هذي محاوره بين الشاعرين عبدالله الاعمى = وذيب الشمري

[رعد الشيباني]

الأعمى



مرحبا عند ربعي متعبيـن الخيـول
=قبل صقر الجزيرة يسس أركانهـا
آتخاطب بعقلي مـع كبـار العقـول
=وأعرف النار شعلتهـا ودخانهـا



ذيـب



البقـا يامتعبـت الفـرس والذلـول
=كـل ماوسعـو للخيـل ميدانـهـا
المعاني تردد بين الأربـع فصـول
=والقضية معـي مفتـاح بيبانهـا



الأعمى



مايشيل الحمول الا جمـال الحمـول
=مير لا تخلف الوزنـة وميزانهـا
بشرونا عسى جا للمشاكـل حلـول
=كل جيران تعرف علـم جيرانهـا



ذيـب



نعتني بالحديث اللي لفظه الرسـول
=والسراميد مانتعب علـى شانهـا
كل حية على الفتنة تـدق الطبـول
=بالعصات الطويلة نكسر أسنانهـا



الأعمى



صحح القول حتى نسمع اللي تقـول
=من عرف قدر نفسه صانها صانها
يازميلي ترا الدنيا طلـوع ونـزول
=لا تضيع الرعيـة بيـن رعيانهـا



ذيـب



أنت ويش إرتباطك في جنود المغول
=آنت مندوب ولا ضمـن فرسانهـا
والله إني من المعروف ماني خجول
=أعطي الناس حتى يكمـل إيمانهـا



الأعمى



لا تكثر علومك ثـم أقـول مهبـول
=أحتزم واحفـظ الحبـة ونيشانهـا
احتزم بي ليا ضاقت عليك السبـول
=هكـذا تنقـذ الديـرة وسكانـهـا



ذيـب



كنت مسرور جدا ً في وجود السيول
=مير الأشجار عيت تثمر أغصانها
أنت وش بك تغسل قبل وقت الغسول
=قبل ماتاضـع العربـان قدحانهـا



الأعمى



لا تقول البنـوك مقفلـة بالقفـول
=ثم يعـدى بهـا وتفـك بيبانهـا
الكسل مانحبه وأنت رجـل ٍ كسـول
=ماتطيـر الطيـور الا بجنحانـهـا



ذيـب



أنت رامي ولكن ماتقـوس التلـول
=كل الأهداف رميك يسقط وزانهـا
كان طولتها شرح القضيـة يطـول
=لكن إربط شروط العلـم باركانهـا



الأعمى



والله إني مبا عينك يجيها الكحـول
=لا تدور على القدحـة وصوانهـا
إنتبه للخروج اليا نويـت الدخـول
=واحفظ السلطنة لا كنت سلطانهـا



ذيـب



أكره أفكار رعيان المعز والصخـول
=دايـم أفكارهـا قـدام كرعانـهـا
أنت تقدر تجيب العلم حسب الأصول
=لكن الأرض ما ضمتك باحضانهـا

[فتى وادي الرشا]

الاخ/رعد الشيباني

مشكور على النقل الرائع للمحاوره وماقصرت

تحيتي لك