ياوجودي وجد من نفسه جزوعه

[((الدلبحي))]

ياوجودي وجد من نفسه جزوعه
باقيٍ فيها علومٍ مانستها
لابغى عن سجته ينسى دموعه
مرته ذيك العلوم وحولتها
اشعلت نارٍ حطبها من ضلوعه
تاكل اللي فوقها واللي تحتها
كل مااذكر من خذت قلبي قطوعه
واقتفاها النوم وعيوني قفتها
جوخةٍ من متن ابوزيد مخلوعه
لودرت عنها السلاطين اسرقتها
ظامرٍ سرجوفها كنه بجوعه
ماتفرق بينه وبين ارقبتها
كنها ظبيٍ قبل ظله يروعه
باقيٍ فيه اللتفاته مالتفتها
اسم ابوها اللي يحطه تحت كوعه
واسمها اللي تدرسه في مدرستها
ماتعلى فالخيال ولافروعه
غيرها ولاتبؤا منزلتها
كن عمري من سبوعه لاسبوعه
تنظمه نظم الخرز في سلسلتها
تجمعه لاشعشع سهيل بطلوعه
وتنثره لاحتت الارض ورقتها
همها اشرب دلته واكل قدوعه
من ظوتني ليلة السبت وسرتها
روحت وفوادي الفرقا تلوعه
ماحسدت الا الوسيعه في سعتها
القناعه كنز لنفس القنوعه
مابقى الا روحي وروحي خذتها
ليتها مرواح من يرجى رجوعه
كان ماغمضت عيني من جهتها
والضياع اللي طبوعي من طبوعه
ابركات الله عليه وابركتها
ضاع عمري من سبوعه لاسبوعه
مابقى الا ليلة السبت وسرتها
الشاعر مدغم ابوشيبه السبيعي

[الطير]

الاخ الدلبحي

بيض الله وجهك على القصيده

اشهد انها قصيده جميله

[((الدلبحي))]

الطير
وجهك ابيض
تسلم على المرور الكريم

[مطلق الحويقل]

الدلبحي
صح السانك والسان السبيعي

[((الدلبحي))]

مطلق
صح بدنك
تسلم على المرور