العرب

[مشاري الشلاحي]

بثّو كلامي في جميع القنوات= واخذو الكلام اللي عليه الادله
وانا ما اقول العلم من غير الاثبات= ولا اقولها كذبة ولا هي بزله
حنا العرب حنا فخر وانتصارات= اللي قرا تاريخنا ما يمله
لنا قصص فالمجد والنا روايات= تاريخنا مثل النجوم المطله
سدنا على العالم وقدنا البطولات= والسيف الاملح فالمواقف نسله
نحكم بشرع الله في كل الاوقات= ونمشي على سنه ومذهب ومله
لا صاحت العذرى تدوّر لفزعات= يفزع لها اللي دوم يحضر بحله
ومن دونها حنا من حساب الاموات= والله واكبر تجمع الجيش كله
هذا منوّل وقت عصر الفتوحات= واليوم عيشتنا بغبن ومذله
نقول بنسوي ونجمع ريالات= وناخذ لنا موتر ونسكن بفله
ونقول حنا اهل الوفا والمروات= طبع المهايط صار فينا جبله
والا العرب في سوريا راحو اشتات= من غير قصف وغير امورٍ مخله
الى متى واحنا نردد سياسات= واللي معه حكين نقول اله خله
الى متى واحنا نعيش المعانات= لغزٍ عجز واقع زماني يحله
نقراء ونسمع بانتكاس الحكومات= ونضحك على شاهي وفنجال دله
وامرّ وادها ماهو قادم وآت= واوضاعنا بتزوّد الطيبن بله
امورنا تمشي بحسب العلاقات= شله تساعدها فالاوضاع شله
انفعك وانفعني وهيهات هيهات= الله يكافينا القلوب المغله
غنينا ياكل ويبني عمارات= هذا لحاله دولةٍ مستقله
وفقيرنا من ضيم الايام ما بات= يبكي ولا احدٍ فالزمن فاطنن له
وكم واحدٍ يدرس ويبني طموحات= ويطوي شريط الامنيات ويفله
وعقب الدراسة والتعب والشهادات= يبل مويتها ويقعد محله
الى متى والواسطة فالمجالات= علة نحر تبقى لنا دوم عله
نشوف واقع مرّ ونعيش بسكات= ولا فيه عسر الا اليسر مقبلنله
ياربنا تجعل عوض كل ما فات= في جيلنا المقبل وتحفضه يالله
يا معتلي من فوق سبع السموات= يا واحدٍ نرجي ثوابه وضله
وان ما ضبط وضع السنين الاخيرات= بتروح فيها الدولة المستقله