قصيده تنقل الواقع المؤلم اللي يعيشه كل مواطن عربي
ومن اجمل القصايد السياسيه اللي سمعتها
اخليكم مع القصيد
لاضاق صدري فالليالي وغنيت=قدت القوافي مثل تركي وراكان
وإليا فتلت القاف وابديت مااخفيت=صغت المعاني قاف مسحوب الالحان
ماقول انا فارس للارقاب قصّيت=ولااقول أنا كفّيت للناس بلسان
لاشك أنا شاعر وللشعر حبيّت=والشاعر يغنّي إليا صار طربان
وإليا غضب صل القنابل ابتوقيت=حربٍ على الانذال تمطر بالاطنان
وإليا مدح يمدح هل المجد والصيت=اهل الوفا والجود خطلان الايمان
عن رفقة الخايب والانذال صديّت=الحاسد اللي رفقته زود خسران
وفي دربها شبيّت قازٍ وكبريت=لوكان ماتسوا مشاخيط دخّان
ولاهل الكرم والجود والطيب خاويت= ربع مشو للدين فسلوم جدّان
هذا زمانٍ شتّت الناس تشتيت=واطيب عربنا يشجب ارهاب ماكان
ياغرب ياللّي بالحضارة تغنيّت=وش فيك تهضم لأبسط حقوق الانسان
شارون يقصف وامنٍ قاصي البيت=وانته شريكه ياغشيم المريكان
يابوش ماعمرّت يابوش هدّيت=هدّيت لكيانك بتكوين عدوان
يمكن تشاركنا مصالح على الزيت=وابعيد عن شاربك تهديد الاوطان
ثنتين مافيها امساوم ولوجيت=هاذي حقائق قالها لك اكحيلان
ادياننا وأوطاننا لوتماديت=من دونها ترخص للأرواح شجعان
والقدس عايد للعرب لوتعزويت=واسلامنا خاتم وناسخ للاديان
والنصر للمسلم لو أنك تحدّيت=هاذي حقائق ثابته من الازمان
واستغفر الله كل ماذنبت واخطيت=ربٍّ وعد عبده بجنه وغفران
الشيخ حشر عبدالمحسن بن حميد