قصيدة للشاعر فالح بن قشعم الهاجري في عتيبه وتركي بن حميد - الهيـــــــــــــلا *** منتدى قبيلة عتيبة

عتيبي مطنوخ · 15-Jan-2008, 01:35 AM

قصيدة للشاعر فالح بن قشعم الهاجري احد المشاركين في شاعر المليون في قبيلة عتيبه

بيوت الشعر ما توفي شعورٍ حرّك الوجدان
وفاض به الصدر عقب الوساعه وامتلا شعيبه

كلامْ يوقّف المعنى على رِجلْ ويهزّ آذان
يِشيب اله الولد ويردّ حِلْم العمر للشيبه

وليه اكتم وانا ما الله بجابرني على الكتمان
بغتاب العرب لو فالشريعه تَحْرَم الغِيبه

سلام الله على روس العرب ولاّ على العتبان
صناديد الفخر والمستريب يموت في ريبه

لو التاريخ ينطق ما ترك لاهل اللسان لسان
ولا له غير برقا وروق تاريخٍ يهذري به

لو ان العزّ كان حصان لا يِعسَف ولا ينهان
لقيت أدنى صبي فعتيبه يودّيه ويجيبه

تساميّ يا بيوت الشعر عمّا يجرح العنوان
وهاتي كلّ مضمونه من عتيبه إلى عتيبه

على الشيخ الكبير اللّي صهيله يِفزع الفرسان
سلام الله ، عسى الله يحسن لمثواه ويثيبه

بكى له نجد واهتزّ الجنوب وصاحت الصمّان
على موت الكبير اللّي بقى مجده يماري به

قريته لين قلت الشان عقبه ما بقى له شان
حفظته لين قلت الشعر عقبه من يغنّي به

مواقف تركي بن حميد تقصر دونها الشيخان
لو ان المجد هيّن شفت كلٍ في مراقيبه

عتيبه قبل تركي شامخه وتزلزل الوديان
ومع تركي تلبّسها الفخر والمجد والهيبه

اليا منها اسكنت ماكنّ في مرباعها سكّان
لولا صوت النجر يكفي بصوته عن معازيبه

سلام لمن بغى السلم وتعوّذ من قذى الشيطان
وملجا لمن هموم الوقت تومي به وترمي به

وايلا من حركّوها ياقف المارد ويصحى الجان
تصلّي شرق واللي ما تصلّي به تصلّي به

وايلا من ثار بارود البنادق واحتمى الميدان
تجرّع خصمها مرّ الهزايم واشهب الخيبه

ولازالت على راس الشرف يرجح بها الميزان
من السيف المصقّل فالوغى لللجود والطيبه

حقايق واضحه والجاهل اللي يطلب البرهان
هذاك اللي الحسد خلاّه يسبح في عذاريبه

يجوز إنّه يبيع الما على اللي يحتضر ظميان
ولكن لا يبيع اللي يتصدّق من مشاريبه

هواي عتيبي وساسي يعنّز بي على قحطان
ولا باصله يشكّ إلاّ الوضيع اللي كشف عيبه

ليا من فاخرك من قال كنّا في زمانٍ كان
يكفّي يا العتيبي لو تقول إنّك من عتيبه

فالح بن قشعم الهاجري

آخر تعديل عتيبي مطنوخ يوم 15-Jan-2008 في 01:38 AM.

$ الوافي $ · 15-Jan-2008, 01:52 AM

صح الله لسانك وبارك الله فيك على نقل القصيده وإن شاء الله يتأهل ابن قشعم يستاهل والله

عمر الدغيلبي · 15-Jan-2008, 01:54 AM

صح لسان بن قشعم وبيض الله وجه

وهل القصيده قديمه ولا جديده يالذيب

التوقيع

عتيبي مطنوخ · 15-Jan-2008, 01:59 AM

لاهنتوا على المرور
والقصيدة قديمة

غازي البقعاوي · 15-Jan-2008, 02:16 AM

صح لسان الهاجري
وعسى الله يوفقه
والله ان ربوعنا من الهواجر بالشرقيه واجد ويرفعون الراس
ومشكور على نقل القصيده اللي تعكس صدق مشاعر بن قشعم
تحيتي لكم جميعا

التوقيع

قصيدتي ( برقا وروق عينان في راس )

http://www.otaibah.net/m/showthread.php?t=49814

شيلة مهنا روق وبرقا

شيلة سعود الدلبحي لقصيدة الشاعر الكبير
غازي بن عون الرويس

لمتابعتي بتويتر
Albagawi Ghazi@غازي جزاع العتيبي

ابو براك · 15-Jan-2008, 02:22 AM

صح لسانالشاعر

وبيض الله وجهه

محمد بن قميشه النفيعي · 15-Jan-2008, 02:45 AM

ليا من فاخرك من قال كنّا في زمانٍ كان

يكفّي يا العتيبي لو تقول إنّك من عتيبه

صح لسانك ولسان قايلهاا ولا زال الثناء يتجه الا اصحابه

بدون استغرااب

تقبلو تحياتي

محمد بن قميشه