مُجــــاراة لقصيدة أعجبتني ..!! ( سهيل ..وسليمان)

[سهيل 1]

بسم الله الرحمن الرحيم

هذه قصيدة لأحد أبناء عمومتي اسمه : سليمان العتيبي ..أدرجها في أحد منتديات قبيلتي

الخاصة في مجالس الشِعر ..يتذكر من خلالها والده رحمه الله ..ويُثني على والدته ..وقد راقت

لأخيكم سهيل بما تحمل من المعاني الســـــامية والنبيلة وهو يتحدث عن والده ويتذكر مآثره

الحسنة ..وما أحوجنا جميعا إلى ذلك الفعل النبيل ..


يقول الشاعر سليمان :

يبه طال إنتظاري وانتظرت الموت تسع سنين=وأنا ودي عليك الحق وأشوفه طال مشواري
يبه لا صرت تنشد عن حياتي والعمل والدين=على ماكنت تبغاني اصلي واحمد الباري
يبه انا صار لي زوجة وعندي يايبه طفلين=وأحدهم يحمل إسمك يايبه يازين هالطاري
وأبشرك امي بنعمة ومرتاحة قريرة عين=وتدعي لك تقول ابوك كان يعز مقداري
تقلي ياوليدي لا تناسا الشايب المسكين=تصدق عنه وادعي له وسوي له عمل جاري
وانا ادعي لك ليا منه مضى من ليلي الثلثين=وانا ادعي لك بمطلع ليلتي وبأخر اسحاري
وانا اعرف يايبه قبرٍ حضنك من الحصى والطين=قطع عني خبرك وعنك قبرك قاطع أخباري

رحم الله من توفى من والدينا وتغمدهم بواسع رحمته ..فقد تعبوا من أجلنا وربونا أحسن تربية

ولهم الفضل بعد الله سبحانه وتعالى في تعليمنا وتوجيهنا ..

ورزقنا الله بِر من بقي منهم على قيد الحياة ..وكسب رضــــــاهم ..

وهذه مجاراة أخيكم سهيل لقصيدة الشاعر سليمان :

أنا شوْقني النّص الحزين وهِمت في الشطرين =ما بين الصدر ويّا العجز حِرت وِحــارتْ أفكاري
قريته ثم هل الدمع من عيني على الخدّين =دموع (ن) من عيون سهيل يا ابن العم واجبـــــاري
ذكرت الشـــايب اللي في حياته كـــاسب الثنتين = رضا الله ثم حُب الناس كل (ن) شاهد وداري
أبوي اللي سِواة أبوك عاش الوقت عِسر ولينْ = عطونا علمونا في المدارس كاتب وقاري
بوقت(ن) فيه جمع المال صعب تجمع الألفين = ما يجمعها يا كود التاجر اللي بائع وشـــاري
لكن الله سترهم لين ماتوا ما عليهم دَين = عليهم رحمة الله تحت نوره يسري الســاري
عسى مثواهم الفردوس بالجنة وحور العين = دعوتّ الله وأنا صــادق دعوته سِر وجِهاري

أخوكم / سهيل العتيبي ( الطايف)

آخر تعديل سهيل 1 يوم 07-Mar-2012 في 11:08 PM.