عبــر الزمن تاريخها فوق سامي

[أبونايف الروقي]

في ليله من أجمل الليالي وعند قبيلة من خيرة القبائل في الجزيرة العربية - (في ضيافة قبيلة حرب المشهورة)
- في حفل زواج أبن الأخ/ الشاعر سعد بن هذيل الفريدي الحربي وفي قصر درة المملكة بالرياض وبدعوة كريمه من صاحب الحفل شاركت بهذه القصيدة وذلك مساء
يوم الثلاثاء الموافق 1/8/1431هـ

إجابة الدعوة تجب بعض الاحيان= خص(ن) ليا جت من رجال(ن) إحشامي
لياجات من شجعان من نسل شجعان =مثل العزيز الصيرمي القطامي
ابو فهد طير السعد طير حوران = رجل(ن) صميدع من اكبار الأسامي
ثلاثة حروف(ن) تبادر للأذهان = عبر الزمن تاريخها فوق سامي
قوم(ن) تخلد فعلهم عبر الأزمان = يبقى إلى يوم البعث والمقامي
حرب أهل الوقفه ومن دون حقران = لاهل الجزيرة كلهم بالتمامي
وماغرد القمري على خضر الأغصان =سلام من شرف ورد السلامي
على الرجال اللي لهم بالفخر شان=ولهم من أعلى المجد رأس السنامي
عدوهم يخذل ويدحر وينهان =واتلا العهد به فوقه الطير حامي
وصديقهم ماقل شانه ولاهان=كنه لحدهم واحد من العمامي
حطوا لهم في صفحة المجد عنوان=غراس زرع(ن) ماتلاه الصرامي
ويوم الأعنه والأسنة والأرسان=كم صبحوا قوم وخذوا من جهامي
ولاهم بفي حاجة شهادات صدقان =لكن قول الصدق ينطق اشمامي
وانا على مدح المطاليق شفقان = ولمدحهم جيعان بالحيل ظامي
هذا وانا من عزوة شانها شان =تارد احياض الموت ورد الضوامي
ليا قيل منهم قلت بالاسم عتبان =ماينجهل تاريخنا يالكرامي
عتبان لاثار الدخن واللغا شان=وكثرت غطارف ناقشات الوشامي
كم شيخ قومن طش للذيب سرحان =وراحت جموعه عن نحانا انقسامي
حماية الساقه وحامين الأضعان= ودون الخوي والجار دايم انحامي
وللضيف والعاني كما الغيث هتان= ودخيلنا بوجيهنا مايضامي
ومادامنا ياحرب احبه وجيران= وكلمة شبابه جامعتنا الزامي
له عندنا قيمه وشيمه وميزان= حق الجوار اللي عليه الكلامي
انقدر الطيب كرامه وعرفان = هاذي عوايدنا ولابه ملامي
واليوم في دولة هل السيف شامان = ودستورها سنة شفيع الأنامي
للشرع تباعه وللعدل عنوان =ومن خالف السنه قليل الرحامي
ننعم بمن وبخير في كل الأوطان=ونرى التطور عام من بعد عامي
وكل القبايل صاروا انساب واخوان=وولا زمان الحنشلي والحرامي
في ظل عبدالله ونايف وسلطان=حكامنا وابنا المليك الإمامي
وتمت بيوت(ن) مبتداها على أن=واختامها بتحيتي واحترامي

آخر تعديل أبونايف الروقي يوم 14-Jul-2010 في 11:27 AM.