السلام عليكم ورحمة الله وبركاته :
هذه قصيده للشاعر : سهل بن نايف الكسر المرشدي .
تتميز جميع قصائده بالقوه والجزله التي من
خلالها تلامس شعور المتلقي .. وانا من اشد المعجبين بشاعرنا
(( سهل الكسر .. ابونواف ))
اليكم القصيده :
..
..
..
..
..
هات الـدلال ولـع النـار ياجـداع=عجـل عليـه ياعـدو الرخـامـه
هات الحطب ياجداع من جبر وولاع=جبـرة خشـب وولاع نـاره ثمامـه
وليـا غـدا للنـار ياجـداع شـلاع=وشفت الخشب منها تدانـى صرامـه
احمس من الخولا ن ياطيـب النـاع=لين النجـاض يبـين منهـا وشامـه
ودقـه بشامـي ٍ يجيـلـه تلـعـلأع=يصح النيام ليـا صحـا مـن منامـه
ثم هات لي صهب ٍ يداون الاوجـاع=اللي مـن الصالـي عليهـا سحامـه
قفز الغوارب والمقاضب والاكـواع=وبطونهـا ياجداع فيـهـا هيـامـه
لا وقفـن ياصـاح فيهـن تـرفـاع=وفيهن على جبر الحديـده ضخامـه
صهب ٍ مثاعبهن مهاديـف ووسـاع=وفيهن مثل حـد السيـوف استقامـه
سميتهن ياجـداع والاسـم ماضـاع=هيفـا وهيفيـه وشيـمـه وشـامـه
لاشافهـا اللـي للبغاديـد مــولاع=شوش شعر راسه وطـش العمامـه
ولقـم وبهـر ونتـبـه للتـسـراع=واحذر يجي بـك يالبناخـي غشامـه
خل المبهـر تهتـوش فيـه الانـواع=بيـن الشقـاره والحمـر والدهامـه
اضن هاجـوس القصايـد ليـا راع=يقـرب ليـا فـك المهيـل بـلامـه
ويحضر عيون الشعر موجدت الابداع=معانـي ٍ فيهـا طـراه وجسـامـه
تذكر الفايـت وتصحيـح الاوضـاع=حـب البـداوه والبـداوه شهـامـه
يامحـلا لا قيـل لسهيـل مـطـلاع=شافـوه تـال اليـل يلمـع زمامـه
من نجد يزمي فـوق نجـران لمـاع=شافـوه اهـل تثليـث وهـل تهامـه
وجى للهبوب من يمن الشرق ذعذاع=والعد عقب سهيـل راعـة جمامـه
وفزر هجير القيض واضفى له قنـاع=على السلم والسمـر مثـل العمامـه
والبل تلافت للجمـل وابـرد القـاع=وقامو هـل البـل ينزلـون العدامـه
والنار شفت الها مع الفجر شعشـاع=وقامو يحزمون الحطب في حزامـه
من عقبها خمسين ليـل ٍ لهـا اتبـاع=اليا بكـر الوسمـي ودلـى غمامـه
وجاله على ساقان من غرب ميقـاع=ويجنب ولا يملـك عريـق الثمامـه
ويشمل ليا القرعا وبير بـن هـزاع=والى رجـم بـذال يرخـي خطامـه
وليا نهمل ودقه ومزنه ضفى ومـاع=على قراء الصمان يبخـص سنامـه
لين النبات اللـي يجـي لـه تنـواع=يفراء الحـزوم ليـا تملـت محامـه
وضاقت مع المشقر زهازيم الاقطاع=لاجاك راعـي نجـد يدفـع جهامـه
بدو ٍ تبي المرباع ثـم جتـك نجـاع=وكل ٍ عصب في سلت السقس خامه
قامت عطايا الله تضيق بهـا الارواع=شول ٍ يازين مـع الحمـاد الدحامـه
اول معاشيهـم مشابـيـع وجـيـاع=وراحو علـى ماقيـل شـده وقامـه
وشفت العسوس جيوبهم تقرع اقراع=اللي مدح واللي قصر فـي كلامـه
مالـو علـى دار ٍ للبـواش مرتـاع=فيها يجـي لهـل الحـلال التمامـه
كل ٍ معه وايت وصنـدوق وشـراع=ونـار ٍ رمادتهـا سـوات الردامـه
وذبايح ٍ تشـراء مـن البـدو وتبـاع=وكـل ٍ تجهـز مـاتـرداء مقـامـه
خذولهـم قامـات ثـم قيـّل لـراع=عن ضهر الركبي يحـذف المسامـه
قـرو ليـا قامـت تمريـع تمريـاع=سـواء لهـم راع الكرامـه كرامـه
ثلاثت اشهـر كلهـا وقـت مربـاع=وقامه الين العشب يقـرب صرامـه
ولاقيل صيفي ٍ علـى نجـد تنـداع=كل ٍ صفـط عفشـه وقشـع خيامـه
تمزعـو مـن كـل جـو ٍ تمـزاع=بطرافهـم يكفـى المـدور يـدامـه
و راع الغنم مع دربهم شد ثم ضـاع=يطوي الشبوك وقام يجمـع رمامـه
ماعـاد يلحـق لاذراع ٍ ولا كـراع=الشـاوي اللـي در شاتـه طعامـه
ألي خذتلي مع مقدم البـدو مـذواع=فنا ماعـاد الحقـت نفسـي ملامـه
هاذي طرات العمر والوقـت خـداع=وغارات بقعاء مـاش منهـا سلامـه
وصلو عدد ماغرد الـورق سجـاع=على النبي وزكى الصـلاة الختامـه
| التوقيع |
للتواصل عبر twitter تويتر
al_bargawy@ |
« آخـــر الـــمـــشـــاركــــات »
08-Feb-2008, 06:03 PM
الشاعر : سهل بن نايف الكسر المرشدي
العرض العادي
