ياسعــــــــود قله ترى ماللجـــــفا داعـــــــــي.......؟

[ابراهيم الزراقي]

هذه ابيات جديده اتمنى انها تنال على اعجابكم وترقى بمسامعكم

البارحه يوم كل الناس هجاعي=ياسعود عيا لذيذ النوم ياتيني
ماغير اهوجس وطول الليل انا واعي=أصارع الهم والعربان ممسيني
من ضيقتن كامنه في داخل أضلاعي=تلوف قلبي وتجري مع شراييني
خلتني اسج وانسى درب مرجاعي =وأتوه وامشي مع دروب المقفيني
بسباب من راح مانشد عن أوضاعي=الصاحب الي رحل ماشافته عيني
روح وخلاني لحالي مع أوجاعي=آسامر نجوم ليلن ماتقديني
روح وأنا من بعد فرقاه منلاعي=وهمومي أكبر من هموم المساجيني
والحزن في خافقي مصياف مرباعي=والجرح ينزف ولابه من يداويني
ياسعود قله ترى ماللجفا داعي=وشلون يقوى يابن عمي يجافيني
وشلون يتركني من الهم منصاعي= وهو الذي حالف إنه مايخليني
مايدري أن العمر من سبته ضاعي=وأني من الهم مدري وش عناويني
ولايدري ان الزمن ياسعود خداعي=له وقفتن واضحه بين المحبيني

مع تحيات... ابراهيم الزراقي