إهداء الى الشيخ صنيتان بن محمد الضيط

[محمد الذيابـــي]

إهداء إلى الشيخ/ صنيتان بن محمد الضيط حفظه الله

من هاجس اللي جاه داع الواجب=شاد البيوت ووافقه مبداه
بسم الله الرحمن والف اصلي=محمد خير هدي هداه
سراج الامة والرسول الهادي=شفيعنا في الحشر عند الله
ياهاجسي دام القصيد رساله=أجزل بقولك والعرب تقفاه
اجزل تراني خابرك باللازم=مثل البحر والبحر من يقواه
من ديرة ام الدوم دار الذيبه=نصيت شيخ والشرف منصاه
ومن مبتدا سلم الرجال نسلم=سلام تسليم على مشهاه
من شاعر جاب المعاني يسوقها=للي تحوش المرجله يمناه
صنيتان نعم الراس فعل وخوه=لزم وصاة العود يوم اوصاه
سيرة جدودك ليش مانذكرها=وانته من اهل الراي واهل الجاه
من معركة مجرور ياجاهلها=يوم القبايل تدفع الزكاه
للترك تدفعها ومعها الطاعه=شالح بدا له علم ماننساه
جلد رقاب الترك ويقول لابتي=ياويل من يطمع بها ويلاه
وعلى طلال ومن رسم فرحة العرب=الحصن اصيله والرجال رماه
ذيب السرب ناداه مسلط واجابه=ويقول وافرحيكم فرحاه
ذيب السرب ومساوي الجماعه=على صدوق الراي من مبداه
وفي يوم عروى والتواريخ تشهد=وابن رشيد ومن معه يقفاه
راحو طقق من فعل شيخ يشوقفنا=اسمه وحي اسمه ومن سماه
وفي يوم الانصر جوك مزحم وطلحه=يوم الشجيع تبينه يمناه
ويوم الرشاويه نهار التحالف=ضد ابن هندي جاه من هناه
الاد عاضي جوه من راس مارق=قبل بزوغ النور من مبداه
وعلى الهييشه يوم صار التحدي=يقول العدو يامقرب معشاه
وعلى مناخ الحرمليه وغيرها=كم شيخ قوم كسرت رجلاه
الخيل صفر باللقا خابرينها=عز لسيف الضيط مع شلفاه
كنها تماري كل ماشافت العدا=وتقول واعقم امكم عقماه
خيل مضرات على الحرب والوغى=كم زحزحت شيخ على مركاه
هذا على مفهوم علمي وقدرتي=والخافي اعظم كان ماجبناه
ولو اني اكتب عن فعايل جدودك=كان القلم والطرس غلقناه
ومهما كتبت اقول ماحصي فعولهم=والشرح طال ومالحقنا اقصاه
ومن طيب ابو فواز شاشت قصايدي=يا سيف مزحم عز من ينصاه
انته ذرى من دون كل القبيله=والبيت من ساسه ومن مبناه
لك مجلس ماينوصف لو اوصفه=ديوان شيخ يفرح اللي جاه
شيخ لك الله من شيوخ عتيبه=للحق مال وبين مسعاه
والشعر في حضرتك كن مزونه=مزن السحاب ليا تزبر ماه
والشعر في حضرتك جات طروقه=مثل الظوامي فوق عد قباه
والشعر في حضرتك يوم اقوله=مثل الذهب واللول في معناه
والشعر في حضرتك موج عايم=والموج مرعب والعرب تخشاه
والشعر في حضرتك بنك ارباحه=لو قسمت للكون كان اغناه
والشعر في حضرتك نوره ساطع=نور يشع من اوله لتلاه
والشعر في حضرتك سيف حده=ندر بنات الفكر يوم احداه
والشعر في حضرتك اشوفه واجب=ومن يجهل الواجب تجاهلناه
والشعر في حضرتك عود جاوي=عود ثمين وغالي مشراه
بحضور ربعك ياعريب المجنى=ربعك هل الميقاف واهل الجاه
ربعك حزامك بالرخاء والشدة=ياطيبهم وقت اللقا طيباه
قبيلة وقت الشدايد تارد=وان قالت القول القوي تحماه
على الصعاب نفوسهم مفطومه=كرم ودين وفالحقوق قضاه
اقولها وانا من اللي كتابهم=يطرب له السامع ومن يقراه
قبيلة للمجد والطيب والكرم=وصلت ليا سطح القمر واعلاه
وكل القبايل تفتخر في فعولها=واللي ظلمهم ينهدم مبناه
وحنا خوان وسنة الله سراجنا=والمجد والتاريخ ماننساه
مجد القبيله ورث والورث امانه=على النقا والزور مانهواه
هذي مبادينا وهذي طبوعنا=طبع نشينا به وعاصرناه
وصلاة ربي عد حجاج بيته=على محمد خير هدي هداه

التوقيع

التوقيع محمد الذيابـــي