كذا كذا طعم الرفق ولاّ بلاش من الرفيق !! - الهيـــــــــــــلا *** منتدى قبيلة عتيبة

رائد الكيرعاني القحطاني · 30-May-2011, 05:57 PM

مبطين منكم يالمطاليق

اعذرونا على المتواضعه جعلها ترقى لذائقتكم

رفيقي اللي ما يجملني ليا ضاق الطريق = واضحيت أشيل هموم بقعاء كلبوها من عناي
في ذمتي لأشطب تلفونه ولا عاده رفيق = وان كانني دقيت جواله عسى يقطع رجاي
مالي بخوة خاطر من علمي الطيب يضيق = يكنّ في داخله شيّ ما يقرّب له مداي
يضحك لي بسنّه ومشواره مع الضّحكة عريق = والغبن يسري في عروقه والحسد رايح وجاي
احصّله متصدّر المجلس ليا جيت الفريق = وان شافني قام يتلبّب لي ويظهر لي غلاي
والمشكله لامن عطيت الباب ما يمدي أويق = من طيب راسه قام يشذبني ويطعن في قفاي
تقول لامن جاتني النعمة توفّا له شقيق = همّه يعيّن زلة من خطوتي ولا حكاي
ما يدري اني ما حسبته فاق ولا ما يفيق = لكن انا معطيه كرت احمر .. وكلمة باي باي
ماني بقايل له ترا كلمتك هاذي ما تليق = ولاهو بسامع من لساني كلمه ووجهه وراي
أشووم عن مثله ولامن جيت اولعها حريق = ذكرت وشني في عيون الناس وش هو مستواي
وان كان ما عيّنت غيره في هذ الدنيا صديق = والله لأبقى طول عمري من خلايه في خلاي
ألقى بداله قرم .. له فالقمة العليا بريق = حرّ يلبي لي ليا احتجته قبل يسمع نداي
صداقة على النقا والطيب والساس الوثيق = وحفظ المروه والعنوه من وفاه ومن وفاي
ادراه وارفع قالته لانه كما الاخ الشقيق = وهو يساعدني على الشدات ويعزّز بناي
انومسه ولا اتسمع في جنابه خيق بيق = واسعى لكسب رضاه .. وهو يجتلد يبغى رضاي
كذا كذا طعم الرفق ولاّ بلاش من الرّفيق = والله يسلّم ساعة الشّدّة تبيّن لي اصدقاي !!

آخر تعديل رائد الكيرعاني القحطاني يوم 30-May-2011 في 06:02 PM.