محاورة من النوع السياسي بين الشاعرين الكبيرين , مطلق الثبيتي وصياف الحربي رحمهم الله

[ابن مرغي]

السلام عليكم ورحمة الله يا إخواني الكرام ,,

يقول مطلق ( رحمه الله ) ::

السحيمي ينفض اللحية ويطوي في معمه
طار عقله من شليويح المطيري والزلامي

البعير اللي يشيل الحمل عود يرضع أمه
بعد قالوا شامخ النيبان مردوم السنامي


فقال صياف الحربي ( رحمه الله )::

السحيمي يوم غنى حطكم في راس كمه
ثم خلاكم عجينه كن مافيكم عظامي

الجمل يمشي على الدرب وكلامك مايهمه
من هديره قمت من نومك وحرمت المنامي


يقول مطلق ( رحمه الله ) ::

الزمان اللي ستر حالك وحالي لاتذمه
والحرم من دونه المسعى وبيبان السلامي

أنت داب كل ماحرك شدوقه سال سمه
والله إنا مانذوق السم يالداب التهامي


يقول صياف ( رحمه الله )::

أنت ذيب تكره البارود لو إنك تشمه
ماتحب النور الأبيض ماتحب إلا الظلامي

الطعام اللي ليا شفته على صدرك تضمه
لاتقول إنه حلال ولاتقول إنه حرامي


يقول مطلق ( رحمه الله ) ::

علموا صياف لايتبع خفيف الظل عمه
دام أنا وياه فالمذهب وفي الطرقة ليامي

قله إنا مانبالي اللي بنا نقال نمّه
بعد عود بايعة بين القبائل مايسامي


يقول صياف ( رحمه الله )::

أنت أشوفك كل ماتسرح تضوي لك مطمه
تحسد المسلم على دينه ليا صلى وصامي

لايزعلك الكلام اللي عسى ربي يتمه
ثم بده مستريح بلا شراب ولاطعامي


يقول مطلق ( رحمه الله ) ::

كل شئ في طريقك يا أبيض الشارب تخمه
لين ضيعت الفشق والبندقية والحزامي

إن نثرت القش ياصياف ماتقدر تلمه
وإن قربت من العرب ميسمك جوف النار حامي


يقول صياف ( رحمه الله ):::

لو يبي يتركك على باب الخزينه رحت يمه
وإن نظر لك نظره حمراء تعديت النظامي

المسافر مايطب البحر لين إنه يطمه
يذكر الله في بلد مكه ويلبس له إحرامي ,,

[محمد العضياني]

ابن مرغي

مشكور على نقلك المميز لهذه المحاورة لعلمين

من اعلام المحاورة الله يرحمهم ويرحمنا

ولكن يبدو لي ان هناك ابيات سقطت سهواً من المحاورة

ارجو استكمالها

ومنها بيت مطلق :

والله انك تعرف النقاش صواغ الازمه
هات خشمك كان يا صياف تبغاله زمامي

وتقبل تقديري

[الباتع]

مشكور وماقصرت . . . . .

[راع العليا]

الاخ الكريم ابن مرغي

شكرا لك على نقل هذه المحاورة وهي فعلا ذات مغزى سياسي كبير ابان حقبه معينه من الزمن ابدع فيها عمالقة الشعر واهرامه مطلق الثبيتي وصياف الحربي رحمهم الله جميعا

تقبل منى اجمل تحيه