...
بسم الله والحمدلله
والصلاة والسلام على رسول الله ...
الف مبــــــــــــروك لشاعر نا الرائع
عيضه الثبيتي
حيث حصلت قصيدته على المركز الاول بــــ17صوت
وفاز بجائزة افضل قصيده ..
وهذا هو وسام الفوز
بالاضافه الى جائزه رمزيه وهي جوال الفارس..
...
.
شاعرنا المبدع محيّل الثنيه نالت قصيدته
المركز الثاني.. بـــ15صوت...
...
وحصل على المركز الثالث شاعرنا المبدع
سيف المعاني بـــــــ 11 صوت
نقول الف مبروك ونكررها لعيضه الثبيتي
و حظ اوفــــر في المسابقات
القادمه لشعراءنا المبدعين والمميزين بحق
فقد قالوا واجادوا في صياغة معاني هذه المسابقه
وقرأنا لهم مجموعات قيمه من الدرر الثمينه...
والشكر موصول ايضا ً الاعضاءنا النبلاء الذين هم نجوم
المسابقه بأصواتهم العادله... وتواصلهم الجميل...
اطلب من الله يوفق الجميع لكل خير...
والان ننشر القصائد تبعا وحسب الترتيب بأسماء شعراءها....
الاولى (عيضه الثبيتي )
بعض الغلا يأخذ له أيام ويزول=وبعض الغلا نفنى وهو لا يزالي
وأنته غلاك بوسط قلبي على طول=ماينمحي لو طولن الليالي
ايصول في وسط الشرايين ويجول=ويسري ويجري فالعروق الطوالي
ما كنّه الاّ داخل الدَّم محلول= وينبع من أقصى القلب ياهملالي
غلاك غالي يابعد كل مجمول=والله لتبطي وأنت فالقلب غالي
وباب الضمير اللّي بالأقفال مقفول=تراك سدّه يابعد كل حالي
وتراك عن قلبي من اليوم مسؤول=قلبي بلد وأنته على القلب والي
غلاك يقدر يسلب قلوب وعقول=وأنا تراني فدوة الك لحالي
قلبي وعقلي جاك من دون مرسول=واحذف وراها غترتي والعقالي
غلاك بحرً يضرب الجول بالجول=تلعبّه رياح الصباء والعوالي
وغلاك غيثً لو حدر منه هملول=يمكن يحرّك شامخات الجبالي
لو أن هذا الشي ماهو بمعقول=مير البلا حبّك يفوق الخيالي
مرّت ثمان سنين حولً وراء حول=فيها جرالي فالهوى ماجرالي
لا عاد لي قوه ولا عاد لي حول=الاّ..اتوجّد..بالقصايد والألي
ماغير اغنّي وارفع الصوت وأقول=(المستريح اللّي من الحبّ خالي)
الثانيه ( محيّل الثنيه )
بعض الغلا ياخذ له ايام ويزول = وبعض الغلا نفنا وهو لايزالي
وانت غلاك بوسط قلبي على طول = ماينمحي لو طولن الليالي
ماينمحي حبك ولا هوب معقول = انسا هواك وصورتك في خيالي
اصبحت من حبك عن الناس معزول = ماكنّي الا في جزيره لحالي
عليك قلبي بين الاضلاع متلول = تل الرشا من بير مابه محالي
الموت من عينك على القلب مرسول = لاشفت عينك صار في اختلالي
اصير من كثر الحلا فيك مذهول= ومن القهر تصفق يميني شمالي
يابو ثمان ٍ صف عقد ٍ من اللول = والخد مثل البرق وسط الخيالي
والعنق عنق الريم والطرف مكحول = والعين عين اللي على الوكر عالي
ضامر حشاء والساق مدمج ومفتول = والورك ضامنّه احمول ٍ اثقالي
زين القوام اللي تناسق مع الطول = وشيب عيني منك وبري حالي
فيك الجمال اللي غلب كل مجمول = الله عطاك من الجمال الكمالي
جمالك اللي مانوفيه بالقول = يعجز كلامي ياحسين الدلالي
الشاهد انّي من محبتك معلول = والحق حق وواجب انّه يقالي
ان مت كم قبلي من الحب مقتول = سجل له التاريخ عاشق مثالي
القصيده الثالثه (سيف المعاني)
بعض الغلا ياخذ له ايـــــام ويزول = وبعض الغلا نفنا وهو لايزالي
وانته غلاك بوسط قلبي على طول = ماينمحي لو طولن اللـــــــيالي
لك داخلي غابات وبحور وسهول = هذي حقيقه شفتها في خيالي
اشوف لك في ناظري شي مجهول =واكشف غموضك يحرق الصمت حالي
تسهر نجوم . . وياقف الصبح مذهول = يرعف قلم . . ويموت من حب غالي
الجرح فيْ ومن عن الجرح مسؤل = والشعر منك / وفيك ياراس مالي
ان مات حب الطيش فالقلب باقول = تبقى انت ( طيش) وحامض الوقت حالِي
لعمركِ قلْبي منْ الحبُ متُبَول = متيِمٍ . .! يا بنت مابه جدالي
ان كان مريتك من الوجد مقتول = شوفي مدى الدمعه بعين الرجالي
اصعب سوال مع الزمن صار محلول = وابسط اجابه .! كدرت منك بالي
تاخذني الاحلام واقفي بلا حول = وافيق والقاني على راس عالي
لك من صفات الريم يا وافي الطول = تعال شب النار فأطراف جالي
ان شفت وجهك قلت :ماهو بمعقول = ان القمر يجلس بنوره قبالي
وان شفت شعرك فوق الامتان مثلول = ياذيل شقراٍ من سلايل خوالي
يابو ثمانٍ كنها الدّر واللؤل = صب الربيع بصدري \ الربع خالي
الرابعه مكرر
نايف الحويماني
بعض الغلا ياخذ له ايام ويزول =وبعض الغلا نفنا وهو لايزالي
وانته غلاك بوسط قلبي على طول=ما ينمحي لو طول(ن) الليالي
والسر له صندوق مغلق ومقفول=يموت ماضاقت صدور الرجالي
واصون حبك عن هل القيل والقول=ولو غبت تبقى صورتك في خيالي
حب بدوي وافي ولو يلبس سمول=مايرخص الشيمة بعيد المنالي
وراع الوفا دائم على الطيب مجبول=والطبع باقي لو تزول الجبالي
وانا على طبع الوفا عنه ماحول=احيا واموت وعزتي راس مالي
والادمي له رب والرزق مكفول=ورزقي على ربي عزيز الجلالي
وليا طرالي ماضي(ن) زل وحلول=صفقت بالكف اليمين الشمالي
وان زراني من يمة الغرب مرسول=جاوبت لسباع الخلا لطرالي
ذاك القبال اللي به القلب مشغول=ودي بشوفه والهوى ماصفالي
افديه بالغالي وحالي ومانول=ويرخص له الغالي على شان غالي
وكم بالهوى صوب وكم فيه مقتول=قاله حجاب وماجراله جرالي
هذا وانا ربعي لهم مجد وفعول=يشهد لها التاريخ في كل حالي
لطامة العائل صناديد وزحول=ذباحة الحائل حماة التوالي
الرابعه مكرر
ناصر محمد
بعض الغلا ياخذله ايام ويزول=وبعض الغلا نفنى وهو لايزالي
وانته غلاك بوسط قلبي على طول=ماينمحي لو طولن الليالي
شفني معك من وين ماروح مشغول=طيفك ملازمني وكنه ظلالي
اجلس مع الجلاس لاسمع ولاقول=اخالط العالم وكني لحالي
عليك يالنادر يابو طرف مكحول=ماغمضت عيني ولاارتاح بالي
ياعود يامياس يافارع الطول=غالي ولامثلك من الناس غالي
حبك بقلبي دار به ثالث الحول=قاسمتني قسمه بحالي ومالي
ونقضت حبل الوصل والحبل مفتول=ماهو بحقٍ منك قطع الوصالي
باب الهوا لاتترك الباب مقفول=وللي يودك خل صدرك شمالي
انا معك حيٍ وفالحب مقتول=ولاغيرك احدٍ ساكنٍ في خيالي
زولك يصورلي وياحي هالزول=تخنقني العبره ليامن طرالي
وان زارني مع هاجس الشوق مرسول=قلطت له في وسط صدري دلالي
لاحول من ماصابني منك لاحول=اصبر واذوق المر واقول حالي
من عصر لين الصبح في راس غرمول=اجاوب الورقاء على راس عالي
والحب قد طوع طحاطيح وزحول=لاوهني اللي من الحب سالي
الخامسه مكرر
ابن شلواح
بعض الغلا ياخذله أيام ويزول=وبعض الغلا في داخلي لايزالي
وأنته غلاك بوسط قلبي على طول=ماينمحي لوطولن الليالي
ياعين حر ٍمع هل العرف منقول=ياسيد كل البيض بأول وتالي
ياعنق ضبي ٍيمترح بأول الجول=من بندق القناص صابه جفالي
من رمش عينك يمكن أموت مقتول=مقتول من رمشك بليا قتالي
وجدي عليكم وجد عود ٍومشلول=خلوه ربعه فوق جرف ٍهيالي
ولاٌ كما وجد الحضارم على الفول=ولاٌ وجود أهل مصر للريالي
من حبكم صرت أضرب القول بالقول=ماعاد أفرق بين مر ٍوحالي
لا جيت أبا أدرس وأتعلم يامجمول=وآخذ شهاده مثل باقي الرجالي
أجيب لي حل ٍ ولاهوب معقول=حتى المدرس جاه مثل الهبالي
يجيبلي فاعل وأنا أقول مفعول=ماغير أناظر صورتك في خيالي
تكفون ياأهل الخير شوفولي حلول=حب العذارى ياعرب سم حالي
باقي علي شوي وأصير مهبول=أحيان أطوح غترتي مع عقالي
وخلي عن اللي صاير ٍ في مسئول=أنا أتعذب وأريش العين سالي
لكن يالله طالبك فآخر الحول=إنك تقرٌب بيننا بالحلالي
(الخامسه )مكرر
برقاوي باشه
بعض الغلا ياخذله ايام ويزول= وبعض الغلا نفنا وهو لايزالي
وانته غلاك بوسط قلبي على طول =ماينمحي لوطولن الليالي
اخذالكلام اللي انا عنه مسئول = ان جيت ولا رحت يازين غالي
ميدان حبك صارفريس وخيول = وكلن يقول اجيب راس الغزالي
يوم اقبلت والعقل ينصاب مذهول = عجزت افرق واقعي من ظلالي
الطرف ناعس واشقرالشعر مفلول = ويداعبه ريح الصبا والعوالي
حمر الشفاه الورد من تحتها اللول = المبسم اللي مثل برقن يلالي
وصغي لهرجه منطق الهرج معسول =اخذ من الشهد العسل ذوق حالي
يبصر كفيف وينطلق كل مشلول = لوشاف حسنك ياحسين الدلالي
اعيش في سحرك وفي سر مجهول =والفكر سارح في اماني خيالي
مقبول منك اللي يجي منك مقبول = اذوق منك المر واقول حالي
وهذي عيوني من بكاها غدت حول = عليك يامن طلعته كا لهلالي
ماهمني مهبول يقلون مهبول = ياماحلى يا زين فيكم هبالي
مادام لاقاتل ولاني بمقتول = يفداك ياراسي خبول الرجالي
ويفداك يا ترف القدم كل مجمول = وكل الغلايفداك ياراس مالي
(السادس) مكرر
واسم الاحي
بعض الغلا ياخذ له ايام ويزول=وبعض الغلا نفنا وهو لايزالي
وانته غلاك بوسط قلبي على طول= ماينمحي لو طولن الليالي
سيرت فوق الارض بالعرض والطول= ماشفت مثلك ياحسين الدلالي
ولك موقع بالقلب ماكل مجمول =ياصل مكانك يابعد كل غالي
موقعك دايم داخل القلب مقفول= من خوف لايسبق خيالك خيالي
شربت حبك بالغلا شرب محلول=حتى بلشت بحيلتي دون حالي
عندي غلاها من غلا عطف الشول= اللي يشيلن الحمول الثقالي
واطيب من العشبه على حيد غرمول=ليا تغمدها رحيم الخيالي
والله لو يشرىمقابلك لااقول=سوقوالها اغلى مااملكه من حلالي
حيث ان فيها الزين ماهوب معقول= اليوسفيه دمرت كل حالي
وحب ماياخذ فالضماير ليا الحول= والله ماله في حياتي مجالي
والحب فالايام قاتل ومقتول= ولايقتل الا من عزوم الرجالي
تكفون يالهيلا ترى القلب محمول= في وسط كفه بين صالي وصالي
وامافزعتوا لي فلا قوه وحول= الا بخالقنا عزيز الجلالي
اوفي لها دام اني اصول واجول= وان مت اوصي في وفاها عيالي
(السادس) مكرر
خلف مرزوق
بعض الغلا ياخذله ايام ويزول=وبعض الغلا نفنى وهو لايزالي
وانتي غلاك بوسط قلبي على طول=ماينمحي لو طولن الليالي
باب الغلا عن غيرك بقفل مقفول=ماذكر لغيرك قلت مرة ((ياغالي))
ياللي ليا غبتي انا اصير معزول=بين الملا لاكنّ كني لحالي
ياشغلي الشاغل بك العقل مشغول=شغلن شغلني عن جميع انشغالي
ماكني الا عنك بالذات مسئول=يامشغلة فكري وقلبي وبالي
ويروق بي جوي لاجا منك مرسول=من فرحتي اقوم اغني والالي
واليا حضرتي زان وصلن على اصول=يابنت اصولن تعرفين الوصالي
ياقمة الاخلاق بالفعل والقول=ياسيدة جيلك بكل الخصالي
فيك الحسن لو ما الستر يسلب عقول=خطر اللي يشوفك يصيبه هبالي
حبك ربى بالقلب حولن بعد حول=من قبل اثبت غترتي بالعقالي
حبن اماريبه لو يقال مهبول=ماسمع لمن راسه من العقل خالي
واضحي لحبك لو اصير مقتول=حب الشرف لا00 مايعيب الرجالي
منتي لحد غيري وانا اقول واطول=بسيف الظفر ولا بخشم الريالي
بمر الله يصير الذي كان مأمول=ونبدا علاقة عشقنا بالحلالي
السابع
نايف الحميدي
بعض الغلى ياخذله ايام ويزول=وبعض الغلى نفنا وهولايزالي
وانته غلاك بوسط قلبي على طول=ماينمحي لو طولٍ الليالي
ياغاية العشاق يادرة اللول= سبحان من صورك حسن ودلالي
حبك سطا فالقلب والفكر مشغول=دورات فكري زودت با انشغالي
لولاي اهديها بحبة بنادول= كان اختلف عقلي وجاني اهبالي
عليك ياعين الوحش مرعب الجول=اللي مواكيره بروس الجبالي
سود العيون الي لها طرف مكحول=لاسلهمت تذبح ازحول الرجالي
والعنق عنق الريم بالعرض والطول=عنق الغزال اللي رتع فالمفالي
والخد برقٍ لاح في منكب اثعول= قام ايتكاشف في حقوق الخيالي
والخشم كنه سلة السيف مسلول=الله عطاه من الحلى والجمالي
والموت شوف شفاه والريق معسول=راعي ثمانٍ تدفق الريق حالي
وابوجديلٍ فوق الامتان مفلول=يلعب ليا هبت هبوب الشمالي
زول المها ماشفت مثله ولازول=في ذمتي نادر ولاله امحالي
وان قلت مهما قلت ياسامع القول=اعجز لوصف زينهابالكمالي
حوريةٍ مندونها الباب مقفول= ماغيرها احد ٍ سكنن في خيالي
بدر بن عصاي
بعض الغلا يآخذ له ايام ويزول = وبعض الغلا نفنا وهولايزالي
وانته غلاك بوسط قلبي على طول= مايمنحي لو طولن الليالي
دامك نزلت بمنزلٍ غير منزول= من قبلك وبعدك لياغبت خالي
نسيان مالك من غلا غير معقول= ياللي ملكت القلب بأول وتالي
ياعين حرٍ يوم ناحر يبا الجول = من الطمع يصفق يمين وشمالي
صيده جزل واشبع بصيداته الضول= وكسب الرهن خلاه نادر وغالي
وياجيد من تشرد بها خوف وجفول= القنص خلاها تهاب الضلالي
ونابي الصدر والخصر ناحل ومعزول= ومن طوله الخفرات ماهن طوالي
اللي يبي يحصر مزاياك مهبول= غير الجمال الريق عذبٍ وحالي
معذور من وقف يطالعك مذهول= شاف الجمال اللي مامثله جمالي
ومعذورمن يصبح على النعش منقول=اليا تأكد بإن وصلك محالي
وش عاد تبغاني عن اوصافك اقول= ياكثر مايرسم وصوفك خيالي
الحبر جف وعقلي اشبه بمشلول=وأهم شي إنك فهقت الموالي
معك انت لاقوه لقلبي ولا حول=وشلون تنسى يالحبيب المثالي
لأنك دخلت بخافقٍ غير مدخول=وقدرك بوسطه صار بالحيل عالي
الوسم
بعض الغلا ياخذ له ايـــــام ويــــزول =وبعض الغــــــــــلا نفنا وهولايزالي
وانته غلاك بوسط قلبي على طــــول=ماينمــــحي لو طـــــوّلن الليـــــــــالي
يصول حبّك داخل فؤادي ويجــــــــول=آمـــــر تدلـــــــل ياحســــــين الدلالي
اعيونها لاسلهمت ياعرب هــــــــول=اتضّيع أشنــــــاب وعــــــقول ٍ ثقالي
العين عين مذير ٍعافت الجـــــــــــول=الكســـر ذيّرها عن فيّ وظــــــــلالي
قطعت من شانه تضاريس وســــهول=وقنبت فــــوق النايفات الطــــــــوالي
لعيون خشفٍ ضامر القد مجـــــــدول=يالعنبوها من التـــــــرف والجمــالي
اصفر عفر برموشها الموت مسلول =تقول شلـــفا ذياب وزيد الــــــــهلالي
كانون رّوح وابتدأ شــــــــــهر أيلول=شهرين طافـــو ماتـجاوب ســـــؤالي
واليا اتصلنا دايم الخـــــــــط مشغول=وش علمك بحــــالي أبــــــد ماتبالي
يازين طمّني برساله ومســــــــــكول=اطفـــــــي لهيب ٍ زايد ٍ باشتـــــــعالي
وكانك عشقتي غيرنا مابــــقى حلول =روحي بطريقـــــك جعل دربك سهالي
يابنت أنا عزيز وعّزي من زحـــــول=زحــــول الرجال أهل الفخروالفعالي
أنا عتيبي منثني سيـــــــف مصقول=من باعني بعته ولو كــــان غـــــالي
بحفظ ملف قضيتي بسم مجـــــــهول=وبنساك وابقى دالــه ٍ عنك ســــالي
نياف العتيبي
بعض الغلا ياخـــذ له ايام ويــــــزول= وبعض الغلا نفنى وهو لايزالــــي
وأنته غلاك بوسط قلبي على طــــــول=ماينمحي لـــــو طولن .. الليالــــي
حبك تجاوز بالمدى كــــــل معــقــــول= جاوزت في حبك حدود المجالــــي
صفيت لك صاف الغلا كاس معســول=وصبيت لـــك فـنجال ود ٍ زلالــــي
وشقـيت لاجل ارضاك يانايف الطــول= ورضيت ضيقة واحد ٍ من خوالـي
وشرعت لك بيبان الاضلاع ياحــــول= وســــمحــت لك تدخل بليا سؤالــي
ودشيت لك مرباع ماهــــــو بمدهــول= ما حلّ به قـــبلك من الناس غـالــي
أنت الــوحـــيــد اللي بـمثناته تجــــول=تشبه لفرخ ٍ ببرق الريش صـــالــي
حـدمه وجـيعـانه ولا شافـــت الجـــول= تــفــنــيه ماتـــتــرك لــــباقيه تالـي
لاشك كـــــدرخــــاطري قول منقـول= قــــــول ٍ سمعته مع بعيد وموالــي
تــــبي نهايتها بعـــــد حال كم حــول= ياكيف تطلـــــبني فراق ورحالـــي
وانا من الـــلي تـعـمـله حيل مـذهــول=واعدّ هــــذا من ضروب الخيالــي
الـــصـــد والهجـران ماهوب مـــقبول= ســلــم الهـــــوى ما يقبله ياغوالي
وأنت أعتبرني ماسمعــــتك وش تقول= وأنا اعتبرها حلــــم مــر بخـــيالي
اصدق معي مره ترى القلب معلـــول= ولا يمـــيــن الله لاجــذب حـــبالي