مرثية في فقيد الوطن وقبيلة عتيبة

[راعي الحرقا]

مرثية في فقيد الوطن وقبيلة عتيبة
الشيخ / محمد بن عبد المحسن بن بدر المرزوق الهيضل
أحد مشايخ قبيلة عتيبة ، الذي وافته المنية في شهر رمضان عام 1425هـ بمستشفى الملك فيصل التخصصي بالرياض بعد عودته من العلاج من مستشفى هيوستن بولاية تكساس الأمريكية وبعد معاناة وصراع مرير مع المرض على مدى عامين .
(( مرحوم ياشيخِ فقدناه مرحوم ))
يالله يالمعـبــود ياحــيّ قـيــــّــــــــوم ... ياعـــالــمِ في برها مــــع بـحــــرها
اجبر عزا شيوخِِ بهم حزن وهمـــوم ... على فراق الشــيـخ ربي جبـــرها
مرحــــوم ياشيـــخِ فقـدناه مرحــــوم ... عســاه في الجنــات يقطـف ثمـــرها
عساه في الجنات مكـروم ومحــشوم ... في جنــــةِ عـليــا تجــارى نهـــــرها
حنا فقــدنا مقــــدم القــــــوم زيــزوم ... شيــــخِ ليـا مالـت علينـــــا قهـــرها
ياقف بوجه الضّــد لا ضــدنا خصـوم ... ليا كبرت الدعوى وقف في نحـــرها
لا والله إلا غاب نجـــــم من نجـــــوم ... نجــمِ على فوق النجــــــوم وحكـرها
الدار عقبــه غاشيِ شمســها غيــوم ... عــــزالله أنه غـاب عــنها قـمـــــرها
يبكيــــه شيخــان وفرســـــان وقروم ... وتبكي الضعوف اللي بجوده غمرها
ويبكيـه طفلِ توه صغيــــر مفطـــــوم ... وبيض العذارى اللي فراقــه ســمرها
شيـخِ نعت فرقــاه هضــــاب وحــزوم ... وتنعى "مغيراء"رجمها مع شجرها
وادي العبســه أصبــح بدمعــــه يزوم ... وسال " الدميــثي" من دموع نثرها
لاوالله إلا راح شيــخِ وشــغـمــــــــوم ... وناره طفــــــــت عقب لهايب سعرها
راع الشداد اللي قديــــمِ ومرســــــوم ... شــداد الأمـارة من قدايــــم سيـــرها
أمارتــه ماجــت بترشيـــح وختـــــوم ... أمارتـــه مرزوق لــ محسـن ذخــرها
"المعـتـرض" ليا قابل القـوم بالقــوم ... ليا لبّست قـب الاصــايل أشــهــــرها
ليـا جـاء نهـار فيـه مثـل هاك اليــــوم ... "صباح عاطف"يشهد اللي حضرها
وراع الشعيب وما مضى له من علوم ... محســن ولد مرزوق فعـلـــه بأثـرها
وسـهاج قال وصـادق القول مفهـــوم ... يوم الحريـبــــه محســن اللي أمـرها
"وبدر" بفعله صوب الخصم بسهــوم ... قاد الجموع وأسوار شقراء حصرها
فعـل الجــدود بماضـــيِ لــه من قــدوم ... تسـلــسـلت لـــه لين حـقـق نظـــرها
يشـهـــد لهـم تاريخ بالوســم ماســـوم ... صـدق الحقـايق مــا تخفـت ســررها
وتاريخ "بن غـنـّام" بحروف ورقــوم ... وابن بشــــر تاريخـــه اللّـي ذكــرها
وفي "درمة الحجاج" يدا لها رســوم ... وفي " عطفة الهيلا " قديـم خبـرها
ومرابـــط الخــيـل الاصـايل بمنـظـــوم ... مخطوطــة الباشا توضـح صـورها
وحتى الجناه أصبح به الوضع محسوم ... ماغـيـــرها يذكـر ولاحـدن عـبــرها
وللضـيف " هـدّامـه " بهـا كل مردوم ... تملا مثانيــها وتعـبــــى ســــفــرها
وقول" التميمي" واضح القول معلوم ... "ابن صقيـه" اللّي بقافــه نشـــرها
"والهيضلـــيه" باقـيــه دايــــم الـدوم ... لامات منها شـيـخ بقـى مـن عمرها
مـن لابتن توصف على دولــة الـــروم ..."عـتيبـــة الهيــلا" يدارى خطــرها
وقبايـله "منصـــور" للماقف تقـــــوم ... خـمـــــس القـبايـل وافيـات شــبرها
وألاد مفلـــح عـزوتن عــزها يدوم ... تبقـــى دعاجــــــين وفاها شــهـرها
والهيضـــلية باقيـــة دايـــــم الدوم ... وإن غاب نجــم، تبدي نجوم سـهرها

قصيدة الشاعر: ناصر بن محمد المعالى الدعجاني

[مرزوق حمدان العتيبي]

...
.
رحم الله الشيخ الهيضل
وصح لسان محمد ناصر
ولاهنت ياراعي الحرقا ..

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[الــعــضــيـاني]

الله يرحمه

وصح لسان الشاعر