قصيده في الشاعر فلاح المورقي

[ابراهيم الزراقي]

بسم الله الرحمن الرحيم

اتمنى من جمهور الشاعر فلاح المورقي الوقفه الصادقه معه في برنامج شاعر المعنى فالحلقه الجايه ومثل مايقولون جاء وقت الجد والله الله بالتصويت اذا ماتأهل بالشاعر الذهبي واكيد مايحتاج وصاه ياربعي وهذه قصيده مني للشاعر فلاح المورقي متواضعه اتمنى انها تنال اعجابكم

راكب الي لامشى يسبق نسانيس الرياح=الصحاري ماترده والخطر مايمنعه
جيب لكزس منوة الي طول عمره ماستراح=ماتريح من همومه فالفصول الاربعه
لاقفاك وراح مقفي من على صمدن براح =ماتشوف الا غباره والهبايب تتبعه
ولانطحك وجاك مقبل مثل مطلوق السراح=مايشوف الا هله بعد السنين الموجعه
ولاوقف بين المواتر مثل خفاق الجناح=لاطلع في مرقبن محدن يحاول يطلعه
وكن لونه لانكشف لون الليالي واستباح=خد غرون رافعن بين العذارى برقعه
والمراتب والكفر والنور تعطيك انشراح=جل ربن خالقن فالناس ناسن تصنعه
مركب الي طول عمره مايعرف الا النجاح=تاجرن ماهمه الا كيف ماله يجمعه
ماحسب هم الليال ولاطلب غيره سماح=من هواميرن تخفظ السوق نوب وترفعه
مانلومه لن شراه بحر ماله ثم راح=مع ديارن كل ماحل الربيع مربعه
ومانلومك يانديبي في مساء ولا صباح=لاسهجته فالديار الي بخير ومرجعه
مير كانك عازم وحازم وناوي للمراح=خذ رسالة شاعرن مر الليالي يجرعه
ودها يم الصحيب الي ورد عدٍ قراح=وارتوى واروى معه كل النفوس المقطعه
شاعرن مبدع وشرف ديرة عيال الصباح=ديرتن فيها الادب والشعر لاقي مرجعه
مورقيٍ من عتيبه والاسم يدعى فلاح=والله وسبعين نعم بصوت كلٍ يسمعه
يانديبي قله انا معه مافيها مزاح=والله اني ما ابالغ يوم اقول انا معه
درع جنبه محتمينه بالسهوم وبالرماح=صف واحد مايفرقنا زمان المعمعه
صف واحد ندعمه ونضد خصمه بالسلاح=لين ياخذ سيفه الي في عسير ويرفعه
وادري انه كفو للمعنى وضاري بالوشاح=يلبسه يوم ان غيره كل حاجه تقنعه

مع تحيات ...ابراهيم الزراقي

[عــ الد ـــيـــ لبحي ـــد]

بيض الله وجهك على القصيده ولاتوصي لعيون فلاح الرصيد مفتوح يا الغالي

[وافي الخماش]

صح لساانك يالذيب وبالتوفيق لأبو خالد ..

[/عبد العزيز الجذع/]

صح لسانك..


وبيض الله وجهك...



وبالتوفيق لفلاح....

[ابو فايح]

قصيده رائعه جدا ويستاهل ابو خالد

التوقيع

عالم تويتر abofayeh@

[فيصل المسعودي]

صح لسانك

قصيدة طيبه في شخص يستاهل

نسأل الله أن يكون التوفيق حليف أبو خالد

تحياتي

[فهيد الايدا المورقي]

الله الله الله


صح لسانك على القصيده الجزله


ونعم والله يالزراقي نعم الرفيق


والله يوفق فلاح المورقي

وحنا معه باذن الله


وعتابه كلها معه


تحيتي

[عبدالله الجـــذع]

الزراقي

الإبداع هو دائما مايتواجد في متصفحك
صح لسانك مليون ولاهنت
وفلاح يستاهل كل خير
وحنا معه ان شاء الله

محبك

,’

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[رمح برقاا]

يستاهل الشاعر فلاح الموررقي واتمنى له ولشعار عتيبه كل التوفيق

[ابراهيم الزراقي]

الله لايهينكم على مروركم الجميل