طرد الهوى ما عاد لي مصلحة فيه

[المعتصم بالله]

طرد الهوى ما عاد لي مصلحة فيه=تريحي يا نفس ثم ريحيني
بان التعب فيّه وبانت مواريه=من شافني ردد علامك حزيني
قلت اتركوني ما تفيد المشاريه=هرج العرب ما ابغاه هزل وسميني
ضاع الامل في صاحبٍ كنت هاويه=لا وحسايف كيف خلي نسيني
اقفى ونفسي تنتحب له وترجيه=واعلن قرار البعد يا شيب عيني
ما يدري ان البعد ماني بقاويه=وشلون وحب حبيّبي محتويني
يا ليته يراجع قراره وينهيه=والا يقول ارجوك لا تحتريني
ان كان يبغاني انا دوم باغيه=معطيه عنواني بخط اليميني
والا يروح وجعل ربي يعافيه=ويلقى من الخلان خلٍ عويني