التـقـاعـد !!!!

[ابـن نـعـيـس]

اليكم هذه الرائعه التي تحكي معاناه الدوام والارتباطات


للاسف الشاعر ما اعرفه

ليت منهـو وقـع اوراق التقاعـد=والاداره وافقـت والهـم زاحــي
استلـم كامـل حقوقـه والعوايـد=سلم العهـده وغـادر واستراحـي
ماينتظر حفلن تـوزع بـه شهايـد=وصـور تذكـار مافيهـا صلاحـي
اكتبواله نشكـرك خدمتـك واجـد=ونتمنـى لـك بدنيـاك النجاحـي
صار من عقب ارتباطـه يابوعابـد=حر مثل الطيـر كفـاخ الجناحـي
ماحداه الزام عن بعـض المقاصـد=لانوى لـه ديـرة شغـل وراحـي
واصلـن غاليـه ولربعـه معايـد=في أعياد الفطر وأعياد الاضاحـي
لا زمه يقضيـه وبكيفـه يواعـد=ما يراجع ريسه يبغـى السماحـي
لا اشتهى يرقـد تخيـر بالوسايـد=وان سهر ما هوجس بزام الصباحي
والهدف عند العرب ماهـو بواحـد=كل رجل له مـرام ولـه مشاحـي
من يبي يقنص عساه يعـود فايـد=فيه بالمقنـاص رزق وانشراحـي
لاذكر في صحصح نـزل وطرايـد=قال هيـا مايقـول الصيـد ناحـي
ومن تنيشط حالتـه جـدد بناهـد=ما فهق لجازتـه عقـد النكاحـي
وكان حاله ماش والا مـا يساعـد=ينسدح ويكثـر مـن الانسداحـي
وكان شفه بالسفر ماهـو بناشـد=في بلاد اللة مع السيـاح ساحـي
وخيرهم من كان في دنيـاه زاهـد=يطلـب الله بالثبـات وبالصلاحـي
بيـن مكـة والمدينـة والمساجـد=دايم دربه عسـى دربـه سماحـي
قايـم بالليـل للرحمـن سـاجـد=وكل ما نـادى المنـادي للفلاحـي
قلتها وانا اعرف ارضاء الناس كايد=ولاني بفارض على الناس اقتراحي
والوظايف جمعـت شتـى البدايـد=من جميع الناس مجنون وصاحـي
فيهم الطيب عزيـز النفـس راكـد=عـل يفدونـه مشافيـح شحاحـي
وفيهـم الانـذال والرديـان تاجـد=ـخمة دايـم سوالفهـم صياحـي
دايم وجه الـردي والـلاش بـارد=ياعسى يمحاه مـن دنيـاه ماحـي
والحظيظ اللي يبي يطلـع تقاعـد=دام به قـوة وقبـل يقـال طاحـي

التوقيع