معايده .. بقصيده رائعه للشاعر الكبير سهل الكسر

[الــوآفــي]

من العايدين يالربع

وكل عام وانتم بالف خير


وعساكم من عواده


قصائد الشاعر الكبير سهل الكسر جزله ورائعه ولكنها قليله في النت وقد لا يكون معروفا كما يجب

شاعر من كبار الشعراء شاعر صاحب نفس طويل لا تقل قصائده عادة عن خمسين بيت


ولكن هذه القصيده من قصار قصائده

رائعه اتمنى ان تنال اعجابكم

يافهيد شب النار مـع باحـة الشـوف = ترى حلات الكيف مـع فكـة الريـق
عان الحطب في ثنوة الدعب مجعوف =والما مـن القلتـه قـراح المذاويـق
أخذ الكريك وحـط للنـار مجـروف =نـار عليهـا يجلـسـون المطالـيـق
خل الخشب في ترعة النار مصفـوف =وادفق عليه القاز مـن فـوق تدفيـق
ولا جا لشعلتها تواشـي وعاصـوف=حط البريـق وفـرق النـار تفريـق
ومن ماركة بغداد قم هات لـي نـوف=عفـراً تنافـس بالبيـاض الغرانيـق
عفراً طويلة جيـد والوسـط ملهـوف=مكبوسة الغطوه على حلقهـا الضيـق
طويلة العرقـوب والخشـم معكـوف=جبـرة حديـده والجوانـب لواهيـق
من البكار العفر تاخذ لهـا وصـوف =وتاخذ وصـوف ملهفـات السماحيـق
تاخـذ لهـا منهـن مثنـاه وكتـوف =لوكان محرقهـا سنـا النـار تحريـق
والثانيه رسـلان والشكـل معـروف =والثالثـه رسـلان والرابـع بـريـق
واحمس لنـا بـنٍ شرينـاه بجـزوف =جابـه يمانـيِ عيـونـه بلاحـيـق
من شجرته من يم خـولان مقطـوف =مـن وارد الخـولان مافيـه تبريـق
خابرك انا يا فهيد فالشغـل شاحـوف =وموفـق فـي حمسـة البـن توفيـق
لا تنطل المحماس يا فهيـد فالجـوف =اخـاف يلحقهـا سنـا النـار بلحيـق
للنار جوف وجال وجنوب وطـروف =وللحمس يفهق صالي الجمـر تفهيـق
حفها على سمرِ شديـد اللهب حـوف =حتى تعرق من سنـا النـار تعريـق
ولا اندار لون الحب ثم صار مشيوف =جاللنجـاض ابهـا صفـار وتراميـق
قم صبهـا بمبـردٍ عـود وسعـوف =مقمـرٍ عـوده يجـي لـه تبـاريـق
ثم هات لي نجر كما الطيـر مكتـوف =وقفـة نــداويٍ يـتـل المسابـيـق
اطول من الرسلان يوم انهـا وقـوف =ليا ناشها المهوى يجي لـه تصاعيـق
ولقم وبهـر واودع الهيـل مدغـوف =ومـن العويـدي ذوق الهيـل تذويـق
حتى يجي الفنجال لا صـار محيـوف =دم الغـزال اللـي يجـي فالمعالـيـق
والا الخضاب اللي على كف غطروف =نجـلاً تخـازر بالعيـون العشاشيـق
يجمدعلى الشـارب لياصارمشفـوف =وصف الخوير إن صارفالوصف تدقيق
بريةٍ تبعـد صلـف كـل مصلـوف =تجلا العمس ماهيب شاهـي سواويـق
ليا ذرف منهـا علـى الكبـد ذاروف =يبـي يهـود شـارد الفكـر ويريـق
هات الشداد وعطني الجاعد الصـوف =فراش اهل هجـنٍ تبـوج الرقاريـق
تـراي انـا والهـم لايـف ومليـوف =وهجسي من البارح يجي لـه تخافيـق
وليا عزف هجس الغنا كـل معـزوف =تنفـك بيبـان القصـيـد المغالـيـق
جني بنات الفكـر زافـات وصفـوف =وقمت اتخير فـي قـراح الطواريـق
للشعر مثل الصيد قطعـان وخشـوف =الصيـد طعمـه والنـوادر توافـيـق
نبا نخلي عاصـي البيـت معسـوف =ثم راحـت القيفـان عقبـه مواسيـق
وليا اعتدل هجسٍ لـه ايـام معكـوف =يمـة طريـق معلقـات العشـاريـق
ياصاح انا قلبي مـن الـود مشعـوف =حب البنـات ملصـقٍ فيـه تلصيـق
شاعيه مجمولٍ ولـي فيـه معـروف =وموثقٍ لـي معـه بعـض المواثيـق
غيدا النوابـي عمرهـا متـن وردوف =زملوق غصنٍٍ مـن طـوال الزماليـق
ليا بينـت خـدٍ كمـا بـارق قنـوف =رخم السحاب اللـي خشومـه مدانيـق
وعينٍ هدبها لا شبـح كنـه سيـوف =عين اشقـر مربـاه روس الشواهيـق
تنسف فليل غاطـن ٍالمتـن منسـوف =على مثل غرمول عـرق الصعافيـق
مـرودمٍ بالحـال ماهيـب حرجـوف =ولا شافها راع الهـوا جالـه شهيـق
ملهوفة السرجوف والجسم غظـروف =والمفرع اللي فيـه للشمـس تشريـق
صدرٍ تقول من ابيض القطن منـدوف =طلـع النهـود مفتـقٍ فيـه تفتـيـق
ياما عليك الاحـي الـورق واسـوف =ورق علـى دوحٍ غصونـه مواريـق
أمـر بيتـك واتـعـداك واطــوف =وانا على شوفـك شفـوق المشافيـق
ادرا علـى سمعتـك واذل واخـوف =من اهل الهـروج مكثريـن النقانيـق
كم واحـدٍ لوكـان ماهـوب مكلـوف =يطقهـا لـو جنبـت عنـه بلحـيـق
ترى التعب في راحة النفس مخلـوف =شوف العيون يـزود النفـس تشويـق
هذا ويا من له نحـا البـال ملفـوف =شوفك يسليني عـن الهـم والضيـق
ليتك تصافحنـي بذرعـان وكفـوف =والا علـي تدنـق الـوجـه تدنـيـقٍ

سهل بن نايف الكسر المرشدي

التوقيع

ليا جاء طاري الهيــــــلا يفز القلب فزة شوق ألبوم صور مدونه مميزه

[فهيد مقعد الرويس]

ذيبان صح السانك ولسان قايلها

وعيدك مبارك وكل عام وانت بخير

تحياتي

[{{ الـــــمــــرشـــدي }}]

صح لسانك ولسان الشاعر سهل بن نايف الكسر

وتسلم على النقل المميز

ولك التحية...

[((الدلبحي))]

صح السانك والسانه وبيض الله وجهك



تحياااااااااااااااااااااااااااااااااااااااااتي

[فيصل المسعودي]

صح لسانك ولسان المرشدي


تشكر على نقل هالجزله يالغالي


وعيدك مبارك


تحياتي