حبيب العازمي ووصل العطياني ... طاروق عابر للقارات

[محمد المرشدي]

السلام عليكم ورحمة الله وبركاته




محاوره بين حبيب العازمي ووصل العطياني والحفله كانت في الجموم يمكن قبل تسع شهور او عشر شهور تقريبا وكان معهم صقر والقرقاح


وجبت لكم هالطاروق النااااري .... ارجو ان يحوز ع رضاكم




حبيب
يامفسر الاحلام وش رجل مجنون ... مجنون ويصلي بصف الجماعه
شفته وشفت اللي خلافه يصلون ... منهم وصل صلى معه نص ساعه

وصل
ماهو صحيح وقولوا اللي تقولون ... تراك قبلي قلت سمعن وطاعه
لحيتك مدهونه وشاربك مدهون ... وافضل كنوز الكون كنز القناعه

حبيب
طافت على هامان تمشي يافرعون ... والله كشفها في خبيث البضاعه
امن الشحم والا انتم بزيت زيتون ... كل ن دهن وجهه ودهن ذراعه

وصل
ماتكشف الاسرار والسر مدفون ... عيب الولد ينسى حليب الرضاعه
فيما مضى واليوم غسل بصابون ... واليا بغيتوها لكاعه لكاعه

حبيب
قرش البحر دايم تراه اسود اللون ... واللي ينوشه يلتوي في كراعه
كل اليتامى للعطاء يستحقون ... مير امهم ماعاد تلقى طماعه

وصل
يامعذربين اللون وش تستفيدون ... عنتر تحداكم عزوم وشجاعه
لا تنفخون الذرب ياحزب شارون ... في ذمتي ماعندكم غير ضاعه

حبيب
اهم شي اللون والفعل ما لون ... والوجه يعرف عقب يكشف قناعه
ياجعلكم من دون في دون في دون ... في ذمتي ماعاد فيكم شفاعه

وصل
حنا على كبدك من العام طاعون ... تدري ولا يدري طبيب الاشاعه
اخر زمن ماعندكم غير تدعون ... يازينكم بين الرجاء والقطاعه

حبيب
اللي يبى يظهر حفيلي من يكون ؟؟ ... وانا من الطاعون عندي مناعه
الله مكرمنا وحنا غنيون ... ياللي طلعتو في زمان المجاعه

وصل
مافيكم المضمون ونقول مضمون ... لو نزرع المعروف فيكم زراعه
عاشت زبيده كله بفضل هارون ... والا مايطلع صوتها فالاذاعه

حبيب
معروفنا قبلك غدى وسط ماعون ... واثر البلا الماعون مشقوق قاعه
يمين والا يسار لف الدركسون ... هارون عاش بعز ماهي دناعه

وصل
لو ان لك معروف يمداه مصيون ... النور مايمديك تحجب شعاعه
اتخربون اكثر من اللي تسوون ... راحت سرايعكم سراعه سراعه

آخر تعديل محمد المرشدي يوم 31-May-2012 في 12:17 AM.