بسم الله الرحمن الرحيم
مساكم الله بلخير جمعيا
اضع بين ايديكم دايون الشاعر عبيد بن بريكان اللاصوم الدغيلبي
وأتمنى أن ينال على رضاكم
صورة الشاعر / عبيد بن بريكان اللاصوم الدغيلبي العتيبي
القصيدة الأولى : مرثية في المرحوم / مرزوق بن ماطر الدغيلبي
البارحه عيت عيوني تنومي = وليا جفاني نوم عيني جفيناه
كنه يلوج بموق عيني هزومي = وأسباب سهري من رفيقٍ فقدناه
أخذت أسرح ثم أضوي همومي = وليا جلب في السوق هم شريناه
من يوم ما فارق يمومه يمومي = ياصعب فرقا مثل مرزوق صعباه
طبيب طيب مهندس فالسلومي = طلق الحجاج اللي بشوش محياه
لآجله بكى مرداس ساس القرومي = مذور لو صبي عينه نثر ماه
معذور لو انك تشق الهدومي = وجميع مايستر عراء الجسم رماه
الله يلوم اللي لمثلك يلومي = يلومك اللي ما مشى ربع ممشاه
ستر العفايف زاهيات الرقومي = ماهوب درن دسعته في دناياه
وعلى القصيره بالردى ما يحومي = مأمون جانب نادرات سجاياه
ولاغاب واليها يسد اللزومي = يرفى خمال الجار والبيت يرعاه
وعن السفايف والوضيع محشومي = ولافيه رجم كايد ماتعلاه
رجل الحموله والقبيله عمومي = واليا عطى مايوم من بعطاياه
لا وأجملنا اللي بحمله يقومي = ينهظ بحمله لو أيدينه مثناه
ولاشِق جيبه يوم فتل الكمومي = وعلى الرفاقه ماتهدد بعجراه
واليا زمو له نايدين الخصومي = يكسر نعفته من بعد دوس علباه
لو ينفدي بالمال والله لأسومي = ولو ينفدي بأرواحنا كان نفداه
لكن وضعٍ للحكيم محكومي = وما شرعه من كون الكون نرضاه
حطوه في قبره عليه مختومي = والله يأمن وحشته وسط مثواه
يسقي ضريحه صادقات الوسومي = عسى السحاب الغر قبره توطاه
عليه مزهرة الزماليق تومي = ياليت ينهظ ساعة ويتنشاه
ياموت ما صديت يم الرخومي = وأنته تمره بالطريق وتعداه
عيال الرخوم مرفعين الخشومي = لوكان مايسوى خروف ولد شاه
تختص ليث بالصفوف معدومي = اللي ليا جت ساعة الضيق نلقاه
عن الردى مترفع للنجومي = فوق الكواكب له قصور مبناه
وأن كبرت القاله قوي العزومي = ياسعد من جاله من الضيم ينخاه
من دون حقه فالمواقف هجومي = ويحاسبه عن غلطته كف يمناه
عليه أجاوب من عوى فالرجومي = الجوع حده والضرايا تحداه
وانعي كما الورقى بليلي ويومي = واقنب قنيب الذيب لا طال مسراه
يالله يلي في عباده رحومي = عساه في الجنه مقره ومأواه
تجبر عزاء اللي من فرقاه كظومي = فاجئتهم الايام باحزان فرقاه
القصيدة الثانية / وصية إلى أبنائه
الا يا حمامه جاوبيني وانا بجيب = اخفف عنى صدر تواصل تنهاته
انا البارحه ما امسيت واجاوب غليث الذيب = مغير اتزفر وارخص العين عبراته
اليا زل نصف الليل لي في الفراش نحيب = مابين الحنايا تصفق امواج وناته
انا اسهر بليلي لين كل النجوم تغيب = واعد الثواني والدقايق وساعاته
نهار الموادع ياعيالي علي صعيب = تحطم ضلوع الصدر من قو زفراته
جروح الضماير حاير فيهن الطبيب = تعذر علاج القلب من قو صدماته
انا والله اني جاهل في خفايا الغيب = وانا ادخل على الله من زماني ولوعاته
توادعت انا واللي لهم فالضمير مجيب = نوادر حرار تاج راسي وفزعاته
حزامي عضودي لاتنكر لي الشريب = توطا على خشمه بعد كسر جمهاته
دعوهم على اللي في السفر سيرها ترتيب = من فوق السحاب الغر ضفة كفراته
تنصو ديار الكفر عبادة الصليب = يبون المعرفه ماهدفهم دياناته
الوح بكفي في الموادع وانا عطيب = وزمان المصايب خاف غدره ونكباته
عسى الله يسمح دربهم كاسبين الطيب = ويعودو لابوهم بعد تحقيق رغباته
طريق المراجل والرجوله تراه تعيب = وبسيط على اللي يسمع العود ووصاته
ابنخي عيالي عز ابوهم عسى ما اخيب = تغوص المحيط وتنتزع منه داناته
وتبعد عن الشبه وتهجر طريق العيب = وتحافظ على مبدأ الشريعه وعاداته
بوصي عيال العود لطامة الحريب = ولاحاش المراجل من تلذذ بشهواته
نصيحه من اللي كل راسه ودقنه شيب = ولابه مسار مع هل المرجله فاته
وصية محب كامل العرف والتجريب = حريص على عرضه عن اقوال شماته
القصيدة الثالثه / مشاركته في مزاين قبيلة عتيبه
بسم القبيلة كلها صغار وكبار = وشيخاً حياته لجل ربه نذرها
متعب طويل الباع في كل محضار= لا كبرت القالات ينطح نحرها
وربعه حزامه يوم زوغات الأبصار= زحول الرجال ليا تنكر دهرها
كسابت الطالات وافين الأشبار = وأميرهم من دونهم مختصرها
لو كان ما تملك من المال دينار = القل ما وقف عزوتي ما شقرها
في الموقف الغصاب والقل تجار = هل كرمة دايم تناطف السفرها
تهلي بكم أعداد هتان الأمطار = وعداد ما هلت سحايب مطرها
وعداد ما يكسي من الريش الأطيار = وعدد حروفاً في الصحافة نشرها
وعداد ما خط القلم فوق الأسطار = وعدد من يقرأ الحروف وعبرها
وعداد ما ضمت محيطات وأبحار = وعداد ما يشطاء مجري نهرها
وعداد ما تنعم طواليع الأشجار = وتعانقت جذور الورد وثمرها
وعداد ما هلت من المزن مدرار = سيل ٍ تطاما سهلها مع وعرها
بشيوخ برقا وروق ماضين الأذكار = أفعالهم في الكون كل ذكرها
قدر ٍ لكم ما ينتعبر بالأشعار = والله لو ألفين بيتاً سطرها
في أمجادكم مصقول الأفكار يحتار = لو هو شباب يشيب ماقد حصرها
وباللجنة اللي نظمت كل الأدوار = هلا بها في حلها مع سفرها
اللي تعرض للمتاعب والأخطار = لعل رب الكون ياقاء خطرها
ونحيي الشعار من كل الأقطار = وحياة من شرف حجر من حجرها
ومحضرين كل لؤلؤ و محار = ومعهم من الغبة نوادر أدرها
حنا الضيوف اليوم وأنتم هل الدار = وجودكم كل المشاعر عمرها
مقامكم فوق الكواكب و الأقمار = والأرض تاخذ نورها من قمرها
أنتم سلايل متعب الهجن ومهار = وكم كبد ممروراً بفعله سمرها
يعرف مقامه لا حصل موقفاً حار = كم سربة بالسيف الأرخم حشرها
اللي تزعم يوم وجه الدهر جار = والجار ذوقنا الأمرين ورها
شاور وفكر مع بعيدين الأنظار = وحدود خصمه لا تعند عبرها
وبعد تقرر بزغت النور محدار = بهيلاً تجاهل خصمها من سطرها
بهيلاً تهايل كنها موج وإعصار = وروس الخشوم اللي تزنعف كسرها
ونخبة رباعين لهم دور وأدوار = في ساعة كان الخصيم انتحرها
اليا اعتزوا من جد طلابة الثار = تبيع غال الروح في محتضرها
لا جاء نهاراً مثل معتق بالأقدار = والروس في حزم الدفينه زبرها
كـم أبــلــحــاً شــــرف الـــغــــار = وكم مهرة سردا بسيفه عقرها
بربعها نهار الضيق يهدون الأعمار = صديق عينك ساعته ما حضرها
زاحوا قبايل نجد يمين و يسار = وستاقوا اللي قدمها في نحرها
ناوين في الصمان مشتى ومصفار= مع ضف فرساناً تلامع الشهرها
ترعا بهم حد الخطر كل مشكار = بعد الهزل قايم يتطاير وبرها
تلقط زماليق الشقارى في الأقفار = مع الريم وشافوا للحبارى أجررها
جايلها وقت الــبــراديــن نــــوار = أقواس ترسم من طبيعة زهرها
ما كنك ألا وسط دكان عـــطار = ريح الشقارى والشمطري ذعرها
فيها أم سالم ترفع الصوت مزمار= لا سمعها المشحون فيض أعبرها
ماربها اللي حط مرياع و حمار = والأمير بين العجول و بقرها
مدهال قطعان يشوقن الأنظار = كن الرجوم أمسمره في ظهرها
يدفع لها المقهور والطيرماطار = والسبر في راس الطويلة سبرها
وقدامها في كل مترس ومحكار = بصنع اليهودي حافظين نظرها
وخزام صدر له مراسيم وقرار = وأهل الفعول الناقصات احتقرها
ماياخذ الفنجال من بن وبهار = ألا بفعل تعترف به جبرها
وأيضاً الثنيه لا تشباء ولاصار = ألا رباعاً كاملة في دجرها
لموقفاً ما تنقبل فيه الأعذار = ربعي هل الشرفاء تلقوا خطرها
ربعاً تجازي صاحب الشر بشرار = حتى عدل عن كلمته ماعتبرها
واليوم شرع الرب دستور وشعار = من يوم أخو نوره علينا قصرها
وانجاله اللي للوطن درع و ستار = أملوك الجزيرة برها مع بحرها
حطوا لنا في الكون قيمة ومقدار = نرمي لهم فوق المنابر أغترها
القصيدة الرابعه / قيلت في ابناء الشاعر اثناء دراستهم الجامعيه في مدينة القصيم حيث انهم كانو يأتون اليه مساء يوم الاربعاء ويعودون مساء الجمعه وهاضت قريحه الشاعر بهذه الابيات
البارحه يوم الخلايق هجوعي = الذيب جاوبني وانا الذيب جاوبت
وكلا رقد واناعلى راس كوعي = ياما وياما في فراشي تقلبت
اخذت اصارع عبرتي والدموعي = واشملت مع بحر الهواجيس واجنبت
وطاوعتهن غصبا على غير طوعي = وشرقت مع مركب فلكهن وغربت
يلوعني من جور الايام لوعي = وعانيت من جور الليالي وجربت
ورجلي على روس المراقي تبوعي = مابه طويل الا على راسه ارقبت
اروم راس العاليه والطلوعي = وانا على درب المصاعب تدربت
وعلى الوفاء والطيب حرصا طموعي = ماهمني لوكان لجله تعذبت
وافرح الى قالوا مسانا الربوعي = واكره الى قالوا ترى بكره السبت
موعد وداع نادرين الطبوعي = اللي لهم في نهج الاخيار رتبت
لحظه وداعي للحبايب تروعي = لاجيت اوادعهم بعقلي تقضبت
ولولا فوادي ماسكاته اضلوعي = ضاع الفواد وصرت لفوادي اذهبت
ودولاب صدري من زماني امزوعي = وامسيت اكابد جور الايام وانصبت
وانا ترجى من عيالي رجوعي = هلا عدد ماساق في الارض من نبت
يامرحبا يغلأ على الارض دوعي = الى اقلبوا وقفت طولي ورحبت
ياعز صوت ايداعبنه اسموعي = واعز زول بين الازوال خاطبت
وجودكم في البيت مثل الشموعي = تكهرب المنزل وانا ايضا تكهربت
والبيت ريحه ورد من كل نوعي = ومن السرور وبهجت الصدر غيبت
ياعيال انا بوجودكم طال بوعي = وانا احمد الله يوم ربيت ماخبت
انتم ذراي ومحزمي والدروعي = وانتم رصيدي والمذاخير لاشبت
وعزي لعود مايجيله افزوعي = ولاكل من ينجب يقول اني انجبت
ياحفاد ربعأ ينطحون الجموعي = تاريخهم في صفحة المجد بالثبت
من ماكر ماضم عشه اتبوعي = نوادر تعجبك لامن تكربت
من ماكر طيره قطوعا جزوعي = يعجبك فعله في اللقاء لاتحزبت
وترى اثمر من روس هاك الجذوعي = وان طابوا الانجال ياسيدي طبت
والعرق يسقى شامخات الفروعي = وانا نسبكم يابنا الاكرام عربت
ولاني على نسب الدويني خثوعي = لاشفت انا ماعفت من بعد جنبت
البارحه يوم القمر في الشفق غاب = سهران لين الصبح جاله اشعاعي
والدمع من عيني على الخد ينساب = ابكي على عمر مع الهم ضاعي
ياعيال ياللي فتلوا روس الاشناب = وقدامكم ياطن روس الافاعي
اللي لكم تخضع عنيدات الارقاب = ولكم على الخصم النكيد اندفاعي
والى مشيتوا خلوا القار مجناب = وقسو عليهن مع طمان ورفاعي
واخذوا معاكم زبدة العلم بكتاب = مما بقلبي ماحتملت الودعي
علما يرج المخ وشد الاعصاب = واخشى على الشريان منه انقطاعي
والى لفيتوا ديرة اصحاب وجناب = قصوا عليهم قصتي وانطباعي
في مجلسا راعية ماسكر الباب = كلا يجي للبيت من غير داعي
في بيت من له عندنا قدر وحساب = لهل الوفاء والطيب فيه اجتماعي
اللي لنار البن والهيل شباب = في القصر ولا في حصين الشراعي
وانا من اللي معجبا فيكم اعجاب = لكن وقت عبيد مايوم طاعي
وجينا نبي معكم سواليفأ اعذاب = تطرب لهن اقلوبنا واستماعي
وابعد عن التفكير هو راس الاسباب = للجلب الهموم اللي عليهن اقناعي
وشفنا رفيقي يشتكي بعض الاتعاب = عليت يا المنصاء طويل الذراعي
ياربع انا قلبي من الهم منصاب = ويلوعني من جور الايام لاعي
وانا جريح القلب من فقد الاحباب = بين العيون وبين قلبي نزاعي
ياماجرالي يعربين الانساب = طمنت بعد زمتي وارتفاعي
ومضيت ليلي بين زفره وهنداب = وكلا رقد وانا على الكوع واعي
ومن كثر ماعانيت انا عارضي شاب = وقتي طعني طعنتين اوساعي
وجضيت جضت من مكن رجله الداب = من حر مايونس عن الدرب تاعي
من سم صل في القدم مكن الناب = من غاسق الانياب للسم زاعي
واقنب كما ذيب على راس مرقاب = جايع ويدعي للذياب الجياعي
لوتدعي بالجوع ياذيب كذاب = وشلون جايع والعشاء في المراعي
قصدك لجلب الهم دفعات واسراب = وانا زبونه كان سرحان باعي
يالايمي فيهم يضيعن الاطباب = في القلب مع تاج الوريد امزاعي
يالله ياغافر خطأ العبد لاتاب = يارب تاقى عثرتي وانهزاعي
البارحه يوم القمر مبرهزا = أشري ذهب وأرمي التنك والبيازي
قيفان أصخرها على مطلع الزا = تصميم فكر ما يجيه أهتزازي
والعين كنه من منامه يقزا = والا يكسر في بردها قزازي
والقلب كنه نايشه نار قزا = ولا ينوشه من ازرق التاج غازي
ولا قلت جفني راق من النوم فزا = فز الوحش من رؤؤس هاك النوازي
أسبابها علم بنفسي يحزا = وأحس به بين المعاليق وازي
يا أهل الكروز اللي مقامه يلزا = من الوارد التالي حديث الطرازي
مشروبه الممتاز دفعٍ ومزا = مصممينه للوعر والغرازي
مجهزينه للطلب في أي حزا = مع قار وإلا مع فلاش وغرازي
لا أخذ ثقيل الترس ثم استرزا = يهوي كما يهوي على الصيد بازي
لاطاف نصف الليل دزوه دزا = داخل بلادك ما يبي لك جوازي
نصوه للي له مقام ومعزا = ذباح للضيفان حيل وغوازي
عدمٍ خصيمه لا تنصاه كزا = ولا رافق الدرن الحقير الخنازي
مطلق ولد نايف مقامه يعزا = مع أهل الوفاء والمجد والطيب لازي
شرواه عن مبداء الرذيله يخزا = صميدعٍ بفعول الآخيار فازي
مبداه لدروب المراجل يقزا = حلحيل ضلعٍ راسي ما يرازي
من رؤؤس قومٍ في اللقاء ما تهزا = رجالهم من ساسهم ما يهازي
راسي سواة طويق ما يستفزا = رجلٍ عزيز ومن رجال عزازي
قله رفيقك في الرفاقه يعزا = وقبلت في بعض الرجال التعازي
مادام حي ولا لنا منه عزا = فينا يطاوع كاسبين المخازي
قلته وأنا من عزوةٍ ما تلزا = هم تاج راسي وعزوتي واعتزازي
ولا يسحب انا صليب معه انتوزا = ندق في الراس العنيد ارتوازي
ماكر حرارٍ مارجن فيه وزا = تبعه على صيد الجزيلات فازي
رضع الوفاء من يوم هو في المهزا = تاريخهم معروف يوم المغازي
لاجاء نهار فيه للحصن لزا = لأفعال عطران الشوارب نجازي
ومن عادتي في أهل الوفاء ما اتخزا = لوكان للعايل عنيد إنحازي
ولألطم عيوني بالأصابع وأطزا = مادام ماني يالرفيق متوازي
بلعتها والكبد كأنه يجزا = ولاني لغلطات العفون إنتهازي
وكسيتها من فاخر الجوخ بزا = وفصلتها تفصال ثوب حجازي
ولاني بحبلٍ ينثني لو يرزا = وعندي على سلوم الرجال أمتيازي
قال الذي من حر ما أونس تبنج = لا عل ما فال الأجاويد فالي
من يوم صدري عن مساجينه أفرج = وصفقت بالكف اليمين الشمالي
من حر مابي بس أغيب وأسوهج = ياعاذلين عبيد مالك ومالي
يالربع أنا لي عدة ايام مخلج = من البيت والاحباب جالي جفالي
أصرف دموع كنها السيل لا دج = مابين لحلوح تضكه جبالي
ياعين يلي بازرق الدمع تزعج = وآخر نزيف العين دم زلالي
لوكان أنا من عبرة العين محرج = لاهاجت العبرات بين الرجالي
وأسبابها هم يخج الحشاء خج = اودع معاليق الضماير وصالي
هموم قلب لا أمسو الناس ترهج = هم عداء مع وحدتي وأنعزالي
تكفون يالظفران انا ودي أنهج = والوقت عكر لي مزاجي وبالي
نويت أسوق الرجل وأسجها سج = خايف يجيلي من جلوسي هبالي
بلاي من شي بصدري توهج = ما يحتمل قلب الخطاء ما جرالي
الله على بنز إلا منه ادلج = يمرس كما يمرس جديد المحالي
ياما حلا لافز مع خالي الفج = وابيع واشري فوق سيته لحالي
وحدي مع النفس الزعول أتهرج = عيت تجاوبني عليه سؤالي
غبر الليالي بالخديعه تدارج = اخذت عضيدي وأقتفاه ابن خالي
اللي عليهم ضامري بالآسى لج = لجت ذياب شرفن فوق جالي
غارن على مالٍ بعد شافهن هج = ودون العشاء عدوهن أهل الحلالي
طبع الليالي للأجاويد تسهج = ولانيب انا الأول ولانيب تالي
ولاني على ماقدر الرب محتج = لو الزمن من عادته ماصفالي
ولو العلاج يفيد كان اتعالج = والكل من ربعي يجيب الدواء لي
وانا علاجي كل صنديد ابلج = قامت تغززهم بنات الليالي
وجدي عليهم وجد من طاح فالعج = حالو عليه مسطرين العيالي
في موقف ماعاد له منه مخرج = فكن يدينه من ظهرها الحبالي
فاجأه عدم مر كبده تسهرج = مطلوب له من سابقٍ دم غالي
يمناه عند مواجهه رجته رج = من رؤؤس ربع يحتمون التوالي
ولو ضاقت الايام لا بد تفرج = وعد صحيح من عزيز الجلالي
| التوقيع |
في منتدى الهيلا زحول الرياجيل = بيت القبيله و النشاما إرواقه
يزينه حرصه لزين التماثيل = ويجمله نبذ العلوم الدقاقه
|
« آخـــر الـــمـــشـــاركــــات »
30-Apr-2008, 11:52 AM
ديوان الشاعر / عبيد بن بريكان اللاصوم الدغيلبي العتيبي
العرض العادي
