صوت/ عبدالله بن طلال
بعد العشاء يوم الأحد ليل الأثنيـن=قابلت مـن بهـذل حياتـي كذيـاّ
يا لايمين القلب شيء(ن) على الدين=فوق الخيال إتطـول فيـه الحكيـا
الزين يوصف لكن ازين من الزيـن=ما شفت احد زيّـه ولا لـه حليّـا
قلت السـلام ورد برماشـة العيـن=ياويل عينـي مـن عيونـه عليّـا
حين التقينا مـع طريـق الثلاثيـن=لين افترقنـا مـع طريـق العليـا
طلبت منه العطف واللطف والّليـن=واعطيه لو يطلـب حياتـي وعيّـا
واقفى وانا ماحـب طـرد المقفيـن=ولا كنت أحسب لنكبة(ن) هالسويّـا
ماراح فكري غير لحسـاب ثنتيـن=جرح الكلام .. وفرحة اهل الزريـا
بس اشهد انه صاب قلبي بسهميـن=لاميـت(ن) منهـن ولانيـب حيّـا
خلّي جرحني مادرى من هكا الحين=ساعة مشى مـاراح قصـده جفيّـا
المشيه اللي عقبها خاطـري شيـن=والقصة اللي ذقـت منهـا القصيـا
وجدي عليها وجد مالـه براهيـن=ولا له جدى حتى المنـاوي تهيـا
ياليت من يدري بعنوانهـا ويـن ؟=وألاّ.. اسمها ؟ وألاّ..عربها من أيّا
اليوم .. ولاّ من عرف شيء بعدين=واللي يمرّ اهناك .. واللـي هنيّـا
وما دامكم صرتوا عن الوضع دارين=لاتنصحـون القلـب يـزداد غيّـا
ابا اتمسك بالأمـل والرجـاء ليـن=يطـوا علـيّ بداخـل القبـر طيـاّ
صدى/ ناصر الهواوي العتيبي
يقول من هاضه قصيد المغنين=وإنقاد له بدع البيوت وتهيا
والتج فكره وين مبداه ومنين=وبغى يرده عن مرامه وعيا
وجهز له اجموسٍ جديدة وجيبين=لبو طلال افزوع مابه كنيا
لوسط البلد واللي حواليه جمسين=وجيبين لدروب الوعر والعثيا
ركابهن شروى العيال المسمين=كلٍ يزوم من السطر والحميا
فرقة جنوب إلشرقي الخرج ويمين=وفرقة إلغربي وجنوب العليا
وداجوا على نزلٍ بذيك الضلاعين=وسطي طويق وحول ذيك النحيا
وعادوا ولا جابوا خبر داعج العين=دورة بلا خيطٍ يدلك عميا
لو هو من اللوحة خذا بس رقمين=والا تبعهم لو تطول السريا
حتى يسنع وجهة ديارهم وين=ويبين له منزالهم باي حيا
ماكان رثعنا سواة المجانين=ولا كان كسرنا المواتر كذيا
صدى/ زيد بن راجح البقمي
سمعت لي مع غيبة الشمس صوتين=ورحب خفوقي للمنادي وحياّ
عزالله إني صرت مابين نارين=وردت عدٍ مال جمة بقياّ
مدري وش اللي حطني بين الاثنين=خطاي في التقدير والاّ الرهياّ
ابوطلال يقول ذاق الأمرين=ولاهوب للجرح الحقيقي مهياّ
وانا يضايقني ونين المصابين=ولافي يدي حتى أدرك الأمر شياّ
وابوعبيد أرسل فقط للتجاهين=وخلا اتجاهين الحراوي بلياّ
رسلٍ يردون الخبر لحمر العين=وعن ذاهبتم يكشفون الغبياّ
وان كان ماجابوا دليل وعناوين=يلقى الخبر عند العجوز العمياّ
عساة يلقى من خطف خافقه لين= حتى ايتذرى في الحشا ويتفياّ
ويمدله يمناه باللطف واللين=ويقول يا خطّافة القلب هياّ
للبيت على سنة الرسل ماشين=واللي بعد هذا مدور قضياّ
وان كان جاء مني خطا يالميامين=وانا احسب اني عنه بعد الثرياّ
انا تراني في وجيه الرباعين=وفي وجه اهل عمهوج وبن محياّ
اللي مطارد خيلهم للمعادين=يشبع بها الذيب العرج والحدياّ
لاعاد يشغلني كبير السياحين=اما جهم لي فجر والاّ مسياّ
11-Jan-2010, 06:09 PM
صوت وصدى ..
العرض العادي
