أبو وافي لا عدمنا هالراس !!!!

[ولد عوجان الجذع]

الله يحييك
يا أبو وافي

مرحبا من صادق اشعوري تراحيب(ن) تزيدي
من هجوس(ن) ناشرة وسط المعارك مجدها

لو نكرر في العلوم وفي السوالف ثم نعيدي
بعض العرب لها منصب وهي ماهي قدها

[ابو وافي]

هلااااااااااا يا بن عوجان
الله يبقيك
دام لك البقا يا لجذع يا عسى رايك سديدي
من هجوس (ن) يالعتيبي ما يقصر مدها
لو نكرر فالعلوم وفالسوالف ما تفيدي
قالو الكلمه اللي تستحي منها بدها

[داهية عتيبة]

صح السنتكم

ياعيال العم وواصلوا وحنا متابعين

تحياتي

[ولد عوجان الجذع]

فيه ناس(ن) لها رتبة المقدٌم والعقيدي
لكن أوامر بعضهم على حاله يرددها

افهم اعلومنا والمقصد والله ماهو بعيدي
وأنت ضمن القافلة اللي أظنه مجندها

[ولد عوجان الجذع]

يا مرحبا يا داهية اعتيبة
حضورك شرف

[ولد عوجان الجذع]

الغالي أبووافي
اسمحلي على التأخير
رحت وجيت من مشوار مسافته ستين كيلو
وشكرا

[ابو وافي]

هلاااااااااااا بمشرفنا الغالي
داهية عتيبه

[ابو وافي]

مسموح يالغالي

استلم
الاد مفلح ما فيهم لا ضعيف ولا بليدي
الرجال اللي لها عزم الجبال اتهدها
لو يبا ينقص رصيد الناس ما ينقص رصيدي
انكيل للناس بالصاع وتكيل ابمدها

[ولد عوجان الجذع]

ما حكينا في الرجال اللي لها مجد(ن) تليدي
يا العتيبي جنبت عن اعلومكم ردها

ما ذكر لك من رصيد يا الله عسى انه يزيدي
مير خل اعلومنا تمشي وتضرب حدها

[ابو وافي]

من قلدهم بالمراتب رايد(ن) ولاعميدي
ويتومر جيب هذيه وهذي ودها
والحرار احرار ما ظني تبا ترجع عبيدي
مدها من يدها وعزها من جدها