قصيدة للشاعر خلف محماس حصيبان العصيمي

[خلف محماس العصيمي]

يا مرحــبا مـن نجـد لا سـاحـل السـيـف= ومـن حــد عـرعــر ليـن تدخـل تهامـة
صالـت وجالـت وأعلـنت بالمناكيـف = وتمركـزت في حفـل طيـر العـدامـة
ياعم يا شلال رحـب على الكيـف = وأطلع سما حتى تباري الغـمامـة
مالك حلى ألا السيـوف المراهيـف = وألا الشـيوخ اللي تفـك الجهامـة
وصفـك كذا يا عم كب التـواصيـف = نادر جبـل يفـرض على احترامـة
مبروك حفـلك يا سمي النواتيـف = سمي ابو متعـب زعـيم الزعامـة
أنته عليك من المحلل تواصيـف=جدك رحـل ثم شلت عـقبة وسامـة
شلت الوسام ولا حصل لك تكاليـف = والمجـد قسمك فيه ذروة سنامـة
وأخذت بنت مطوع عداه بالسيـف= لوجاه يـوم مثل يـوم الرغامـة
سعود في ايام الليال المهاجـيـف= يا سعد منهـو فالشدايـد حزامـة
من لابـة تثـني خـلاف المـشـاعـيـف= لا ضيعـت حيـرانها فالعـسامـة
وركبـوا على قب المهار الشواحيـف=أما ضحي وألا قديـم الظلامـة
ثم أعـتزوا ذباحـت الكـوم للضيـف= بالعـزوة اللي ما قـفاها ملامـة
عـزوة مفاريـجٍ تـدوس الحناتيـف= عـدوهم ما يهـتني في منامـة
هـذا وأنا من لابـةٍ كيفها كيـف=سواقـة العـطـفـة نهار الزحامـة
ترعى بنا شقـح البكار المساهيـف= وتفرح بنا لن قسموها قسامـة
آلاد عاصم عـزوتي فالمواقيـف = عـضو من الهـيلا يزيـد احتدامـة
يمشون بأمر مفرقيـن المواليـف= لا ضيع الحـراب سكة نظامـة
اخوان جوزا عزنا للعدو هيـف= قـاداتـنـا حتى تقـوم القيامـة
وياللي تسولف كـب عنك السواليـف= بعـض السوالـف لا تجيـك بغـرامـة
عـقبان نجـد مطوعـين الملاقيـف=حريبهم بالضيـق تبـرد عـظامـه
أما يطـق الراس ثم راح ما شيـف= ولا رجع مكـتوف يقـرط ابهامـه
هـذا كـلام ما دخـل فـيـه تزييـف= يلعـنك رجـل ما يثمن كلامـه
وأنا ما سب ولا ألحـق الخلـق تضعـيـف=وكلٍ على فعـله يعـصـب العـمامـه

خلف محماس حصيبان العصيمي