحت!
هاذي يدك ..هاذي يديّ=صح لي..وانا لاصحت ، صحت!
بـ اراودك لحظه ، وعيّ!=. ولو ماتعبت ، انا استرحت!
يلعـنـك .. حتى (في يديّ=. بيّن غيابك) ليه رحت؟!
دوّرت فـ وجيـه آهليّ=ضحكة .. وناديتك وطحت
شيطنة!
ياجدّي عـْيونها الما والينابيـع=. من قبل مااظما على فمها بِيدها!
القاني احيان بين الياس واضيع=.وتلقاني الغيم في صرخة رعدها
قد شرّبتني من احلامي قراطيع!*=.وانا عيوني على لمّة بردها !
اعصي غلاها الرقيق العذب واطيع=..ابوها فاحيان واحياناً ولدها!
يعني إذا هزت ثمار ٍ مهانيع*=. تهزني شيطنة طفْل: لـ ج س د هـ ا !
ميــزاج!
عسى ليل الغياب اللي نفـْضهْ مْن الظلام"اوداج"=. يفجّه نور فجر ٍ ليلته تهرب مْن سراجه
وانا قلبي صخر ياللي تـْعقـْد مْن العتاب حجـاج= على بال ٍ مثل صبّ البْرد في كاس ميزاجه!
قصيـد ٍ مايسّر عيونك النجلا "حبيـس ادراج= وغرام ٍ ماروى ظامي غلاك يجف ثجاجـه
غرامك باب واحلامي سجينه والرجا مزلاج =. مفاتيحه تناهيـد الدموع وصبري افراجه !
انا مُتعب من ايام الألم .. واشعر ببعض احراج= لو ان اعصابي :النار .. وأحاسيسي فـ ثلاجه
خذ الثاير من احزان المواني ..صدري الامواج= بدى تحت الضلوع العوج بحر ٍ سرمد امواجه
انا محتاج لكْ ..مااحتاج لي! شف حاجة المحتاج=. عجز يحتاج جرح ٍ من يدينك كان محتاجـه!
ولج ماضيك بين سنيني السود وغيابك فاج= مثل عطر ٍ "سكْت "في فوحته والريح هراجه!
نضب شوفي وانا ادوّر عليك وللزحام افواج=. تعال الباقي مْن الشوف : رمش ٍ ضيّع حجاجه
نبت لكْ من على اوراقي حمام وطارت الادراج=ورحت اطارد ابيات القصــيـد فـ ليل معراجه !
تعالي لوجهي!
مــن بـعـض طـيـن وبـعـض مـــا=كُـنَّــا اثـنـيـن مْـــن الـجـفــاف
ومـــن قـبــل أكـــون وبـعـدمـا"=إنـسـان" خـفــت انـــي أخـــاف
رويـــت مـــن كـثــر الـظـمــا=وسـنـيـنـي الـسَّـبــع الـعـجــاف
يـاعـلـيــا وجــهـــي كـلــمــا=يشبـهـنـي ، أشـعــر ب اخـتــلاف!
غــنَّــت مـلامــحــك الـسَّــمــا="نجـمـة" وغـيـمـة مـــن عـفَــاف
وجــيــت اســتــرّدك بـيـنـمــا:=ضعـتـي ف لـيـلـة مـــن زفـــاف
أنــــا الـمـقــدِّي ، والـعــمــى=وأنــتــي مــكــان ٍ مـايـشــاف!
تـعـالــي لـوجــهــي كــمـــا:=غـيــم ٍ لـعــن آبـــو الـجـفـاف
شمس مالها مغرب..!
من اللي قال ما للشعر وقفة لاجل تنهيدك=
من اللي قال تنهيدك قصيدة شعر ما تكتب!=
أنا ماني على قيد الحياة اللي على قيدك=
أنا قيدي حياةٍ لا استرحت ابها بديت أتعب=
مواعيد الوصل في يديك.. ياما اكذب مواعيدك=
وأنا لو إني افهم بعض كذبك قلت لك تكذب!=
تبعد عن وصالي والمواصل خاتم فـ ايدك=
أجل ليتك حبيبي من بعيد ان كنت ما تقرب!=
ثلاث أيام.. أو حول أربعة ما كنت في عيدك=
جلست بمفردي بيني وبينك كنت أبي أهرب!=
أشبهك بصباحي.. مغربي.. يا صعب تحديدك=
مدامك شمس تطلع في سمايه ما لها مغرب=
قم اسأل باقي الأحلام عني يمكن تفيدك=
أنا قلت الك يمكن .. كان ما فادتك لا تغضب=
خطاك إن العتب صعبٍ عليك وقادر يكيدك=
صدق من قال: خلك يجهلك لو ما قدر يعتب=
أحبك من شتاي اللي ترمد في مواقيدك=
وعمر ولعت كف الليالي نار به واشتب=
ولا اقول الرضا قمة عذابك قبل ما اريدك=
أقول ان الرضا نهرٍ لك بقلبي عجز ينضب=
عذابٍ منك ما قصر غلاك إلا بدا يزيدك=
بعينٍ قصّرت في شوف غيرك فيك تتعذب =
هلا باشهى ربيعٍ من غصونك لا عناقيدك=
تقول إن الغصون من الخجل عنقودها معشب!=
لعمري ماني بوحدي بنيرانك بتسهيدك=
ولكني قدرت اغسل عيونك كلها بالحب!=
هلابك مسهلين الأرض أرضك، اعتبر بيدك=
حناياي النحيلة يا نحيل الخصر، يا مرعب!=
كأنك ما رجعت أوما رجعت بصمت أغاريدك=
قميص في جفن يعقوب رد الشوف بإذن الرب=
سكوتك عن سكوتك ما يشابه دون أناشيدك=
سوى موتٍ تعلق في فمك وشلون لو تسهب؟=
أقدم عذر عن عذري.. كذيا ماني بميدك=
واثر من يعتذر من نفسه لنفسه حقيقة: صب!=
وأنا شعري قصيد من قصيد شعره يعيدك=
لمنديله، لنوره، للخطا للذنب للمذنب=
إذا هاذي قصيدة فالفضل يرجع لتنهيدك=
أنا من عام ابي أسمع تناهيدك أبي أكتب!=
الان مع قصائد الحزن:قصيدة واحدة
ماجاء في باب النِّسيان..
وقِّفْ النسيان تكفى يامْتناسي=خلّه يِوقف ثواني، ينتظرني
قلّه إني قاسي ٍ والوقت قاسي= بختصر وجهه وهو لايختصرني
ودّي إنه لاعدى من فوق راسي=ينتصر لي، ويْخَسْرني، وانتصرني!
لا يدوّر للسهر فاقصى نعاسي=ماشكرته كذب، كذّاب إن شكرني
جبت له فـ الذاكرة ستة كراسي= يجلس ابها، وأنت بعد أيام زرني!
قد عزمته في ضلوعي والمراسي= وقد رفض دعوة جنوني واحتقرني!
قلت : يا مجنون لا تسمعك ناسي= تعتبرنيْ إنسان..يعني تعتبرني
شاعر، مْعَلِّم، وإنسان ٍ خيالي= كم عبرت قلوب، ما قلب ٍ عبرني!
أحمل الطبشور فيْ الصف الدراسي=واختبر أطفال.. تبغى تختبرني
قالوا استاد: القصايد من مآسي=قلت:ياصغار الشِّعر كسر وكسرني!
بعض الأحيان الحكي لونه نحاسي=والكلام إن ما عذرته ما عذرني
وقّف النسيان تكفى، يامتناسي=ودي أنسى وأنت بعد سنين زرني!
والان مع قصيدة اسلامية:
سجدة في مسجد الاقصى!
من يحدثني حديث الدمْع عن غزة واريحه= ومسجد ٍ صلى صَلاح بداخله واشفَى جِراحه
عن شَجر زيتون في يافا يمر البال: ريحه=عن حَجر فجّر طفل فـ الصمْت : يارهبة سِلاحه!
ودي أعْرِف كيف تاقْف من زمان وهيْ جِريحة؟!=. كيف تسكن ليلة ٍ ظلما وهي قمّة صباحه!
ودي ارجع ليلة وليلة ورى ليلة صَحيحة!.=.لين أكون هناك لحظة مالعْدِل رفرف جناحه!
وأمكث هْناك العمْر كله بذكراه المليحة=ودي آصليّ بقدس الحق ..واخرج للفِلاحة!
طفل يا"عليا" معه ضحكة وتنهيدة مُريحة=في شوارع من شوارع صبحها كله فصاحة
والان مع قصيدة رثاء..
عشرين عام من الغمام
سنين وأسراب الطيور (اتـْدلّ)الأعشاش وتضيع!= وأنا الوحيد اللي رجع عشرين عام مْن الغمام!
رجعت أدوّر صوت جدي والمواسم والربيـع= ليلة ورى ليلة ورى ليلة.. قبل عصر الظلام
وصلت منهك والوله يجتاحني لحظة وأطيع:=للطين ، ظلْ النخْل ، ريح الهيل ، تهديل الحمام
رجعت وحدي مالقيت إلا غيابات الجميع!= وجلست مع نفسي أدوّرني ورى طين الكلام
أركيت ظهري واسترحت وقلت في نفسي ببيع=صوتي لوحدي واختنقت ومت من قلّ الزحام!
هذا أنا راجع من المستقبل المُر الفظيع= طفل ٍعلى وجهه تقاسيم البراءة والغـرام
واتذكرّك : ويشيخ قلب .. وبابك المقفل صريع=ماحدّثتْه الشمس عن وجهي ورمشك مستهام!
الماضي أجمل .. وانتظاري جف واتأخر ربيـع=شكلي ابـ اتقدّم عبث..عشرين عام مْن الظلام!
والان مع قصيدة في الفلوجة..
الفلوجة دائما:
ياأُم المآذن والروافد والامطار= ياأم العروبه والشذا والأزاهير
يالفالجه* ماباقي ٍ غير الاشجار=. اللي عليها ماتحط العصافير!
لكني آشوف الدما مثل الانهار= واشوف شجعانك موارد مصادير
يوم اختلط دم ومدامع مع غبار=مع نار مع موت..النصر طعمته غير!
تخضّبي دم وصخب والبسيّ خمار= وتراقصي بين الرضا والتباشير
لو عوروّا خصرك بتطويق وحْصار= ولو دمروا قلبك من الحقد تدمير
البارحه فـ ترابك كبار واصغار= أرواح ٍ أشبه بانبعاث الأساطير!
أشاوس ٍ تجتاح وقلوبهم نار=وعزومهم ريح وسموم واعاصير
مالوا على عدوانهم ميلة أحرار= وتلّحقوهم باللهب والزمهرير
أسود ٍ ارتزَّت على تراب الانبار=فـ جباههم سجده وفالحلق تكبير
المجد مكتوب ٍ لفتيان شنعار*= الصابرين المسلمين المغاوير
باعوا لأجل الدين والعرض الاعمار=وتقاطعوا موت القرود الخنازير
حتى هطل وسم ٍ صدوق ٍ ومدرار= على جباه المُتقين المناعيــر
ولّـفوا حواليهم كذا.. دار مادار = وساقوهم لموت المهونه طوابير
للدين للحريه ..لدمعة الثار != ما ردّهم للخوف كثر المعاذير
وياطيب عين اللي يجاهد ويختار= الحسنيين ولاحياة المخاسير
تحركوا يارجْال الامه يالاخيار=باقي لنا دمعه ببغداد وتحيــر!
باقي لنا فالقدس لحظه عن العار=باقي لحريات الاحرار تحرير!
باقي لنا سجده فالاقصى بالاسحار= باقي لنا صرخه جنوبيّ كشمير
باقي لنا في كابل جروح وآثار=فوجيه شيبان وشباب وقوارير
مليار مسلم .. مانبي غير الإصرار=والحق بـ يْد مدبّر الخلق تدبير
ويالفالجه* ماباقي ٍ غير الاشجار=اللي عليها ماتحط العصافيــر!
والان مع 22 قصيدة اخرى:
قرية سمراء
صبح القرى وشوش الما فالسواقي واضحَك البور=في ساعة ٍ داهمتني لحظة ٍ مبلولة رقاد
ضحكت صدفة وطار مْن النخل تمرة وعصفور=.بكيت فجأة! وطاحوا من دموعي حفنة اولاد!
يابيتنا الطين جدرانك، غرفك، ابوابك، السور=مارجعتني ثمان سنين لـ ارض ٍ تـّلها وهـاد
اذكر قبل مْا ادلف لبابك ركض بـ اقدامي النور=.واليوم دنــّقت له لحظة دخلت وطولي ازداد
مُثير جداً تكون إنسان ثاني يجهل الدور=لاصارت الدور تـَعـْـرف ضيقتك من بدّ الاجواد
تركت صمتي على الشباك واستدركت مجبور=.ادور بين الغرف ملهوف لهفـة دون ميعاد
أنده لجدي : ياجدي ليه صار البيت مهجور=وتهليلتك من صداها سـْـقوف بيتك كنها اعياد!
ياجدي اشهى الهزايم في مدينتنا من الحور=واشهى انتصار القرايا ضحكتين صغار وجـْـداد
ودّهت لنياقك العـْـفـْر الجزال بصوت ممهور=.وتلافتت لي تلافت جايـع ٍ دوّر على الـزاد!
وهناك فوق الرفوف الخضر بعض إحساس وشعور=قصايد مْـكَسّـرة تحتاج وزن وقافية ضـاد
أتّمسك بسارية بيتك وَ الارض بوجهي تـْـدور=واقبّـل الباب كن الباب متغـّرب وانا بــلاد
دخلت نصفي هدوء ونصفي الباقي بدا يثور=..وخرجت فـ لساني الثلج وضـْلوعي جمر وقـّاد
فتشت يابس عن الايام مابه يوم ممطور=في جيوبي بروق والغصة بحلقي صوت رعـّاد!
غبار بيتك هو الإنسان والإنسان من بور=.منها خُـلق ثلث طين وثلث دمْع وثلث سـجاد
تـْمدّن الصحرا الأطفال الصغار وتكبر قصور=.واللي نبت طـْفل فـ القرية يسنبل رجـْلْ فـ مهاد!
على كفوفي حمام ابيض يرفرف خمسة شهور=.اليوم طار بسمواتي وانا اندهـ له ولا عاد !
ماجا فـ بالي أجي شاعر حبيس بكف جمهور=.كنت احلم اكون موسى بن نصير ا ْو طارق زياد
لو ريحة الطين فاحت من ثيابك قلت معذور=.ضوضا المدينة تفوح مْن الشوارع ريحة إجهاد!
الارض داس ابتسامتها "القساهـ" فليل ديجور=.واجدادنا فـ المقـابر مادروا عن ظلم الاحفـاد
قصدي أكون الوحيد الشاهق المسترسل الطور=ليا تنحنحت والريح اتـْهَذي في صوتي الحـّاد
وعليا تهز الحنايا ويتساقط شِعـْر منثور=.أقول هزّي بـِ جـذع النـْخْل ..هزّت تمر ماجاد!
ياجدي عيونها "الما" والسواني حنّت سيور=.نشفت مِن رمشـها حتى نبع فعيوني سـهـاد
هاذي قصص بندر المتروك وحده داخله دُور=.صَغـْر صَغـْر لين عـوّد فالقرايـا رجْلْ فـ مهاد
اصدق قصيدة على الاطلاق!
الإهداء : للبناخي فيصل بدر المهري العتيبي
/
/
أحلامنا يالحبيب أوراق=فيصل وأنا بندر وخاله
يدري أحبه من الأعماق=فال الندى والندى فاله
طفولة ٍ كنها الإشراق=وبراءة ٍ تشبه عقاله
أحبه أكثر وأنا "مشتاق=.أمر لحظة على باله"
يافيصل الفيصل أنت أحداق=عيني وجفني..وأنا داله
بسم الله الواحد الخلاّق=.عليك من عين محتاله
فاق القصيد بحنيني فاق=من ضحكة ٍ منك مختاله
أقلط على قمة الخفّاق=.مركاك ..الأحلام؟ من قاله؟
مركاك قلبيْ وروحيْ رْواق= عن حاسد ٍ مالك وماله
خوالك إن صوّب التـّفَاق=يَحـْمون يافيصل القالـه
قد قالها شالح* ولاضاق=.خيل المحيّا..ياخَيَّاله
وجدانك أهل الوغى لافاق=الدّم والنار شعّالة
عدوهم دايم ٍ منعاق= وخصيمهم حالته حالة
جبت ألك من صادق الأوراق=.شعر ٍ ورى الروح مقياله
أصدق قصيدة على الإطلاق= عن البناخي.. وأنا خالـه
قبل ماارجع من النسيان
عتب..
غـبـت يـالـبــارق وجـفّت بـــدو =.واجـدب العـشب وفــنـود الحــمــاد
ليـلة البـرد فــي بيــت السـدو=صبـحـهـا ابـيض وبــ اطرافــه ســواد
ســاهـرين الرمــد يــوم ارقـدو =كسـّـروا نومــهــم تــحـت الســهـاد
والعـصـافيـــر جايـلهـا شــــدو =.فــوق قــمــح ٍ رعــى فيـه الجــراد!
صاخـب الصـوت فـي لحـظـة هـدو =فــجـّــر الحـبـر فــ ضلــوع المــداد
رايـح الـغيـم مـالـه مـن غــدو =.تضـحــك البـيــد في وجــهه وكــاد
تصــهـل الخـيـل لرجـال ٍ حـدو =ما احسـبـوهـا علـى كبـوة جـــواد
هــرولت ريـــح فـ الارض وعـدو =و صـافــح المــلـح بــارود الـزنــاد
ظللوا شـمس الامـس وعربـدو =ظل ســــدرة لعـب فيـهـا النـفـاد
انتـبــه للهشـــيم اليـا اوقــدو:=نـارهــم وانـت نـارك مـن رمــــاد
ياصديـقي يســولف لـي عـدو =عن صــديق ٍ أحاســيسه جــمــاد
وعـن قريـبـين غـابــوا وابـعــدو =عــن بـعيـديـن لوجــونـي بـعــاد!
أبْرقــوا فــ العيـــون ولا ارعــدو =ولابـَـرَت منــهــم جــروح ٍ جـــداد
وانتهــوا نـاس فــ القلــب وبــدو =قـلـت مـال الـغـريــب الا الـبـــلاد
وليـلة البــرد فـي بيـت الســدو =فـجّـرت فالـصـبـاحـات الـســواد!
هزيمة تنتصر..
الأحد كل شي ٍ فيه موعد وصدفة!=من رصيف التلاقي..لين فرقا الرَّصيف!
تَغسِل عيونك بصبحه ونعناع قطفه= وأّتناول تناهيدك .. تناول رغيف!
الأحد جمَّعَ الأحباب نصفه ونصفه:=فرَّق أحباب ما جمّعهم الشَّوف طيف
كانت الريح فيه تسولف لكل شُرفة=عن شجر كان يبكي من كلام الخريف
عن طفل للسحاب المخملي هز كتفه=عن حبيبة له قلب ٍ يخون وشريف!
عن ستاير تزاحم كل شبّاك غرفة= لا انفتح باب ..خلفه باب ماهو نظيف!
دارت الأرض وجدار الوله ملّ سقفه=من قبل ما استعير الشوف مثل الكفيف
ياجفاف الليالي يقطع الما وعرفه= ما سقاني وأنا ضلوعي بروق ورفيف
شاعر ٍ علَّم النسيان وشلون عزفه=يهدم الزيف صدق ويبني الصدق زيف
هيه يا ضحكة أبويه وسرّه ولُطفه=والله إني قويْ ..لَكِنّ حظي ضعيف
لاتغادر جراحي غير لاشفت صدفة:= إن بعض الهزايم أشرف مْن الشريف!
الاطفال عصافير..
وشلون تقرون الملامح فيْ الاطفال؟!= من أول سْـطور البراءة إلى الخير؟!
يعني من الضحكة إذا لونها طال=وإلا من الغصن إن تطاير عصافير ؟!
وجيههم وعيونهم كحلها سال!=.واحلامهم مرجوحة ٍ قلبها يطير !
تجمعوا في صدري البارح ومال=قلبي على ضحكاتهم والتباشير !
معهم كْوْر والعاب والعلك ابوريال!=.وانا أنادي: يالصغار المغاوير :
ماشفتوا اللي مرّت الريح تختال=. اللي على يدها تحط الـ عصـ افير
طعم حلوى..
تدعي الأم مع شمس الحنان= لجل يكبر صغير ٍ ماكْبَر
وهو يجمع حقول الزعفران= ويقطف مْن النخَل سكّر تمر!
الدُعا يا امهات الما "جِنان=دانيات ٍ" على قلب ٍ خَضَر!
والمراجيح سالت فـ الزمان= لين كنّه ضحك وجه المطر..
والعصافير كانت في المكان=بعض رُزنامة الوان وصـْوَر
يركض العيد، يتذوق لسان= طعم حلوى، والاطفال الزهر
وكانت الأم تدعي في ثوان=ويمكن الطفل فضـْلوعه كْبَر ..
فنجال قَهْوَة!
نعم، يمه رسالات النّبوة في زمان الياس= أعْرْف ان المُعَلِم فيْ المَدَارس نَبْأ رْسَالة..
صغَار ٍ يسألوني عن كليب وغدرة الجَسَّاس!=وأنا مثل الذي يَبْرد عَلى التَّفكِير فـي حاله!
أشيل الأرض في جيوبي! وأجمّع للحَنين أنفَاس= وطبشور ٍ نعس في يْدَيّ ماجَا الحِلْم في بَاله!
أنا هذا يايمه شاعر ٍ صمته مْن الألماس!=ولامنه حكى تَرْقص قـْهَوْته فوق فنجَـاله!
والشَّجرة أنْثًى!
اوفى الاشجار شجـْرة واقفة= من زمن ماتمّل الانتظار
راحت اوراقها فيْ العاصفة=واضْحَكت بين كومات الغبار
قالت لمن نساها : آسفة= واشتكت حزنها لشمس النهار
شجرةً بالنسايم وارفة=كنّها ام ٍ خذوا منها صغار !
في ليالي المفارق : خايفه!= من يقدّم لها بعض اعتذار؟!
فـ الشجر شي كني عارفه=.قل خريف ٍ تحوّل لـ اخضرار
فـ الشجر لوسمحتوا! :سالفة=من على طاولات الما : تـُدار!
وحب ٍ آخر كأني شايفه!=وفي مدى اغصانها..ردّ اعتبار
سرّها الظل، يعني نايفة=قلبها العشق، يعني فـ ازدهار!
جيتها والمآقي طارفه!=وكان عصفور يسكنها، وطار!
قلت أحبك، وقالت: خايفة= وانحنى الصمت في روحي ودار
قلت وَ انتي لحالك! واقفة؟!= قالت مْواعد ٍ ظلي : صغـار!
المارون انشغلوا بالغياب والغِيبة!
وصرخت في وجهه كأني "خدينه"!=ضحك وقال بكبرياء وشقاوة!:
عطني سبب : واعطيك دمعي رهينة=عطني وله: واقبّلك من حفاوة
قلت: اصبر الحكي فصباح المدينة= تمر ٍ تعلـّق في ثنايـا القِناوة
خذ مني عيوني .. تراها (سجينة= فعيونك)ام الصمت والصمت خاوه!
انا انا شــك الغرام ويقيـنه=نصفي ضجيج ونصف بعضي هداوة
مثل الكلام ان مرّ بعده: سكينة= ومثل السما لحظة حنين وصفاوة
الجرح واحد كلنا خابرينه!=ماهو سبب خنجر رفيق وعداوة
أنت اعتبرني شخص ضيّع سنينه=وابعتبـر شوفـتـْك " غلطة تفـاوه!"
ومشيت كنّي ..ما لوجهي مدينة=ولاوقعّـت عقبي حمامة سماوة!
هذاك انا اللي كان بينك وبينه:=طـفـل ٍٍ تلعثم في شفاهه حلاوة!
العُمْر عود ثْقَاب!
قلت : الثقاب سنين!= قال : السنين ثـْقاب!
قلت : اشتْعل يومين؟= قال انطفوا أحباب !
قلت : اوقـِد : الحَنين= يالممطر الحطّاب !
الأرض بعض يْدين= والحلم مثل ابواب
والدرب للمقفين= برد وسهر واهداب
تحبني : وْبعدين؟= من يعشق الأغراب؟!
مرة سمعت اثنين= يحكون.. للغيّاب !
واحد تمّلا لين= مْن الدمع لين ارتاب!
وواحد ضحك ما بين:="صمته" وصوته شاب!
وفي شارع التخمين= تفّرقوا .. الأصحاب
كان اليسار يْمين=.وكان اليمين : اعناب !
ومشيت انا في حين=فجر ٍ يسيل احبــــاب
بردك.. يابوقلبين!= تشتاقه .. الأخشاب ..
وانا بقا لي سْنين=والعُمْر : عـْود ثـْقاب!
رجماً بالغيب!
.
.
1
تحت القصايد تندرج:= دمعة سبايبها مــَـَره!
طعنة صحيب ٍ ماانحرج=يطعن بظهري وظهــَرَه!
قلت ادخل القلب وخَرَج=خَرَج ولاجبت خْبـْـَره
فـ الحب حدّث لاحَرج= قليله أقسى مْن اكثـَره
درب الوله به مُنعـرج= وبعد انعِراجــه مقبـرة!
أحد سْكت و احد هَرج= و أحد سكوته ثرثـرة
سالت نهايات ومرج= عصفور من غصن شـْجَـرة!
يوصلك للسطح الدرج=إذا رقيته لـ آخــره!!
والحُب مفتاح الفرج=والدمْع عند المقــدرة !
دارت فينا الدار واحنا أوْلاد صغار!
سر !
في فمي طعم انتظارك..
في فمي: أشهى قصيدة من نهارك..
طاعن في الحب فمي!
شارب ٍ
صوتك بدمي
شارب ٍ حتى خَضَارك..
واتذكّر
كنت اقول لفايز :
ان الحب وانت صغيّر احلى مْن انتصارك..
قال : جايز !!
كنت اقول لوجهك المُغرم:
ياعمّي..
يا .. يايمّي
ياانهزامي في المعارك..
أنت لما تحبّني أرجع ثلاث عـْقود من عمري لحالي ..
أرجع أكثر للغمام..
أرجع أكثر للحضارة
أصبح الشخص المثالي ..
أصبح المُشبع بقرية فيّها : بيت الحمام
في حدايقها: سنونو
في ظفايرها: صباح ٍ جدّل انفاسه ونام..
في رباها : جنون و ..
في نسايمها : غرام..
وردها يشبه حَمَارك:
وشمسها تشبه سؤالي!
وقلت لحظة:
أنا طفل ٍ في يمينك
أنا خاتم في حنينك!
أنا طفل ٍ يوقظه عِشقك ونارك..
يغتسل لاقام من نعناع حبك
ويْتناول من رغيف امه ويخرج
فيْ انتظارك..
ساورتـْه ظنون ..وايقن من يقينك..
حدّثته احلام ..
قال: وتعّرى من الضحكة ويسأل:
أنا يؤرقني سؤالي!
انت حبيت الصغير الصبّ
وإلا مجنون الهوى
"عُمْرو مْازارك"
حديث السهارى !
تزاحموا يبغون ديرة ونسيان= أحد ٍ ضَحَك واحد ٍ يخاف المقابيل
كانوا يقولون الغلابا فـ الاوطان=أكثر كثير مْن السهارى ورى الليل
واحد سأل واحد: وش الخوف يافلان؟=فلان قال: الخوف مثل المواويل!
جاوب أجابة غامضة كلها الوان!=ضحك هذاك وقال مثل : المناديل..
و
.
.
.
وقلت اني حكيم بكلمة مامنّها حكمة ..
تمادوا في الحديث : الطاغي المُثخن بضحكتهم
وقفت وفي يدي فنجالهم
والصمت: قهْوتهم
ضحكت ..أكثر من اللازم
سكت أكثر من الحازم..
تحدثت بحنين ٍ
هزهم واستاق دمعتهم..
وكان الصوت: يظما
والحكي زمزم..
تحدوني وانا اتحدى جمود ٍ من جدل هارب!
وقلت:
الخوف ..
وهم يتّلفتون لبعضهم وافواههم: فمهم ..!
وقلت :
الخوف..
وكأن الدهشة البحر فنواظرهم وانا القارب
وقلت الخوف
رجل ٍ
راح يروي وارتوى
لكن ترك حبله على الغارب!
كيف كان أبوك يشبهني!
تكذبين
أنتي ودك تكذبين ..
فكذبتين ..
وقاطعتني! :
أنت عِشق ٍ مرّ في صوتي ببهجة
أنت لهجة
أنت
يابن الصمت مُهجة..
قلت: ويديني على قلبي ياعليا: تكذبين!
وقاطعتني:
أنت شاعر علّم النسيان وش معنى التذكر
أنت سكّر!
أنت تشبه وجه ابوي اللي قبل عامين وافته المنايا..
قبل مايدخل معَ ابواب الحنين
قلت: يمكن!
وساورت دمعه هدبها!
قلت : ممكن؟! :
أختصر كل السنابل والمناديل فيديني؟!
قاطعتني:
أنت ماتدري عن اثنين ٍ مشوا في بحر ليل
غيّبوا مثل الكلام اللي يغيب بشفةّ اللي ساكتين!
قلت:
عادوا؟!
جاوبتني:
عوّدوا ماهم اثنين!
قلت: ويـنـ....
وقاطعتني:
ياحبيبي أنت واحد من ثنين..
واركضت مثل الطهارة في خفوق امي، وانااا اندهـ:
يا يا ياعليا
أرجعي لي ..
أرجعيني!
أرحلي بي ..
أرحيلني ..
علّميني كيف كان ابوك يشبهني وانا رجل ٍ حزين ..
غيرة أطفال!
صغَار كنّا نتَحَدّث عَنْك للزّعفَران= لين سَالت ثَلاث أحلام فكفوفنَا
قلت: يامحمّد أطوَلهَا مِن العنفوان=قَال : والعنفوان : يشَابه ظروفنَا
قلت : يدها هَزِيمة عُرب من تُركمان=قال : لو مَا هَزمنَا الخْوف يا خوفنَا !
قلت : فَمهَا قصِيدة حبْرها "الدِّيرمان"=.قال : فَمهَا تجَذر مِن وَرى جوفنَا
قلت: نعنَاعهَا المَخْبوء خَلف الحَنَان=قَال : وإلا الحَنان .. اشبه بمصروفنَا!
قلت : أحب أكْره الدُّنيا مَادام المَكَان=مابَعَث عطـْرها .. يا ما اطول وْقوفنَا
قال ـ ويديه تَلعب في الرَّمل ـ من زمَان:=ودك تشوفها! ..ماودي آشوفها !
قلت : والغِيرة الصَّفرا تشب الزَّمَان=ليه تجْحَد علِينَا بَعضْ مَعروفنَا
أشْعر فْبَرد يامحمَد ويَاس وجِنَان!=وشي مِن درب مشّانا عَلى كفوفنَا !
كَاس مِن بُرتقال!
لوماورى الليل صبح ولاورى الصبح ليل= هذا حنيني .. حنيني أطول مْن الليال
قصير هالحب والنسيان دايم طويل=قصيرة الناس والأحلام دايم طْـوال !
ياجامع الزعفران بقهوتك هاك "هيل=شِعري قبل تْسكب دموعك قراح ٍ زلال
سيّلت لك دمّ قلب ٍ نابت ٍ به نخيل= وإن جف تفكيرك التفكير لاجفّ سال!
الناس تجهل وش الممكن من المستحيل=ويحسّبون الأماني شي ماهو خَيَال
يومننا صغار مثل الورد بين الخميل=نمسي على ضحكنا بين الصحو والخْيْال
قالوا: لنا ماتميل الأرض قلنا تميل=وملنا لكذباتنا .. والصدق للكذب مال
لكنهم علّمونا عن كريم ٍ بخيل=كريم بشعوره الأعمق شحيح الوصال
قلنا: هو الدمع، قالوا لأ..قلنا : جميل=وش رايكم بالسكوت المُر ..قالوا : مُحال
قلنا : الوطن .. لاتكاثرنا عليه القليل=وكثر فالارواح ..قالوا لأ .. قلنا : احتمال!
طيّب وليل السهر؟ .. قالوا: السهر والعويل=يمرّك بكل ليل .. وحالك إن مرّ حـال!
قلنا: الصبر..قالوا: إن الصبر صبراً جميل=ماهو الصبر ياصغار. "الليل والصبر طـال"
لكن اْبراهيم قال : إن السؤال القتيل= قتل ثقافتنا .. بلا ثـقافة قِـتـال
قالوا: ياسهل السؤال الصعب يا بوخليل=جاوب ولا تترك الغارب عليه الحبال؟!
قلنا: المطر..كان دغدغ وجه الأوطان سيل=وهزم جفاف القلوب أم الظما والرمال
قالوا : خطا،... والإجابه ركضها ركض خيل=بين الضلوع النحيلة .. قلت ممكن : سؤال
"اتفضل"..:وقلت : هذا الشي من سلسبيل= قالوا: سؤالك خطير، وقلت: بـ اضرب مثال
قد مرني قبل عشر أعوام عابر سبيل= وناديت له من يقيني يا يقيني : تعال
هزمت به كل دمعة في دروب الرحيل= وصبيت له من وريدي كاس من بُرتقال
تنعنع بصوتي الأخضر وبالزنجبيل=ونبت على روحي مْن يْديه زَهر وسِلال
واندهشوا أصحابي بجنبي، وصوتي يسيل= لين امتلوا من كلامي .. عن فراغ المقال
كان الجميع يتخيّلني مثل ماتخيل=البدو بَرق ٍ بَرَق غَرب ورعوده شـمال
سْكّتْ بُرهة وقلت أشب راس الفتيل= وأجاوب إجابة ٍ ينفض منها الجِدال
سؤالكم مهنة ٍ علّمتها ألف جيل=مرت بوجهي .. وانا ماني بمرتاح بال
هذا هو الشِّعر مال للشعر غيري نحيل=حبست له فاصعبي كل المطر والجمال
أسبح بليا مجاديف فبحور الخليل=وأنا ما اهيب البَحَر ولاصعود الجبال!
ماهو غرور الغرور فكل قلب ٍ غليل=وأنا معي قلب ٍأبيض .. أبيض ومايزال
قالوا نعم، قلت : ـ وأصوات أخويايه نخيل= أنا الإجابه .. وأنا منكم .. وأنا أصعب سؤال!
قصيدة مؤجلة!
قبل ليلة تعلّمـت الكَـذِب مـاادري=تعلّمت الكَـذِب فـي ليلـة الفرقـا !
أحسّ أن السهر مـا يشبـه لعمـري=أحسّ أن الشْجَـر ماتسكنـه ورقـا
أحسّ أن الحنين أليَـا غـدا كبـريي=خاف البَحْر لو ما صاحوا الغرقـا
دخلت لدنيتي..مـن دنيتـي عـذري=غريب ٍ شاف كل قلوبهـم : زرقـا
يخافون القليل، آخاف مِـن كثـري=يخافون النزول، آخـاف مـا أرقـا
أنا الهارب، أنا الخايف، أنا شِّعـري=مِنَ أحبابي، مِن أعدائي، من الطرقا*
وطاحت ضحكته صدفة على صدري=ورحت أركض ورى ظله مِنَ الفرقا
تابو مُحَرَّم!
ف الــشـــارع الـخـلــفــي = مضـيـت لـلــي كـــان!
حــيــاتـــه بـحــتــفــي =وحتـفـي عـلـى البـيـبـان!
وشــبــاكــه الـمــطــفــي =يـكــلّــم الـــجـــدران
عــــن دمــعــة بـحـرفــي =وغيـمـة مطـرهـا الـــوان!
يـتــكــحّــل بــنــزفـــي =وثـيــابــه الـحــرمــان
يــقــول لــــي يـكــفــي = وأقـــــول بـالإمــكــان
صـافـحــتــه بــكــفّـــي =وصـافـحـنـيْ بالـنـسـيـان!
أقــفــى، وأنــــا مـقــفــي =نـسـى وأنـــا ف احـيــان
أهــــز لـــــه كـتــفــي = حـيـرة وبـعـض احـــزان
والــظــاهــر الـمـخــفــي =عـشــق ٍ خـفــا ويــبــان
ورجـــعـــت يـانـصــفــي =.أدوّر (.......)
لــلــشــارع الـخــلــفــي = الـلــي بـــلا جـــدران!
تعب راحة!
تولد الحكمة الكُبرى من التجربة= من غريب الكلام اللي زمن : مختبي
قلت ـ والشِّعر ما جاني كذا موهبة ـ:= الحزن قد نزع بالكاد دمـعـة نَبي
أيه يالأرض يومي كان ذي مسغبة=يوم هزّيت نصف الحيـرة بمنكبي
تشهق الريح في الشباك وتعذّبه=قلت من شكّي المبني : إذن بسببي!
ياوطن (من خذا صبره على مقربه= من يقينه) خذا شَكّه على ما يبي !
يوم ليلك هوى من نظرتي كوكبه=عاد مرّك صباح المنتظر، مُر بي ..
وشهو الشِّعر لولا غفلة المنتبه؟= وشهو الصمـت لولا كلمة تختبي
والغبي يوم مَرّ الكلمة المُرعبة:= قال : أغبى قصيدة، قلت : تبقى غبي!
ماقراني سوى من هزّ لي منكبه=وراح يبحث عن النسيان بين كْتْبِي!
وقارئ فتّش بأبياتي المُتعبة= عن بقايا تعب راحـة، لقاه تْعَبي!
وقارئ غازل أحلامي وأنا أرتبه=وبعثر سنيني الحلوة على مكتبي
قلت: يا بارد أوراقي بقى تجربة=اسكن مْن الشتا، بعد الشتا فـ حْطبي!
« آخـــر الـــمـــشـــاركــــات »
19-Jun-2008, 02:18 PM
ديــــوان الـــشــاعـــر المــــبدع: بــنــدر بــن مــــحـــيـــا
العرض العادي
