يالله توفقني

[عبداللطيف الفضلي]

يالله توفـقـني على خيـر الاعــمـال = خيـر العمل يارب مع طيب نيّه


اغفر ذنوبي قبـل قصّـاف الآجـال = طالـبـك ياربي عـزيـمـه قـويّــه


قبل الحساب وقبل حزّات الاهـوال = رحـمـه تـنـجّي من سعيرٍ لظيّـه


ربـحــان من تـصبح موازينه ثـقال = مـن طـاعة الله والامـور السّويّه


وخسران من ميزان الاعمال به مال = بالمعـصيه ويّا العـلـوم الرديّـه


اللي بـجـنـة كـلها انــهـار وظـلال = واللي بـنــارٍ يـصـطلي به شويّـه


طالبـك جنّـاتٍ بـها الشـهـد شــلال = ويّـا اللبـن والـما وعيـشه هـنـيّـه


هي غايتي يارب هي طيب منزال = عـطـيّـتـك يارب نـعـم العـطيّــه