الدبااااء ..!!

[وصل العطياني؟؟؟]

السلام علاكم

ياناس حصّلت آدمي وزنه مية كيلو جرام=لا والله أكثر من مية سبحان ربٍ صوّره
لو الرصاصة تضربه , تبرد ما وصلت للعظام=وأستغفر الله يمكن المفرود يبرك فـ نحره
مقبل على خمسين عام تقول ابو عشرين عام=ما شال همّ من الهموم إلاّ يزيّن مظهره
بسّام مكوية ونظارة وشخصية تمام=وثوبٍ جديد وبشرةٍ تلمع ودقن مخنجرة
ويمشي وعينه فوق لو ياطا على روس الهوام=وان شاف واحد مرّ مع جنبه يخزّه بنضره
لو إن عقله مثل جسمه كان قلنا يا سلام=لكنّ هذا اللي قاهرني يالله إنك تقهره
الفرق واضح بين عقل وجسم مدهون الرسام=الجسم حيّك من جسم مار العقل عقل بقرة
تقول شام يقول شرق , تقول شرق يقول شام=يظهر حفيلك لين ودّك بالمخمّس تسطره
من لا عرف معنى الزّيام يعرّ فه معنى الزّيام=ويعرّفه وشلون دبل الكبد ويجيب خبره
والمشكلة ماهو موطّيها قريّب هالخمام=يشوف نفسه كنـّه أبو زيد وإلاّ عنترة
ياخبل لو ان الرجولة بالحلا والابتسام=والمظهر الحلو المرتّب كان أحقّ إبها المرة
مار الرجولة منزلة علياء وصعبة فــ المرام=والمظهر آخِر شيّ فيها يا لعين الجنثرة
خذها نصيحة عن تواصيف الرياجيل الحشام=اللي واحدهم تكتشف رجولته لو فـ نظره
مومن مكمّل واجباته من صلاة ومن صيام=خيّر ليا شفته يعرِّفك الوجيه الخيّرة
يركع ويسجد في ظلام الليل والعالم نيام=ويتوب لله كل يوم ويرجي ويستغفره
كريم فيه من الكرم مايفحِم الناس الكرام=لو الزمن جاير على حاله ولاعن كوثره
هادي بساعات الهدو ومزاعمي وقت الزعام=حليم في وقت الغضب ما كلّ علم يثوره
يصبر ولا ينباح سده للشوام وللعوام=قد يشتكي صم الصفا من صبره اللي يصبره
شجاع ودّك تعتزي به كلما اشتد الزحام=يقدم على الموت الحمر لله درّه ما اظفره
وليا دعيته في لزوم يغلّق اللازم قوام=مايلتفت للي على يمناه واللي فـ ايسره
للجار والأقراب والأصحاب حيّك من حزام=ياسعد من هو صاحبه يا سعد من هو جاوره
نفسه عزيزة عن دروب العيب ودروب الملام=عنده شجاعة في دواخيله وقوّة سيطرة
فيه المروة والتواضع والادب والإحترام=والعِرف والرأي الدسِم والعفو عن المقدرة
هذي وصوف اللي ليا قالوا رجل ماهو حرام=إن مرّ ذكره قول له والنعم لا تستخسره
والرجل يبقى رجل مهما كان والا ّ الفام فام=ودّك تجيب اكبر حصاة تحطّها فوق ظهره
وإلاّ تمكّن ضربته تحت الصدر فوق الحزام=أو ودّه أبو مصعب الزرقاوي وقول إنحره
والعقل ميزان الرّجال اللي يضمّون الكلام=واحدهم ان ماهو شرح لك خاطرك ما كدّره
واللي يدقق فـ البشر يتعب ويبلش فـ الطّـغام=لكنّ انا استنتجت نظرة شاملة ومدكترة
قسمتهم تقسيم والتقسيم غير الإنقسام=كلٍ يعرف الفرق ماهو لازم إنّا نذكره
قسمتهم حسب التّوجه فـ الحياة بشكل عام=كلٍ مروّح في سبيله والدروب ميسّرة
البعض منهم همّه الدنيا يجمّع فـ الحطام=لو عنده ميات الألوف يدوّر القرش إدورة
حتى على نفسه يقصر فالشراب وفالطعام=وليا نصحته قال اقول الآخرة مستاخرة
والبعض منهم ملتزم لكن شديد الإلتزام=زاهد من الدنيا , نسى حتّى عوَيدٍ ذاخره
دخل متاهات الغلو وأثر الغلو مثل الهيام=راعيه مجنونٍ ما يترك مسلمٍ ما كفّره
واللي على هالحال شخصياتهم فيها انفصام=أما مجنّن صدق وإلاّ ما بقي غير شعره
والبعض منهم معتدل يمشي على احسن ما يرام=مهتمّ من دنياه وآخرته وربك ساتره
يوازن الثنتين والتوفيق من رب الانام=والآدمي ماهو بصير إن كان مالله بصّره
والبعض منهم ما عطا هذي ولا ذيك إهتمام= عايش حياته كلبوها مسخرة في مسخرة
تلقاه مثل السلعة اللي لا تباع ولا تسام=محروم لا هو من هل الدنيا ولا أهل الآخرة
وختامها مني تحية تعتبر مسك الختام=تحيةٍ بالكادي وبالياسمين معطّرة
والمعذرة كان القصيدة ماهي بقدّ المقام=إن كان ما تصلح قصيدة حولوها خاطرة
انا اجتهدت ومن بذل جهده حقيقة ما يلام=وما تنقص الرّجال كلمة معذرة ما معذرة

التوقيع

na111na@hotmail.com

[بعيـد المرامع]

المعذره .... ماعندي رد ..يليق بهالمقام .......العالي

ماعندي غااار ..صح لسانك وداام ابداعك ...

بعيد المرامع

التوقيع

تنويه ..وتنبيه ..مرامعي.. لوحظ في بعض المنتديات و من بعض الاخوه هداهم الله ..سرقة بعض مواضيعي في منتدى الهيلا..ونشرها في منتدياتهم ..بمعرف "بعيد المرامع" ..لإيهام القارئ والمتصفح ..بأنه صاحب الموضوع..والكاتب بعيد المرامع لذا أود التنويه .. بأني ..انا يا بعيد المرامع..ليس لدي اي معرف اخر..خارج موقع منتديات عتيبه الهيلا إطلاقاً.. B3EED_MRAM3@HOTMAIL.COM

[بن بادي]

يا ابو مشهور

ما ازود على بعيد المرامع

صح لسانك ..

وفي إنتظار جديدك

تحياااتي

[الــوآفــي]

أو ودّه أبو مصعب الزرقـاوي وقـول إنحـره


عزالله جبتهاااا

صح ابدااااااااااااعك

وسلمت اناملك

[((الدلبحي))]

وصل
قصيده جزله من جزل
تسلم يمناك وصح السانك مليون
تحياتي

[وصل العطياني؟؟؟]

بعيد المرامع

منور إسمك في المتصفح


لا هنت يالغالي ولا هان غاليك...



تحياااااااااتي

[كريم سبلا]

صح السانك ابو مشهور

و.%%%%%%%%%%%%% ع%%%%%%%%%%
وسلموووووووووووو

[فرهودي]

حلوة..

يعطيك العافية يابومشهور... والله يكافينا شرك

[وصل العطياني؟؟؟]

بن بادي ...

صح بدنك ...

وأشكرك على مرورك ...



تحيااااااااااتي

[مرزوق حمدان العتيبي]

ياخبـل لـو ان الرجولـة بالحـلا والابتسـام
والمظهر الحلو المرتّب كان أحقّ إبهـا المـرة
مار الرجولة منزلة علياء وصعبة فـالمـرام
والمظهر آخِر شيّ فيهـا يـا لعيـن الجنثـرة

...
شاعر بكل المقاييس
وعزالله انّك مفوّه ياوصل... ولانت بصاحي
قمّة الابداع ممزوجه بشي من الجنون الشعري ..
دمت ودام توهجك ..

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD