مستور العصيمي وسفر الدغيلبي حصري لمنتدى الهيلا

[قاسي العتيبي]

مستور العصيمي
يامرحبا في محل العز والأحترام
باسم المعازيب نعلنها ونبدأ بها
حياكم الله في ميدان قصر السلام
سوق الفناجيل والدلة ياصبابها


سفر الدغيلبي
الله يرفع مقامك يارفيع المقام
ويبارك الله فالدعوه ومن جابها
هرج العوارف سوات النور يجلى الظلام
مثل الأوايل تجي من حظ كسابها



مستور العصيمي
ياصاحبي ياسفر ماعاد فيها كلام
من يعرف النار لا يقرب لمشهابها
ياربي إنك تجنبنا دروب الملام
واللي يحسب النجوم يوضح حسابها


سفر الدغيلبي
يامحللين الحلال محرمين الحرام
الله يكافي من النيرة وشبابها
لاصارت السالفة من غير شرع ونظام
علوم أبا أرضى بها وعلوم ما أرضى بها


مستور العصيمي
اللي يسوق القدم فالأرض شرق (ن) وشام
يجيب الأخبار زينه مثل من جابها
مايارد العد غير موردين الحيام
والسالفة كلها سكين ونصابها



سفر الدغيلبي
مستور عندك خبر مير الهمام الهمام
حاضر عتيبة يكفـّي دون غيابها
مدري متى تفطر الصـّيام بعد الصيام
يبدي هلال الفطر ويريـّح أعصابها


مستور العصيمي
عندي خبر والحذر يطري عليك المنام
الليل ياراعي الصفراء وركابها
خلك بعيد(ن) عن الموضوع والأتهام
من يلبس الجوخة الخضراء تحلى بها


سفر الدغيلبي
تال الليالي ملـوّ عك الهوى والغرام
هواوي (ن) ركـّب لحونه وغنا بها
والله ما أجنب عن أهل العرف شرق (ن) وشام
لين البعارين تعدل عوجة أرقابها


مستور العصيمي
صرف أمورك على كيفك ودوس الجهام
مانيب لعبة زمن في كف لعابها
مانقبل اللي عليها من ضحى الطير حام
خليتها للطيور اللي تعشى بها


سفر الدغيلبي
اللي بخطه يوقع محضر الأستلام
تشهد عليه الكتابة قبل كتـّابها
إن كان مالك على ماقلت قصد ومرام
فجوجها واسعة والناس تسعى بها

آخر تعديل قاسي العتيبي يوم 16-Apr-2012 في 10:52 PM.

[متذوق الشعر]

اشكرك ياقاسي على الاختيار الراقي والنقل المميز

طاروق عمالقة شعر صح الله السنتهم

[قاسي العتيبي]

متذوق شكرا على مرورك

[ماجد العصيمي]

العود حاضر بقوه





شكرا لاختيارك

[ابو فايح]

طاروق رايع من الشاعرين


واعتقد انه قديم شوي


لاهنت يا قاسي

[عزارم]

شكر لك ياطيب

[حمدان يوسف الصبيحي]

مشكور يالغالي ولاهنت

[قاسي العتيبي]

كل الشكر لمن مر وعلق على الموضوع المطروح

[سعود العصيمي]

سفر



والله ما أجنب عن أهل العرف شرق (ن) وشام
لين البعارين تعدل عوجة أرقابها





مستور





مانقبل اللي عليها من ضحى الطير حام
خليتها للطيور اللي تعشى بها




الله الله

ابداااع



ابداااع


صح لسااااانك يابو تركي

وصح لسااااانك يابو سعد


طارووق عملاق


لاهنت ياقاسي ع الاختيار المميز

التوقيع

اللي على كيفه يجي والاّ على كيفه يروح = إن راح في حفظ الولي وإن جاء هلا واهلآ هلا. ماني على قربه شفي والاّ على بعده شفوح = الله خلقني مااعترض من صد من كل الملا.

[السفراني]

طاروق رائع واعتقد للقب شاعر الهيلاا نصيب منها