وش اللي بقـــا!!!!

[محمد الذيابـــي]

تعودت أقول الصدق مانطق شهادة زور=وأنا شاعر افكاري على الصدق مبنيه
أبين حدود القول وأبعد عن المحظور=ولن قمت في دعوى ماضيع دعاويه
مع الاولين أقلط ولاني من اهل السور=وعارف مكاني واخلص الفعل والنيه
يادكتور لاتشرح وماتكتبه مخبور=وانا جايبن فالدرس ميه على ميه
أبويه مدرسني وأنا عبده المامور=ولو ان خلق الله ماموره ومنهيه
سلامي على شيخٍ خذا في زمانه دور=أبوي أفتخر به كل ماحل طاريّه
سلامي سلام أغلى من الدر والبلور=سلامي على كل الصفاة البطوليه
سلامي على الشجعان في كل دار ودور=على ذكرهم والشعر تصهل قوافيّه
سلامي على الفرسان حماية المظهور=هل الراي واهل الكسب لن كبرت الهيه
سلامي على التاريخ ياكاتبه بسطور=تواريخ أهلنا بالسجلات محميه
هذا ورثنا ماهو مسلسل لميس ونور=وحنا بدو مانعرف أفلام تركيه
وش اللي حصل ماودنا نكشف المستور=وأظن الزمن مافيه حاجات مخفيه
يقولون ماتكتب وأقول الخبر منشور=يقولون ماتنصح وأقول اسأل الهيه
يادكتور خوجه وين تصريحك المشهور=تقول الثقافه كلها بالسعوديه
وأنا أشوف عكس اللي يقولون يامنصور=لكن الهدف واضح تصاريح وهميه
ياناس الثقافه تندثر والتراث يبور=ولانعرف الحاصل والاسباب مبنيه
والا ياهل الشورى متى تحكمون الشور=على الضال نبغا نلحق الكيه الكيه
ياعالم حرام تقلدون العمي والعور=تقولون حريه وأقول أيش حريه!!!
ثقافة كفر وارهاب ومظاهرات وجور=ورشوه وكذب وعشق لدروب ملويه
ليا جيت راقي قلت نص البلد مسحور= هذا غير للي عند دكتور نفسيه
وأنا ماتشمت مير من قلبي المقهور=على المسلم اسأل ليش ضيع مباديّه
يانايف وزير الداخليه مافيك قصور=مدامك وزير الأمن قل للحراميه
يكفون أذاهم عن وطنا هذا المعمور=كبير الوطن بعيون شعب السعوديه
يانايف وأشوف الشعب دمه من أمس يفور=تسوق المره بعد أنتخابات شرعيه
وش اللي بقا ياساتر أستر على المستور=أشوف الزمن قامت تزايد بلاويّه
يانايف وأنا خابرك صقر وريث صقور=تصرف ترانا في حروب صليبيه
تراك الامل في نظرة الشعب والعب دور=وحنا معك بالفعل والعقل والنيه

التوقيع

التوقيع محمد الذيابـــي