ردوا سلامي مساجلة بين الشاعرين حبيب العازمي و تريحيب العازمي - الهيـــــــــــــلا *** منتدى قبيلة عتيبة

سيف شامان · 08-Sep-2010, 10:56 AM

السلام عليكم

هذي مساجلة شعرية بين الشاعرين حبيب العازمي و تريحيب بن سويلم العازمي .. حيث يشتكي له حبيب من ظرف معين وقد خصه بها لـ علمه بـ أنه لن يكشف غموض القصيدة ولن يعرف معناها إلا سويلم .. وواضح أن سويلم طرف في الموضوع ويعرف كل شيء .. طبعاً فيه تلميحات وكلمات بأن المعنى كما يظهر لنا .. لكن ما أدري هل هو كما ظاهر في القصيدة .. أم أن للقصيدة بعد آخر ..

قرأتها قبل 4 سنوات تقريباً ..

والآن نزلت القصيدة في ديوان صوتي للشاعر حبيب العازمي رائع رائع بكل ما تحمله الكلمة من معنى والأجمل أيضاً أنه لا يحتوي على موسيقى .. وحبيت أطرحها لكم مكتوبة ومسموعه .,.

أترككم تبحرون في معنى القصيدة وألفاظها الرائعه .. واللحن الجميل من أبو فيصل ..

هذا البدع من حبيب

ردوا سلامي لابوناصر وقولو لـه=يقرا الرساله من اولها ليـا آخرهـا
رسالة ٍ مع وجيه الخيـر مرسولـه=والمسك والعود الأزرق في مكاسرها
وجّهتها من ضمير ٍ ضايق ٍجولـه=للشاعر اللـي معانيهـا يقـد ّرهـا
شاعر ويفتل وينقض كـل مفتولـه=وارسالتي ماحـد ٍ غيـره يفسرهـا
وان كان ماحلهـا ماهيـب محلولـه=ابكتـم السـر ليـن الله ييسّرهـا
لي قصة ٍ واضحه ماهيب مجهوله=قصة غرام ٍ تعبّر عـن مشاعرهـا
من شانها القلب والافكـار مشغولـه=والنار وسط الحشا شبّت سعايرهـا
كنّي بعزله وكـنّ النـاس معزولـه=واستغرب الناس ماكنـي بخابرهـا
آصول لو كان لا جوله ولا صوله = آحاول أحل دعاويه وادبرها
واصاحبي دونـه البيبـان قفولـه=ما ياصله كود مـن يقـدر يكسرهـا
العام حوله وحول العام جـا حولـه=وانا عنه سجتي بالرجـل قاصرهـا
ودي بـ وصله لكنّ السلم وأوصولـه=يردني والعرب كثـرت مشاورهـا
خلي ورى دولة ٍ من دونهـا دولـه=دوله ودولـه مجهّـزة ٍ عساكرهـا
حتى خطوط الهواتف عنه مفصولـه=نقطة قلم وسط غبّـه مـن يدورهـا
حاولت لين ان جهدي ضاع مفعولـه=غيّر عـرب والطبيعـه ماتغيرهـا
والحبل لو يستوي عرضه على طوله=كل ّ ٍ يطّـول حباله مايقصرهـا
ودروب ماتندهل ودروب مدهولـه=ولا كل من يعبر الاقطـار يعبرهـا
هذه موجز وكثر الهرج وشهـولـه=الله يعلـم بباطنهـا وظاهـرهـا
يعلم علـى كـل ماننويـه ونقولـه=في حكمه النفس ينهاهـا ويامرهـا
واختامها عد وبل ٍ هلّـت ثعولـه=بالمسك والورد والكـادي نعطّرهـا

للحفظ
ردوا سلامي حبيب العازمي

للحفظ
ردوا سلامي حبيب العازمي

سيف شامان · 08-Sep-2010, 10:57 AM

الرد من الشاعر تريحيب بن سويلم العازمي

يامرحبا عـد وبـل ٍهـل هملولـه=من مزنة ٍهلّت الماء من صنابرهـا
والف ٍ هلا بالبريد وحـي مرسولـه=اللي يجيب الرسايل من مصادرهـا
ابيات مثل الجواهر جـات محمولـه=مجلـة المختلـف تحمـل بشايرهـا
رسالة ٍ من عيون الشعـر معقولـه=شكرا ً لمن قالها واشكـر محررهـا
من شاعر ٍ فالمحافل يكسب الجولـه=في كل ميدان مايخشـى مخاطرهـا
دايم سيوفه علـى الشعـار مسلولـه=وعند اللقا ينجلـي عنهـا توترهـا
من عاصفة قوة التصفيق من حولـه=ترجف صفوف الملاعب في تناحرها
والصف والكف والتصفيق من قولـه=يعيش نادر حرار ٍ مـن مواكرهـا
له قصـة ٍ ثابتـه ماهيـب منقولـه=عندي خبر كل ماضيها وحاضرهـا
السر بيـن الكفيـل وبيـن مكفولـه=الحر يفهـم وانـا مانـي بناشرهـا
مابين مر الزمـان وحلـو معسولـه=ماهمها غير وصلك وانت هاجرهـا
عهدي بهـا ياحبيـب شبـه مشلولـه=باقي عليهـا بقايـا مـن جواهرهـا
مذعورة ٍ من زمان ٍ منـه مذهولـه=تنخى حبيب تشبـث بـه باظافرهـا
متحجبه في وقـار ٍ تلبـس سمولـه=وجد ّك حبيب شهد ذورة تبخترهـا
بشهود برقـا وتشهـد روق بفعولـه=اهل الشهامـات ماتهفـي ظمايرهـا
تشهد مطير وقبايل حـرب شهدولـه=انشد وعيره وتشهد لـك وعايرهـا
ازبن هل الحق واخذ الحـق بدلولـه=سوات زبنة رشيد ان كـان تذكرهـا
ماضاع حق ٍ وراه رجال مسؤولـه=من خلقة الناس مسلمهـا وكافرهـا
خل المعاذيـر لا ماهيـب مقبولـه=لو المخاليق تشهـر لـك خناجرهـا
بيوت الاجـواد بالقانـون مدخولـه=وبيوت الانذال ود ّك مـن يدمرهـا

سيف شامان · 08-Sep-2010, 11:00 AM

ياليت أخوانا الشعار يشاركون في إيضاح المعنى إذا كان ليس كما يظهر في القصيدة خصوصاً الغالي وأستاذي أبو فايح

وإن كانها القصة خاصه خلوها مستوره

والسموحه

آخر تعديل سيف شامان يوم 08-Sep-2010 في 11:02 AM.

احمد منير الواصل · 08-Sep-2010, 11:40 AM

السلام عليكم ورحمة الله وبركاته
الله لايهنك اخوي سيف شامان
على النقل الرائع والمساجله الجميله
بين الشاعريين الكبار ابوفيصل وابو سويلم تراحيب
وعلى ايضاحك لنا قصيده حبيب وردها من سويلم
ونتمنى من اخواننا المشاركه واضهار لنا معنى الابيات في القصيده
الاولى والثانيه .
ويعلم الله من قوى القصايد الثنتين تحمست لفهم معنها ومقصودها
وشكرآ للجميع ولك اخوي سيف شامان

ردوا سلامي حبيب العازمي.wav
://www .

آخر تعديل احمد منير الواصل يوم 08-Sep-2010 في 11:49 AM.

خـال ـد · 09-Sep-2010, 03:04 AM

شكرا الف على تزويدنا بالصوت والصدى لها الشعار الكبار

حبيب العازمي شاعر مايحتاج تعريف

وبن سويلم شاعر ضلمه الاعلام والا هو شاعر من الفئه الاولى

كل ال سويلم شعار كبار

سيف شامان · 17-Oct-2010, 07:33 PM

اقتباس:

المشاركة الأصلية كتبت بواسطة خـال ـد

شكرا الف على تزويدنا بالصوت والصدى لها الشعار الكبار

حبيب العازمي شاعر مايحتاج تعريف

وبن سويلم شاعر ضلمه الاعلام والا هو شاعر من الفئه الاولى

كل ال سويلم شعار كبار

العفو يا خالد ولا هنت على المرور

وأتمنى أن نرى شعر ابن سويلم منتشر