يـــــا غـــلا هـــم

[نبض المشاعر]

الكلام احيان يعْجز يعبّر عن شعور
والشعور احيان ما ترجمه غير الكلام
حلـّها يا قلب مادام تغريك الكسور
المقام اصبح هو البسْط والبسْط المقام
مشكله لامات بعض الغلا بأقصى الصدور
الحياه تشوفها حلم بعيون النيام
الحضور اللي بلا قلب ما سُمِّي حضور
والمحبه بعْض الاحيان ما تعني غرام
هي كذا لا يمكن انك تمرّرها مرور
ليش تنهج منهج الضرب من تحت الحزام
صاحبي وانْ كان شفت الغلا دمعه حدور
لا تحمّلني دخيلك مشاريه وملام
مستحيل اكون في حسْبتك نقطة عبور
رتب اوراقك قبل لا توغـّل بالزحام
الهوى يبغا على الوصل له قلبٍ جسور
دام انا سلـّمت يا صاحبي ردّ السلام
وانْ تهقويت المحبه رياحين وزهور
لا تهقوى انّ الليالي يجافيها الظلام
يمكن انك تحسب اني على "بند الاجور"
وإني اجهل بالأوامر وما اعَرْف النظام
مير انا اميّز ما بين النواه مْن القشور
وأحْسب حساب اللحَم واحْسب حْساب العظام
وأعرف انك مَرّه تلف واحياناً تدور
وإنّ عندك لـَبْس بين المَعزه والهيام
لكن اللي صار يا صاحبي جعْله طهور
والله انـّه يبعدك عن دروب اهْل الحرام
بس انا حبّيت اترجم شعوري في سطور
يوم جا للعشق واهْله مقالٍ في مقام

وسلامتكم
اتمنى ان تنال على اعجابكم

التوقيع

دنيــــا ومــن يـــــدري كلــــ شــــئ يصـــير فيهــــا