الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > منتديات قبيلة عتيبة - الهيلا > شعراء قبيلة عتيبة

« آخـــر الـــمـــشـــاركــــات »
         :: خبر سار (آخر رد :نايف الثبيتي الروقي)       :: ياطيب راسك يالحافي (آخر رد :نسيب امطير)       :: ادارة منتديات عتيبه الهيلا تنعي فقيدها ... عين العقل ..( بندر الثبيتي) (آخر رد :العتيبي)       :: ناسي (آخر رد :الخضارمي)       :: مجالسيه من نظم والدي الله يطول بعمره . (آخر رد :عيضه العيسي)       :: للمجاراة …. (آخر رد :نظام ساهر)       :: الشيخ صعب الحداري (آخر رد :الجزوم)       :: اكتب ميزةوامش( تميز المنتدى عن غيره من المنديات الاخرى) (آخر رد :مطرح البعارين)       :: الشمري ضيف عندكم يالهيلا (آخر رد :ابو طارق الشمري)       :: الحفاة في فلسطين (آخر رد :بن دويش المطيري)      

إضافة رد
أدوات الموضوع انواع عرض الموضوع
غير مقروء 26-Apr-2005, 12:06 PM رقم المشاركة : 1
معلومات العضو
الوليد الاسعدي
مشرف عام
إحصائية العضو






التوقيت


الوليد الاسعدي غير متواجد حالياً

افتراضي الدرر من عتيبة مضر

بسم الله الرحمن الرحيم


الدرر من عتيبة مضر

( الطبعة الاولى 1426 )


مقدمة :
الحمد لله رب العالمين الذي جعلنا مسلمين وجعل القرآن عربي مبين وعلى الهادي محمد القرشي الامين المبعوث رحمة للعالمين افضل الصلاة وازكى التسليم .
العرب أمة من بين الامم تعاقبت عليها السنن امتازها الله باللسان الفصيح لسان اهل الجنة والذي عليه اهل الملة ان جنس العرب افضل الاجناس ومن لاينطق العربية فهو عندهم في تصانيف العجم .
والشعر عند العرب كان هو اداة الاعلام وفاكهة المجالس بل كان بمثابة الصحف والمجلات الدورية له هيبته وجبروته ويتحاشى سطوته وظلمه الملوك ...
قد تكهن بعض النقاد والمفكرين في العقود الماضية ان الشعر في عصر الآلة سيضمر كنتيجة تلقائية لوفرة البدائل من مذياع وسينما والتي ربما وجد بها العربي العامي نهمته عوضا عن الشعر وزاد البعض ان ثقافة الشعر ربما حل مكانها الرواية والقصة فهي الأقدر على تصوير معاناة المجتمعات الحديثة، والأصدق في التعبير عن آلامها وآمالها؟!
ولكن هذا التصور ربما كان طرحا سائغا عند الكثير وخصوصا في بدايات الحداثة التي هي ثقافة مهجنة بين الشيوعوية والليبرالية لاتكاد تمسك منها لارأسا ولا قفا والتي مارست على الشاعر العربي الاصيل عزلا وارباكا ثقافيا ليكون مشوها ومن ثم يسهل جثه والتخلص منه . الا ان فطائر العرب وتعلقهم بالشعر وان كان عاميا له وزنه وذائقته عند الشعوب مما جعله يشق طريقه نحو المسامع يتلذذ به الناس وتطرب له الاذان وهكذا بدا من جديد مؤخرا ياخذ مكانه اعلانا بأن الشعر من اقوى مواد الاعلام العربي توهجا وتألقا ووصولا الى الأفئدة ... ومن نعم الله انها للعرب مزية وتكثر في هوازن التي هي افصح العرب .
ومن هنا كانت لدي قصاصات متناثرة اكتبها حين اسمع ماتطرب له الاذن وشيء من كتب رواة عتيبة امثال بن منديل وابن دخيل وبعضها مسموع من المجالس وكله من الشعر العامي الجميل المليء بالحكم والامثال لشعراء عتيبة عبر الزمن حتى ان بعض الاوراق تغير لونه من طول المكث فاستحسنتها ...
ثم كان منتدى الهيلا العامر الزاخر فهممت ان اجمعها مجددا وانثرها في هذا المنتدى ليدوم الحفظ وتعم الفائدة فوجدت اشعارا أخرى لقدماء عتيبة اجمل مما لدي تنقل وتكتب هنا في المنتدى من الاعضاء الكرام امثال الاستاذ هنيدس ، ابن نجد ، ابو فراس ، بعيد المرامع وعبد الملك الخديدي وغيرهم فخرجت بهذا العمل المتواضع جامعا اشهر الشعر واعذبه مصنفا بالمواضيع ثم اسميته الدرر من عتيبة مضر .



• التحية والترحيب
اليابس سعود بن لفاي الحافي
أهل مرحبا وان جت ليالي الشدايد *** وأهل الكرم وان جت ليال اعسور

سلطان بن مظفر الزايدي
وتلقى سراة من هلال بن عامر *** يزيل الصدى والغل عني سلامها
بهم تضرب الامثال شرقاً ومغرباً *** اذا قاتلو قوم سريع أنهزامها
عليهم ومنهو في حماهم تحــية *** من الدهر ما غنى بقية حمامها

محمد بن فهيد الاسعدي
اول نباشرهم بزود تهلاتي *** ومبهرات في يدين الاواليد
والشطه اقفت مثل فسخ العباتي *** وساحة خواطرهم بكثر التناشيد

فهد بن حنس العصيمي
ونفرش الأزهار والزل الجديد *** من أسافل نجد لطلعة كرى
والمشاعر وسط قلبي ما تحيد *** عن محبة من نباه معطرا

فرز الحافي العتيبي :
ما رية الترحيب طلق الحجاج *** وغير الكلام الزين ومفطح الضان


• الاستغناء والتشيم
بندر بن سرور
ياعنك ماتشفيك ذباحة التيس *** ربع السلق مادام حملك خفيفي
وأخير من هاك الوجيه المفاليس *** البعد عن معروفهم لو تضيفي
يلحقك منهم بعض الايام تنجيس *** ثوب النجس لو كان ثوبك نظيفي

بندر بن سرور
صادق رجالن يعرفون الصداقه *** يقفون صفك يوم يبسات الأرياق
ومن يرغب فراقك فعجل فراقه *** جاز الذي يجزيك أفراق بافراق

بديوي الوقداني
عفت المنازل وروحي يوم اجنبها *** منها غنيمة وعنها البعد أولى لي
لا خير في ديرة ٍ يشقى العزيز ابها *** يمشي مع الناس في همٍ وإذلالِ


• الكرم والجود
مخلد القثامي
اوصيك بالخطار في هاشل العشا *** ليا نصـوبك لا تقصر وجيبـها
باشر لهم بالطيب والكيف والذرا *** وقرب معاميلٍ على الله نصيبها

محمد بن فهيد الاسعدي
يازيد انا ودي تسوي سواتي *** هذي سواة معرب الخال يازيد
يازيد لامروا هل الموجفاتي *** اقحص لهم عجل بالاوماي يازيد
يازيد انا يابوك لذة حياتي *** شوف النشامى لا لفونا تقل عيد

عبدالمعين بن عقل بن ثعلي
الا بحب اللي بناري مناحير *** صفرن على جال المناره مقاعي
يازين شبت نارها للمسايير *** لجالهم عندي عليها اجتماعي

ابو عبيه المقاطي
وترا الكرم من طيبات الصفاتي *** والبخل لوم وشوم وخصلة عذاريب
وكم واحد مثلي وسوا سواتي *** لامات من فقر ولا حل به عيـب

محيا بن رباح
الله خلقني واعتنى بي من الضيق *** والفقر عن سلم العرب ما حداني
ما قط مني راح ضيفي على الريق *** ولا شان وجهه يوم شان الزماني

هلال بن دخيل الله المغيري
وليا لفا مع هجعة الخلق خطار*** دور لهم كبش كبير النوادي
اما معك والا مربيه تجار *** اشره ولو قالو لك الخلق غادي
حذراك حطت للمشاكيل معذار *** ورزقك يجي من عند رب العبادي

حويد العضياني
يا ماذبح من حايل صفوها *** في حزة القفره ليالي الوزامي

محمد بن فهيد الاسعدي
أذبح لهم كبش رعى بالخلا هيت *** كثر لهم سمن على غالي الزاد
المرجلة ما تدركه وان تدانيت *** اعنز على ربك يعينك بالانفاذ

ذياب بن غانم
يلومونني الأنذال لاكثر خيرهم *** يلومونني ويلحقوني ملام
يقولون خلي الضيف لا تعتني به *** يبون الردى يبني عليّ سنام


• البخل والشح
بندر بن سرور
وخطوا البخيل اللي على السد يقصف *** وان مد له مده لياهي حقيره
هو مادري ان الرزق للحي يصرف *** يعطيه من يعطي العطايا الكبيره

عويد بن محسن الصعاق
البخل سمي بخل مابه جمايل *** ظلام سدٍ يوقف اللي مشا له
والجود دربه سمح لاهل الجمايل *** سمحٍ لمن جده وخاله عنا له

مناحي الهيضل
وترى البخيل ولو جمع له قطيعين *** لو كثر ماله مثل نبت الهراسه
مخطئ من الدنيا ومخطئ من الدين *** راضي على درب الردى والخساسه
يبخل على نفسه ولو هم غنيين *** مثل الحبيني بوم رزقه لحاسه

• الشجاعة والحزم

الأمير الفارس تركي بن حميد
تصبح مداس الخيل من غبّ كوننا *** تشبع حناديها وباقي نسورها
ماينفع الا الصدق والفعل والنقا *** وباقي الحكايا بايهاتن أمورها
عاداتنا لطم المعادي على النقا *** والا العميلة راتعة ما نذورها

مخلد القثامي
تغانم شبابك قبل يلعبك الجهل *** تغانم زهرها قبل يابس ركيبها

ذياب بن غانم
ولي حربة سميتها سم ساعه *** اعرضه بالكون ما كان كايد
حنا ابلينا بالخلا الفين فارس *** وحنا ثلاثين ولا زاد زايد

العفار ضيف الله بن تركي
عاداتنا نرعا الخطر دايم الدوم *** يرعى دبشنا فيه والحظ قايم
نرعى بربع كنهم دولة الروم *** مركاضهم بالضيق يجلا اللوايم
لاصاح صياح الضحا جن حثلوم *** الخيل بالفرسـان عجل همايم

محمد بن دخيل ابو خطمه
وجتهم عتيبه دولةٍ تضرب الطار *** مثل العساكر يضربون المزامير
في راي أخو هملا عسل مر الامرار *** ضاريٍ بقصعات الجموع المزابير

محمد بن هندي
ضرب الموارت مابها نوماس *** حذفة شرود من بعيد
على قضب عنانها والراس *** والله يدبر مايريد
علي باللي تبعد المرواس *** والعمر لزم انه يبيد

دليم الطر المرشدي
حنا شبابه ناخذ الفعل بالدول *** حبل يمدونه وحبل نرده

شليويح العطاوي
على طلال الصبح خلت مخيله *** اصل مناينها اليا الجرذاوي
بروقها الهند ومصاقيل العجم *** ورعودها البارود والعزاوي

بخيت بن ماعز العطاوي
يا خيلنا وان شب للحرب ناره **** فلا يلاوي راسها كل ديقان
راحن من حت التطاريف شارة **** وعود بعد مركاضنا ذود نقزان

مشيلح بن رويبح الشيباني
نادى علينا شيخنا بالحمايل *** قام ونخانا بالجدود الاوايل
يقول هوشوا هوشة اهل الصمايل *** والروح بخطوط القلم في كتايبه


• عزة النفس
بديوي الوقداني
عز الفتى راس ماله من مكاسبها *** يا مرتضي الهون لا عزٍ ولا مالِ
ذللت بالروح لين ارخصت جانبها *** وانا عتيبي عريب الجد والخالِ
قومٍ تدوس الأفاعي مع عقاربها *** ولها عزايم تهدّ الشامخ العالي

شليويح العطاوي
ياناشدن عني تراني شليويح *** قلبي على قطع الخرايم عزومي
ان قلت الوزنة خذوها المشافيح *** اخلي الوزنة لربعي واشومي

بندر بن سرور
قل له تعلمنا على الصبر عتبان *** بدنا وبيدنا دروب الجزيرة
يقطعك يارجلٍ غدى ضبي رمان *** داره محل الريف في كل ديره

عائض بن زيد المحاص المغيري
كثر الشمات يبدد الحال تبديد *** يغضب ملايكتي ويفرح عدايه
ان عشت يشبعني حزامي من الصيد *** ون مت ماعقبت للي ورايه

ناصر الشغار
وأنا احمد الله مارفيق ٍ شمتني *** والعوج ماعقّبتها فالقبيله

تركي بن حميد
ليا قالو الحكام رزو بيارق *** نسفنا على شيب الغوارب ثقالها
ولا عندنا في حلتن عند حاكم *** على الطول حكامن طوالن حبالها


• الصبر والاقدام
تركي بن حميد
والحر لا دبتّ عليه النواميس *** يشهر وعن دار المذلة يشومي
وإلى اكترب من بعض الاشيا نسانيس *** إعزم ولا بدّ الفرج بالعزومي

بندر بن سرور
أبطش ديار القوم والرزق مضمون *** تصيدك الأقدار وألا تصيدي
وأحذر تخاف ألا الذي كون الكون *** رب السماء محيي العظام الهميدي

بديوي الوقداني
دوس المخاطر ولا تخشى عواقبها *** الموت واحد وبعد العز يجلالي
إن المنايا إذا مدّت مخالبها *** تدرك لو كنت في جو السما العالي
ما قرّت الأسد في عالي مراقبها *** تسعى على الرزق ما حنت للاشبالِ

تركي بن صنهات بن حميد
ما همني دنيا ولا همني مال *** الرزق ياتي مثل هاتف مطرها
شفي ومقصودي من الخيل مشوال *** شقرا نواصيها كثير شعرها
شفي عليها كان هو زعزع المال *** ومن الهنادي صارم في طهرها
وبالكف من غالي المطارق هوى البال *** يروى بحزات اللقا من حمرها

خميس الاسعدي
واعانق القالات بعزم ليث *** ولا زامل من شديدات الليالي
ترى القالات لو كادت تهون *** للقالات عقد وانحلالي

دليم الطر المرشدي
حنا شبابه ناخذ الفعل بالدول *** حبل يمدونه وحبل نرده

ثواب بن طنف الجعيد
ان ميل الميزان من قوم يمنا *** صبرنا لها لوكان كبرت لهودها
وان ميل الميزان منا على العدا *** نروي من السم السقطري كبودها

ابن فرج المغيري
وياما صبرنا تحت شد الرحالي *** وياما تصعبنا وزدنا بالأصعاب
نوب نجي ذوب على الكبد حالي *** ونوب نجي مر على الكبد غياب


• الويل والتوعد
تركي بن حميد
لا خير في كثر الحكي والتماليس *** هرجٍ بلا فعلٍ يجي به وهومي
من لايدوس الراي من قبل ماديس *** عليه داسوه العيال القرومي

تركي بن حميد
اما نوافق غرّةٍ تتفق لنا *** والا مقابيسٍ تقدح شرورها
يرجا لفزعتنا الى جا كميننا *** بدهم الفرنج اللي وساعٍ قرورها

تركي بن حميد
كم فارسٍ من راس رمحي تفرشط *** مدح راسه حط فالحزم جافور
عليه خفراتٍ بالاسلاب تشعط *** خلّي عشا لمرهف الذيب وطيور

راشد العمرو الاسعدي
ياويلكم من مزنة فجة النور *** سيلة عليكم ياالعمارات ضافي
ترعد وتبرق غيمة قيمةالدور *** يصبح بردها فوق الاضلاع جافي
والله لوانك من وراالشط بالهور *** ماتهتني بالنوم بالليل غافي

مخلد القثامي
كم راس شيخ عن متونه نقلناه *** واصبح تهرجبه كلاب القطيني
تبرهجي في عشبتة وأشربي ماه *** تبرهجي يا مقرعات الحنيني

ذعار بن ربيعان
يا اللي تمنى سربة العتبان *** ابشر بهم علم وكيد
خيل تنازى فوقها فرسان *** وبيامينيهم صلد الحديد

مجدل بن بعير
مافيه حب خشوم دون المصاغير *** ما دام لي يمنا عطيب سهمها
لحيان هل القشع مثل المناشير *** بأرض طرا واللي خلقها رحمها

محمد بن هندي
ومن زان حنا على الزين خلان *** ومن شان نسقيه الجروح الضريرة

عسكر الغنامي
ياشرنا لاهل القلوب الشريرة *** وياطيبنا للي يبي الطيب بالطيب
وياويل من هو في نحانا نحيرة *** اليا ركبنا فوق شهبن شلاهيب

تركي بن سداح
حريبنا دايم نزوره بداره *** حتى غدت عنا القبايل بعاثير


• العفو
عباس بن زيد السميري
أصفح عن اللي يسجون المواجيب *** وألبس ثياب المعزة بين الأجوادي

• المودة
شليويح العطاوي
ويفدى عشيري من عظامه تقله *** البدو واللي يلبسون الخزاري
وبن رشيد الشمري فدوة له *** مودع صماصيم القبايل وقاري
والحر يسمح لي ثمانين زله *** واللاش ماني عن زراياه داري

ابوزيد الهلالي
سمعت منك يا فتى الجود ونه *** عساك منها يا فتى الجود سالم

سجوان الرويس
يمنا بلا يسرا تراها ضعيفه *** ورجل بلا ربع على الغبن صبار


• الكره والبغض
بندر بن سرور
ما أحب ترديد الغنامير مشحان *** ما أدمح خطا اللي شاهده رأس ذيله
والا خطا الطيب زبادٍ وريحان *** لو يدعي لي بالفنا وادعيله

بديوي الوقداني
قوم ٍ إلى جيتهم رفّت شواربها *** بالضحك وقلوبها فيها الردا كالِ
وقوم ٍ إلى جيتها صكّت حواجبها *** وابدت لي البغض في مقفاي واقبالي

سيف الحكره المرشدي
يا وجيه الخير من ياخذ الرخمه نسيب *** كيف يرضى بارد العزم يبزغ في نساه

حمود بن مقرب الاسعدي
ولا احب الجلوس مع النجوس *** حبايل سوهم صادت كراعي
ملاقاتي لعودان البلنزا *** ولدغ السم من سم الافاعي
اخير عندي من لاماي غلمة *** عيا طبعهم يركب طباعي

صنديح الهمرق المقاطي
من لا يقدم بالحوادث بصيره *** ينشب ولا عانوه من له يعيبون
كبودنا للي نعادي مريره *** ما هي تنظف لو تغسل بصابون

• رد الجميل والحشمة
تركي بن حميد
وقم في قصير البيت حشمه ومقدار *** لو جار فادمح له ولو به خساره
ترى النبي وصّى على الجار لو جار *** خذ الحذر ياعبيد عقب النذاره

تركي بن حميد
إخشع تواضع لا تكبر تزرا *** ماشفت ميلات الليالي مراديف
ورفيقك الغالي منه لا تبرّا *** إدمح خطاه إلى تعبث عجاريف
يشرب معك صافي وكدرٍ ومرّا *** ويارد معك حوض المنايا الى عيف
نوبٍ تذرّى به ونوب يتذرّا *** عديل عمرك بالليالي الشفاشيف

محمد بن فهيد
الجار له حق علينا ثباتي *** اودع عياله من حساب المواليد
العمر يفنى والتجاير شتاتي *** والمجد يبقى والثنا للاجاويد
واللي ورانا من عيال وبناتي *** يرزقهم اللي حدد العمر تحديد

دخيل بن تنيبيك
اما عدلنا ميلة الشيل عنا *** والا نقر لهم ونصبر على الميل


• النذاله واللؤم
بندر بن سرور
أبن اللئيم أمشارك الكلب بطبوع *** عينه على حرمة قصيره دورها
مادارها خوف عليها من الجوع *** خوف تفوته غرةٍ ماسبرها

شديد الحثري العصيمي
اللاش دايم نقمته لابن عمه *** لوكان ماله حجةٍ يدعي بها

بندر بن سرور
أحدٍ على ربعه يحب التحري *** للشر بلاسٍ وخيره بجيبه
هذاك أنا يالربع منه متبري *** لو عظني ناب الدهر ما انتخيبه

ثواب بن طنف الجعيد
ترى الثعالب ما تغير عيالها *** لو كان تنقش بالزمرد جلودها
والحر الاشقر ما سكن فوق عرفجه *** لو كان مالت بالثماري فنودها

بندر بن سرور
أذكر لك الأجواد صد وصواميد *** والانذال لاصدوا ولا من صميده

فراج التويجر
انت حبالك باع من فوق حبلهم *** ومن ورد دلوه في حبالك سقابها
وانته تشيل حمول من لايشيلها *** شال الحمول الكايدات ومشابها

نهيت بن بريك
الانذال قربتهم هوان ومهونة *** ما يظهرونك لو هويت مضيق
توذيت من ناس قليل نفوعها *** كما النمل لا حرك وذاه دقيق


• المدح والاطراء

مخلد القثامي
نهد جنوبنا وجنوبهم كنّا نهد حيود *** سبايب حربنا كله على راس العطياني

فراج التويجر العضياني
حنا عتابه للحرايب ماشتحنا *** ونضير الراكب ويركب له وليف
برقا لا يامن الحرايب ولعنا *** منزحه عن نجد دقلات الحفيف

بديوي الوقداني
عتيبة جناح الصقر وثبيت اعضاه *** ولايستوي طير بغير اجناح
رعو نجد بالسيف اليماني وبالتفق *** ومعها من العود الطويل ارماح

بريك الاسعدي
وتلقى حلوس الحيل بمركاض خيلهم *** على مجنب البطحا فلوذ وبدايد
لا روحن غب الثرا يبحثنه *** وتشضف من صم الحصا كل كايد

فهد بن حنس العصيمي
يا عميد الطيب ما غيرك عميد *** عزنا زيزومنا الغضنفرا
مزبن الفخذين ملجأنا الشديد *** الذرى بالله ثم بك الذرى
طيب رأسك يجعل المبغض نكيد *** زاد غيظه والمزاج معكرا

محمد العبّود
ابا العطايا نادر العش قرناس *** شلق مناعير النشاما شليقي

شديد الحثري العصيمي
كم عيطموس من جراير فعولنا *** نهار غب الكون تبكي حبيبها

مسعود بن سعد بن شبلان العضياني
حرٍّ ولد حرٍّ طلع ماله أثمان *** طلع على جمعٍ غزير يقدّيه
زيزوم جمعٍ يرجعه وقت الاذان *** يمشي على أمره والموامير تتليه

تركي بن حميد
انتم كما ضلع في الارض عالي ومزموم *** وحنا كما نجم يجي فوقه ويهله
وانتم كما حوت في البحر لاهوم *** وحنا خلقنا الله للواهيم عله

سلطان المريبض الرويس
ليا جاك طرقي العتيبي عقب ياس *** ينشد عن العتبان باغ شبابه

ذياب بن غانم
لاكن دوي الخيل من ولب رمحه *** دوي السما من مرزمات الرعايد

فراج التويجر العضياني
ملفاك بن هندي منا هاشل الخلا *** عيد الكنيف اللي تضالع ركابها
تلقون ثايه كنها واكف الندى *** من مس الايدي عقب لوخ العشا بها

فندي بن عزارم المقاطي
من شاف ضربه باللقا مايعوده *** لى اعتزى كل صفح عن ملاقاه
يومه وقف واسباب موته قعوده *** ياكثر ماواجه من الشر كثراه

ثواب بن طنف الجعيد
واناعتيبي من سلالة هوازن *** ربعي عوايدها الفخر من جدودها
ما نوشي الفتنه ولا نحرث الردى *** ولا نهاب اليا تسامت وقودها

العفار بن تركي بن حميد
وحنا عصا الحكام من عهد جدنا *** وحنا عتيبة للملوك سلاح
عتيبة جناح الصقر وثبيت هامته *** ولا يستوي طير بغير جناح


• الذم والهجاء
بندر بن سرور
خطو الولد يامال قصف التماهيل *** يشرح عيوب الناس ماشاف عيبه
يفرح ليا شاف المجالس هراميل *** يكره ليا شاف المجالس أمنيبه
ماشوقنه طيبات التماثيل *** مع شايبٍ قد بيَن الوقت شيبه

بندر بن سرور
والله ما همني قاضي العمر ترغيد *** ابن اللئيم اللي حياته رغيده
اهني الكلب الحجل بالمراقيد *** وضب الخلا لو كان يأكل رديده

بندر بن سرور
أحدٍ ينام وحط رأسه بكمه *** وأحدٍ يخم النوم عينه وتخطيه
أحدٍ يحاول بالردا بنت عـمه *** وأحدٍ يحاول ستر عذراء عوانيه
ماني وأنا بندر ببياع دمه *** يقطعك يا بياع دمه ومهفيه

نمر بن صنت
خطو الولد سود ثيابه من العيب *** مافيه من درب الرجاجيل خصله
مشتاله المدحور بالكبر والريب *** قام يتزين له بليس ورقصله

مناحي الهيضل
ياكيف يمدح راعي النيشان ***حذفة شرود بمهوى
خطلان اليدين مالهم ميدان *** الخبل والطيب سوا
ماعاد يوجد للعرب ميدان *** ويلاه ياعصر مضـى

هيا بنت سرور
ياصويمل ماتمل من الدوادي *** لوينادي الزول عندك ماتجيبه
ياصويمل جعل تاكلك الحنادي *** تاكل التفاح وانته ماتجيبه

جبر الحمادي الروقي
يا عاشقين النوم ما فيه ثابه *** ما سر في المسعى كلاب رقودي
ترقد لو أن الناس تمشي ضبابه *** ومطعومهن من الوسخ والجلودي

سعدون بن دبي العصيمي
الأصايل قليلة الضنا *** والدجاج فروخه كثير
حنا عتيبه بروسنا *** مهوب آكالت الحب النثير

خالد بن عقاب الكسر المرشدي
ادعي بها عني قليلين الاسناع *** ادعو معي عسى تصيب المقاليع
ارجي عساهم للبلاوي والاوجاع *** من كل صادوف يجيبهم قواميع

مناحي الهيضل
ليت المراجل كلها بالموازين *** كل على مدة يقنن قياسه
حتى يبين اللي له الناس راضين *** يفهق عن الطيب رجال الخساسه


• الرثاء والندم والهم
صنيتان بن صنهات السعساع الشيباني:
الله من قلباً سراء الليل مابات *** من شافني يقول حالك علامة
بعد صلاتي للعشى عشر ساعات *** والعين ماذاقت لذايذ منامة
قالو علامك قلت لي غالياً مات *** وانا بلاي الي طواني هيامة

بندر بن سرور
أمشي وقلبي يابساتٍ غصونه *** ومني صناديق الضماير حطامي
ابلا مرض حالي تقول مهيومه *** والكبد صامت عن لذيذ الطعامي

بندر بن سرور
ياونةٍ ونيتها في حجي الروح *** ونة جزع ماهيب ونة مودة
يا جهاد ضاق بي الوطن وين أبا أروح *** ولا عاد لي يا جهاد فالبقع لده

مرسى العطاوية الروقية
ياجر قلبي جر غرب على بير ... على ثلاث أبكار فيهن زرقا
ساعة يصبنة ألياهن محادير ... تحرفن ابسرع والغرب يرقا

سعيده الثعليه
يا لجتي لجة خلوج المصاغير *** اللي على بو ٍ تزايد حناها
ويا حنتي حنة خلوج ٍ على ضير *** استلطفت حب النما في حشاها

نوره بنت ابراهيم النفيعي
اليوم انا عديت في راس مرقاب *** في ماقع عسر على اللي يعديه
واهل دمع العين والراس قد شاب *** والقلب يالاجواد كثرت طواريه
مظنون عيني ناحر دار الاجناب *** رجلي ولا تحته ذلول توديه

مويضي بنت زعيفر العصيميه
انته تدور لك بكارٍ ذهيبي *** وانا ذهيبي ضايع وين ابا القاه
اعوي توالي الليل كني صويبي *** كني صويب يسهر الناس بعواه
عيني تخايل كل نجم يغيبي *** الليل كله بس اهوجس بطرياه
قالوا تطيب وقلت والله ماطيبي *** يافاطري جيب مولوع القلب فرياه

العفار ضيف الله بن تركي
ياونتي ونة كسير الجبارة *** إلى وقف ما احتال وليا قعد ون
عليك يا شباب ضوّ المنارة *** عليك ترفات الصبايا ينوحن

فندي بن عزارم المقاطي
الناس تدري به وتذكر عهوده *** كل خبر فعله وذكره وطرياه
شيخ الشيوخ اللي عريب جدوده *** نرجي عساه بجنة الخلد ملفاه

طراد المغيري
امسو بني عمي تهنوا بالأفراح *** وانا من الحسات اخفي عذابي
الشيب يا غلاب في عارضي لاح *** والصبر له من عند ربي ثوابي


• الخير والدين
صنيتان بن صنهات السعساع الشيباني
ياهني الي يصلون القيام *** يسهرون الليل اليا وقت السحر
خايفين الصبح من قبراً ظـلام *** يحشر المذنوب لاطبة حشر

تركي بن حميد
رافق قويّ الدين حفّاظ الاسرار *** ينفعك في يومن يجي به كراره

تركي بن حميد
وأخير منها ركعتينٍ بالاسحار *** لاطاب نوم اللي حياته خساره
تلقاه في يومٍ يضيعنٍ الافكار *** يومٍ على المخلوق ما اطول نهاره

مطيرة البرجس
حديتنا على بدع الامثال *** كذبت مهو مثل يوم عرفاتي
صيران من الجال للجال *** قبلك عباس مالقا به شفاتي
ياماحلا توقيفتن بين الاميال *** من بين زمزم والصفاتي

ناصر الشغار
أنا ليا من البلاوي بلتني *** اصبر على شيل الحمول الثقيله
وشفت الدعاوي كلها فاختتني *** أرجي ثواب الرب منشي المخيله

هلال بن دخيل الله المغيري
والدين فرض الله على من يراعيه *** ومن لا يراعي الله من الدين خابي
وهي خمسة الأركان يا جاهل فيه *** فرض على من خاف ربه وانابي

حويد العضياني :
يا واهني من كلف الحج واوفاه *** واقفن به العيرات رجد مع الريع
وزانت وفوق العبد من عند مولاه *** وجاله على رب الأوادم تسانيع


• رمضان
صنيتان بن صنهات السعساع الشيباني:
مرحبا حييت ياشهر الصيام *** المكارم فيك وانت افضل شهر
سعد من صلى وصامك بالتمام *** ولاتقفى عرض غافل ماحضر

• الشر والهوى
تركي بن حميد
ترى الهوى والغيّ هن شرّ الاشرار *** ومن داس عار الناس داسوا لعاره
جنّب رديّ الكار مافيه تعبار *** مافيه من فعل المناعير شاره


• دعاء وتضرع
بندر بن سرور
يالله ياجال الامور المهمه *** تجلا وهج قلب برا حال راعيه
البر دجته والبحر رحت يمه *** اسعى ورى رزق عسى الله يهيه
يوم ان ولد اللاش رزقه على أمه *** رزقي على اللي ميت القشع يحييه

تركي بن صنهات بن حميد
يالله يا عالم خفيات الاحوال *** يا اللي ذنوب العبد لاشا غفرها
طالبك انا الجنه وحسنات الاعمال *** تقدر تفرجها الى جا قدرها

شديد الحثري العصيمي
يارب توحي جابتي عند حاجتي *** ياخالقٍ روح البن ادم حسيبها
ارجيك يوم انك براجيك تعتني *** وعينٍ ترجاك الرجا ماتخيبها
تطرح لنا غيث صدوقٍ به الحيا *** يسقي ديارٍ بالقسى نلتوي بها

محمد بن فهيد الأسعدي
يالله طلبتك تالي الليل رعاد *** من مرزم بالليل نوحي هديده
يسقي من الشنبل ليا حد بغداد *** والبصره الفيحا ويسق الجديده

عبد المحسن ابن غازي
بسم الاله الواحد الفرد الصمد *** أرفع يداي بخلوتي وأدعيه
أدعيه بأسماه العظام وقدرته *** ما خاب عبدن من الدجا يدعيه
أرجيه يشفيني ويحفظ غربتي *** ما عاد أبا لندن ولا طاريه
هذا اسبوع ما سمعت المذن *** ولا شفت لو مسجد يصلى فيه


• التجربة
بديوي الوقداني
جربت الايام مثلي من يجربها *** تجريب عاقل وذاق المر والحالي
نضحك مع الناس والدنيا نلاعبها *** نمشي مع الفي طوع ٍ حيث ما مال

مناحي بن خالد الهيضل
محفوفه عسر الليالى بيسرين *** ولاخضر عود مرقبله يباسه
دنياك هذي ما صفت للقديمين *** ملعونه الدنيا ولا فيها وناسه

بديوي الوقداني
الروح وش عذرها في ترك واجبها *** راح الحسب والنسب في جمع الاموالي
المال يحيي رجالاً لاحياة ابها *** كسيل يحيي الهشم الدمدم البالي

عبدالله بن سجوان الرويس
والطير بالجنحان محسن رفيفه *** واليا انكسر خطو الجناحين ماطار
ويمنى بلا يسرى تراها ضعيفه *** ورجل بلا ربع على الغبن صبار

ثواب بن طنف الجعيد
وترى تفاصيل الرياجيل واجد *** يتعب مغنين المثايل عدودها
عرفت لي منها معاني كثيره *** خابر ثعالبها وخابر فهودها

العفار بن تركي بن حميد
ومن شب نار الحرب للحرب يصطلي *** كثر مقابيسه وزاد اشتعالها

محسن الشويب الجذعاني
القاف اسوقه لين يركد على اللين *** ولنيب احوّس للمثايل عزامه
اصغيه عن درب أهل القيل بيمين *** ما نا بحوش نيها والهلامه

حمود بن مقرب
اوصيك مني بافهيم *** ترى عز الملا بالاجتماع
ولا تبغي القطاعة بالقريب *** لابد القطوع من انقطاع
انا ما اجلس حذا عند الرجال *** ما اجلس عند مقصور الذراع

عبد المعين بن ثعلى
والخصم لو لك لان بأول دعاويه *** لا تأمنه ياخذ عليك انقلابه
خله بعيد عنك والحق يخفيه *** والحق سيف المن يجود نصابه
وليا نويت المنهج الدرب تمشيه *** اعزم على درب الخطر لا تهابه
واحذر من الدرب الخطر يوم تعطيه *** حذرك معك والله على ما نوايه
الدرب دائم ما تخليه افاعيه *** أما ذياب الدرب ولا كلابه
والذيب أو عضة الذيب تشفيه *** والكلب كلب أو دعسته بالقرابه


• الزهد والعفاف
صنيتان بن صنهات السعساع الشيباني:
المال انا شفتة طرات ابن ادم *** اثرة يحط اردى الرجال امير
اثرة يحط اردى الاوادم باشة *** لو كان مايامن من الصفير


• المجالس والاصحاب
تركي بن حميد
ياما حلا ياعبيد في وقت الاسفار *** جذب الفراش وشبّ ضـوّ المنارة
مع دلة(ن) تجذا على واهج النار *** ونجر إلى حرّك تزايد عباره

بندر بن سرور
أنصحك نفسك لاتسقط شرفها *** ترى بعض بيض المجالس أمجيفه

بندر بن سرور
أخاف لي من مجلس مايذري *** في جانبه بوم حساسه صليبه
و سوالفن ما بين بحث و تحرّي *** يجرح فؤادي عيةٍ وأبتلي به
والله خلق بالكون لي ثلث بري *** يكفن ثلثين البحر ويش ليبه

مخلد القثامي
وترى اللاش مثل الليله الكردسيه *** كما ليلة ام قبيس ما ينسرى بها
وترى اللاش مثل الليل والوبل والمطر *** يدم اللهايب لين يطفي لهيبها

مناحي بن خالد الهيضل
ليت المراجل تنوزن بالموازين *** وكلا على قدره يقنن قياسه
حتى يبين اللى له الناس غاوين *** ويفهق عن الطيب رجال النقاصه

مشاري بن ربيعان
قم سو فنجال على خمسة اجناس *** احذر تجي حرقة وبالك نياها
خلك لها عن كل عذروب حساس *** قيس له الطبخه على قد ماها
حتى يجي فنجالها يجلي الاعماس *** عقب الصلف والسهر ما اكبر غلاها

بريك الاسعدي
كثر قذا عين الفتى من ذريفه *** وكثر هذيان الرجل يبدي زهيفه
وكثر حساني الرجل يبلى بسيه *** جزا لبذال الحساني سليفه

ذيخان بن وازع العضياني
اخوي كنه يحد ضلع زمي لي *** كل العلوم الطيبة تلّقى فيه
ليته يجي بالبيع لو كان غالي *** لو كان بياعه بالاثمان مغليه

فيحان الرقاص الحافي
وبيت إلى حلو يشيد بالأسراع *** بيت الشراب القهاوي مواهيل
في مجلس ما فيه خايع وخواع *** من جا مهلا به ومن راح ما سيل


• للمرأة
بندر بن سرور
يابنت عيفي واحدٍ ما يصلي *** تارك عمود الدين مالك وماله
عيفيه لو يفرش لك البيت زلي *** من لا يخاف الله حرامٍ حلاله
خلي ملعن والدينه يولي *** تلقين في نجد المسمى بداله
وعليك باللي للجماعه يهلي *** اللي كما النبوة منارة دلاله

مطيرة البرجس
دارهن سودا مثل صلوا جحيم *** يابو عارف قربهن مابه حلاة
كيدهن كيد وانا كيدي عظيم *** يخلفن بالدين وقران الصلاة

بندر بن سرور
ياعود ريحانٍ رفع غصنه الطول *** رستم قليبه مايهون ضبيحه
يوم استوى عوده على داير الحول *** هجوا به التجار من زين ريحه
ياشيخة الخفرات بالزين ودلول *** من مات من سبتك ربه يبيحه

مخلد القثامي
واوصيك بنت اللاش يعجبك زينها *** تحني كواعبها وتنسع ذويبها
تراها سوات العشب في دمنة العرب *** حتى حمار الحلس ما يرتعي بها

مخلد القثامي
واوصيك راي المره لا تطاوعه *** ترى ضروة النسوان تملك خطيبها
تغويه عن درب الشكالات للردي *** وتضرس تضارس ولبةٍ جوف سيبها

محمد بن فهيد
اطلب عسى الجنه منازل مطيره *** حيث ان بها طبع على البيض ماصار
ما معجبن زينه ولو هي نظيره *** قصدي تنومسي الى جون خطار

بندر بن سرور
يابنت أنا هذي شفاياي يباس *** أطابق الوجبات ما أشفق علاها
ماني وانا بندر بتباع الأنجاس *** اللي قريبٍ تفلها من لحاها
أنا بدرب الصيرمي عدم الاجناس *** زعيم روق اليا تنصت عداها

انتهى...
الوليد الاسعدي
ربيع الاول 1426 هـ
الموافق لأبريل 2005















التوقيع


و أنا عتيبي من سلالة هـوازن *** ربعي عوايدها الفخر من جدودها
ما نوشي الفتنه ولا نحرث الردى *** ولا نهاب اليا تسامت وقودها
ان ميل الميزان من قوم يمنا *** صبرنا لها لوكان كبرت لهودها
وان ميل الميزان منا على العدا *** نروي من السم السقطري كبودها
رد مع اقتباس
غير مقروء 26-Apr-2005, 01:19 PM رقم المشاركة : 2
معلومات العضو
عتيبي نت
عضو نشيط
إحصائية العضو





التوقيت


عتيبي نت غير متواجد حالياً

افتراضي

ونعم بك يالوليد اشهد انك وليدة والحي يحييك والميت يزيدك غبن ماشاء الله عليك يالوليد اعمالك مميزة بارك الله فيك وننتظر منك المزيد

تقبل خالص تحيتي















رد مع اقتباس
غير مقروء 27-Apr-2005, 01:31 AM رقم المشاركة : 3
معلومات العضو
الوليد الاسعدي
مشرف عام
إحصائية العضو






التوقيت


الوليد الاسعدي غير متواجد حالياً

افتراضي

الله ينعم بهالوجه ياعتيبي نت ونشكر تواجدك ومرورك .















رد مع اقتباس
غير مقروء 27-Apr-2005, 03:03 AM رقم المشاركة : 4
معلومات العضو
ولد مدهس
عضو نشيط
إحصائية العضو






التوقيت


ولد مدهس غير متواجد حالياً

افتراضي

الله يعطيك العافية.
ولاهنت يالأسعدي بس عميتنا ياخوي ياليت تغير الخط .















رد مع اقتباس
غير مقروء 27-Apr-2005, 04:26 AM رقم المشاركة : 5
معلومات العضو
إدارة الموقع
الإداره
إحصائية العضو





التوقيت


إدارة الموقع غير متواجد حالياً

افتراضي

موضوع تستحق عليه الشكــر والتقدير .















التوقيع

لأي ملاحظة يمكنك ارسال بريد على العنوان التالي
otaibah@otaibh.net
رد مع اقتباس
غير مقروء 27-Apr-2005, 06:07 AM رقم المشاركة : 6
معلومات العضو
ابو ضيف الله
مشرف عـام

الصورة الرمزية ابو ضيف الله

إحصائية العضو





التوقيت


ابو ضيف الله غير متواجد حالياً

افتراضي

لله درك يالوليـد
مـوضـوع رائـع بكـل معـاني الكـلمة

الله يعطيك العافيه ويكثر من امثالك















التوقيع
قال الشافعي رحمه الله: أركان الرجولة أربع: الديانة والأمانة والصيانة والرزانة.

قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة.


اضغط على الصورة لرؤيتها بالحجم الطبيعي

اللهم أنصر من نصر الدين وأخذل من خذل الدين
رد مع اقتباس
غير مقروء 27-Apr-2005, 08:33 AM رقم المشاركة : 7
معلومات العضو
ابن منيف
عضو نشيط
إحصائية العضو





التوقيت


ابن منيف غير متواجد حالياً

افتراضي

بيض الله وجهك يالوليد

موضوع اكثر من رائع

الله لا يهينك ... ولا تحرمنا من جديدك















رد مع اقتباس
غير مقروء 27-Apr-2005, 08:52 AM رقم المشاركة : 8
معلومات العضو
منآور المورقي
عضو فضي
إحصائية العضو





التوقيت


منآور المورقي غير متواجد حالياً

افتراضي

تسلم يمناك يـ القرم ملايين متعوب علاه الموضوع .. مار لو تزين الخط وتكبرة تسوي خير فـ الشياب <- ابدن مو بمنهم

تحياتي..















رد مع اقتباس
غير مقروء 27-Apr-2005, 09:22 AM رقم المشاركة : 9
معلومات العضو
2009
عضو
إحصائية العضو





التوقيت


2009 غير متواجد حالياً

افتراضي

كل شعر أجمل من الثاني بس بس ياخوي ياليت الخط يكون واضح















رد مع اقتباس
غير مقروء 27-Apr-2005, 10:40 AM رقم المشاركة : 10
معلومات العضو
الوليد الاسعدي
مشرف عام
إحصائية العضو






التوقيت


الوليد الاسعدي غير متواجد حالياً

افتراضي


ولد مدهس : ويعافيك يالله وعلشانك عدلنا الخط وش رايك ؟
إدارة الموقع : هذا شرف لنا العمل مع امثالكم .
ابو ضيف الله : الله يحييك واشكرك على المرور وسامحنا على التقصير معك .
ابن منيف : اشكر لك تواجدك معنا يابن منيف ولا نستغني عن جهودك.
منآور المورقي : اسم على مسمى نشكر لك تواجدك معنا .
2009 : ياهلا بك وابشر تم تغيير الخط ونأمل ان يكون مقبول .

كما آمل ان امكن من القراء الكرام التوجيه ان كان هناك خطأ وللجميع السلام والتقدير .















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »01:17 AM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي