صوت وصدى !!!

[محمد بن رشيد]

قصيده موجهه لي من الشاعر ابراهيم الزراقي

يقول :

ول ياقلب العنا مافاد بك حتى الكوايا = لك سنه حالتك حاله لاتطيب ولاتشاوي.
لك سنه والدم ينزف منك وعروقي ظمايا =ناحلن حالي ويطويني من الغربال طاوي.
كل يوم يموت في جسمي من أسبابك خلايا.=وأنت جرحك مالقينا له علاج ولامداوي.
ظنتي ماأنت متريح لين تاخذك المنايا.=والمنايا علم غيب ودونها الأمر السماوي.
سامح الله من تسبب فالجروح وفالخطايا=واشغل افكاري وخلاني عن الراحه جلاوي.
صاحبن كنت أحسب إن الطيب له وسم وحلايا.=ماتوقعته عن أهل المرجلة جاهل وغاوي .
اقتصدني بالهروج أللي تجي مثل الشظايا=تخلف أللي ما أختلف وتحز في صدرن شقاوي.
يامحمد ويش أسوي مابقى عندي سوايا=ولد عمك ما بقى له لاشفوف ولاهقاوي
حدته دنياه لخباث الطبايع والنوايا=لين ظاقت به دروبه وانقطع حبل الرجاوي.
زاد حزني يامحمد والفرح ماله بقايا=والسراب ألي تبعته مربي وادي سناوي
واعذابي كيف أبا اسلا وأهتني بين البرايا=والعرب كلن يقول الذيب عان الذيب عاوي.
لاسلمت من العذاب ولاسلمت من الحكايا=وإن تعديت الموده تيّش الرمي الشواوي
والله أني من هل الوقفه حميدين السجايا=مير وقتي شين والعربان ماترحم وتاوي
مات نص أهل الوفاء وأهل النقاء وأهل العطايا=باذلين الطيب قبل يصير كمبودي وجاوي.
وأبتلشنا في مروجت النمايم والوشايا=عالمن يصبح عليها الصبح في جوف القهاوي.

ورديت عليه :

للسلامه قلبك اللي فز من بين الحنايا =جعلها شدّه وعنك اتزول يالحرّ النداوي !!
تشتكي لك/ وقت وجروحك من ايامك عرايا =والسبب معروف ياربي تكافينا البلاوي !!
ماشكيت من الهوى والعشق وفراق الصبايا =خابرك عاشق علوم المرجله منته هواوي !!
والهوى قد راح له بشيوخ وافواج وسرايا =والدليل من الشيوخ انشد عن ابخيت العطاوي !
وانت ماتشكيه / ماله طب في كل النحايا =قالها الشاعر (يقول اشدّ من مغص الكلاوي )!!
والزمن يكشف لك اعن الناس واصحابك خبايا =والشدايد تظهر الحسنات فيهم والمساوي !
قلّوا الوافين يابراهيم من كل القرايا = وكثروا اصحاب الهروج العوج واصحاب الدعاوي !
وراحوا اهل الطيب والوقفات واصحاب الحمايا=ولابقى للطيبين من الرجال الا شلاوي !!
وانت تدري بالحقايق ماتعاوز لك وصايا =ياعساك عن الردي ياطيّب السمعه غناوي !
من يقول الشعر عدّ وردّ ويغني الحدايا =ويحتمي الميقاف في وقت اللوازم والنخاوي !!
ماحسب لاهل الكلام الشين شينين المزايا =الخبول اهل النمايم والدسايس والرشاوي !
مانفع فيهم قصيد ولامدوح ولاهدايا =ولايخلون الحكي والهمز دايم والزراوي !
نعرف اصحاب الزوايا ماتروح من الزوايا =عندهم علم الردى والطيب فالعقل امتساوي !!
تبدي الافعال ماتبدي من الشكل المرايا=وانت لن خاويت فالاصحاب تعرف من تخاوي !!
والحياه دروسها ماعاد خلّت لك بقايا =ماقريت اكتاب ابو زيد الهلالي والخلاوي ؟؟!

التوقيع

ياناشد ٍ عن عتيبه تعرف اعتيبه =قبيلة ٍ تظهر المسجون من سجنه ! قوم ٍلها العزّ والامجاد والهيبه =وتشهد لها الناس ( قبل العرض واللجنه )! واللي تشوفه على (الصحرا ) نماريبه =هذاه مترك سليل المجد ابن حجنه ! mrm@mergab.com