من يوم غنت راعبي الحمامه

[شامان الروقي]

بسم الله الرحمن الرحيم

من يوم غنت راعبي الحمامة=جاوبتها بالصوت لين اني ازريت
غنت طرب ماهوب هم وندامة = غنت طرب وانا من الوجد غنيت
واهنيها لامن لحقها ملامة= تكفخ ولا قالت من الهم ياليت
وانا ليا ضاقت بديت العدامه = وفي راس مزموم المراقيب عديت
لاجيت في راسه رميت العمامة=وفجرت في صخر القوافي دناميت
ماهو طرب لا والله الا سأمة= ماهو طرب يوم الحق البيت بالبيت
ياليت همي من حبيب و غرامه=يمكن ليا ابطت جيته عنه سجيت
لاكن انا رجال اعشق الكرامة=ومن شبتي على المراجل تربيت
واليوم يضحك بي سليل الرخامة= نسل الضعوف الحي منهم على الميت
لاياضعيف النفس مابك شهامة= انعم تحت حكمٍ بضله تتقيت
ولونها شلفى ورمح وجهامة= والله لتمسي يا الردي ما تعشيت
يمديك عشيت الثعل يا الهلامة= وعن درب ذربين اليماني تصاغيت
ما اخذت من دنياك درس وفهامة=بصيرتك عميا ورى ما تقديت
الطيب افرح لاكسبت احترامه= والاش عنه افرح ليا مني اقفيت
ولاضرني هرج الضعيف وكلامه= هرجت قفى جزفت عنها وصديت
قملت قفى والرجل يرفع مقامه= ولاتضرك دام عنها تعاليت
قد قالها اللي جعل ترحم عضامه= وفي جنت الفردوس يبنا له البيت
فيصل ولد منصور قوله علامة= قول الرياحي فادني واستدليت
تمت وقافي يالنشاما ختامه= على الذي عن سنته ما تنحيت
شفيعنا في هول يوم القيامة= صلو وانا من ضمن من قال صليت