المندوب

[طارق الثعلي]

السلام عليكم ورحمة الله وبركاته

أتشرف أن تكون لي أول مشاركة في هذا الصرح عسى الله يجملني معكم وهي قصيدة تشرح نفسها

قم يا نديبي على اللي يعجبك فزه= أنا أشهد إنه حديدن يقضي العازه
في لازم اللي ليا من الغلا هزه= لأعز ربعه وهم عزه ومعنازه
خواله اللي على الامجاد مرتزه= من خيرة القوم قوم الطيب واعزازه
قم شغله يا ولد وليا احتمى قزه= تله كما سكود لامن ولعوا غازه
اللي على القار له هيبه وله رزه=تسعه وسبعين لا تنشد عن طرازه
واربع ميه مابها حنه ولا وزه= والفحص ختم عليه الفحص واجتازه
اللي نخى الجمس قله يبشر بعزه= امر على الجمس لا تستصعب احرازه
تله على اثنين ثم للثالثه كزه= النار من ساعدك و القاز من قازه
ثم لقمه راحته بعد إنك اتلزه= حاديك علمن نبا فزعتك بأنجازه
وليا خذيت إلك من كيف العرب مزه= خط الريشية على التمثال قم وازه
لا يهمك الراصد الخامر ولو قزه= وعيار خمسين غصب اليوم يجتازه
خل للوطا تحت ويله وإن سرى هزه= يفهق لك اللي على جيبه ورزرازه
وليا وصلت الذي ناشي على عز ه= درع المراجل على غيره ترى حازه
الهرجه اللي بوسط الجوف وتحزه= فصل كلامي ولا تنقله ايجازه
من صورتن للعرب في العين مهتزه= من عقب ماهي على القمه وممتازه
الكفر يذبح هل الاسلام في غزه= أطفال ورجال واللي فوق عكازه
والعرب تشجب تقول الغرب مبتزه= والغرب ردت تقول العرب من حازه
والفارسي ياعرب وش محرقن رزه= والزول شالوا عنه تاجه وقفازه
إرهاب يابيرقن فالكون من رزه= إلا يبا الدار دار العرب وحجازه
وانا ادعي الرب للاسلام ليعزه= مالي ومال البلد دشه وتلفازه
قم دور ارضن من الاعشاب معتزه= اتشابه الفارسي ولدق شيرازه
وترتب الوضع وتنسق لنا حزه= وتنبه الربع كلن ياخذ اجازه
نبا نسج الرجل فالارض نتنزه= نتقاسم الدور كلن ياتي بعازه
احدن جلب عزبته والقدر مع رزه= واحدن تزهل بطبخ الصيد وانجازه
وام العمودين عندي نصبها رزه= واللي على موتره ويجيب خرازه
والنار تشعم بلا منقل ولا جزه= ويسلم الخبز للي قال خبازه
عنده عشانا وخدر شاهي الوزه= تبدا التعاليل كلن يطرح ألغازه
سوالفن ترفع الرجال وتعزه= ماهي على أعراض خلق الله وطنازه
هذا هوى النفس دام الناس منهزه= مالي ومال البلد دشه وتلفازه

وسلامتكم