}{! لاضاع فكري !}{

[بدر بن قرفان]

هذي القصيده ماخلصت منها الا امس

اوردها لكم وانشالله تحوز على اعجابكم


اقول:

لاضاع فكري وانقلب خاطري شين ** وقمت اتشوف في دواه وعلاجه

ثم صار راسي ملعب(ن) للشياطين ** وكلن يدور قبل الآخر خراجه

ماقام يطري غير سيد المزايين ** الي على بالي مروق مزاجه

جبرت فكري واوصفه بيت بيتين ** لو الوصف بيني وبينه عواجه

العين لو تنظره عين الشواهين ** يضربك برق(ن) لو نظرك بغناجه

والخد صبح(ن) شع درب المحبين ** لو شفت خده خل شوفك وهاجه

والعنق عنق(ن) ياصحيبي على الدين ** ياويش اوصف يانديبي لجاجه

والقذله الي واصله حد رمشين ** تعمي عيونه دون شوف المواجه

شعره سواد الليل زين(ن) على زين ** لمعت جديله مثل لمع الزجاجه

وليا زهق منه يحذفه على يمين ** ويلف طوله ثم يربط نهاجه

وليا تعب يتكي بجنبه على اللين ** ثم بان جسم(ن) مايعيب بحاجه

خصر(ن) مقوس تعترف به عناوين ** وانا اشهد انه مايرد الحداجه

والساق سيف(ن) يقسم الحجل قسمين ** مرسوم واتبين عليه انعواجه

افصح طريقه توصفه قول ثنتين ** (حلاه يقطر) ماذكر به هماجه

هو ماخذ(ن) قلبي بعد قرة العين ** والشوق لعيونه يزيد اندراجه

واليا على وصله نهاك المليعين ** قله صحيح وكل علمه سماجه

وانكث كلامك واتجه لاريش العين ** واسمع علومه ثم قلب حجاجه

لامن طلبته قال اهلن وسهلين ** ياعين ابوي ونبض قلبي وتاجه

لاصار خلك مثل هذا ونعمين ** يلطف بقلبك مايكدر مزاجه

وهذاك والله من سوا له ملايين ** وحبه بقلبي عاليات(ن) ابراجه

يفداه راسي والشعر والدواوين ** واسمه على صدري ينور سراجه

وسلامتكم


وودي اسمع نقدكم بكل صراحه وبدون مجاملات


دمتم بود



بدر بن قرفان.. .

آخر تعديل بدر بن قرفان يوم 11-Nov-2007 في 11:03 PM.