ابن شايق وخليف .. ونزول خليف في المحاوره

[فهد الزهراني]

المشاركة الأصلية كتبت بواسطة مصر

يقول المتنبي :

ومن يك ذا فم مر مريض

يجد مرّا به الماء الزلالا

يعني من كان في فمه مرض فسوف يجد الماء مر لو أراد أن يشرب وهكذا من لا يعرف تذوق الشعر لأغراض خاصة وأحكام مسبقة وخذوا هذه المحاورة من آلاف المحاورات الرائعة لابن شايق



بن شايق
مراحب وارحبو يا مرحبا ترحيب شوق حار = أحط ايدي على العله وآداويها وآعالجها
انا والله ما آبسط لين آثور عجة الشعار = وآشوف الملعبة يختظ داخلها وخارجها
الرياحي
يدوم لك البقاء دام البقا عند اللقاء ما بار= لنا منهج ونعرف عادة الناس ومناهجها
ليا حصلت لك بستان حول وأقطف الازهار = ترى العربان تقدر تحرجك قدام تحرجها
بن شايق
صدق من قال يا زين العلوم ان سلمت التكرار = وكذب من قال ترديد السوالف مايسمجها
أنا عندي سفينة طايرة ربانها طيار = بحرها للجنايز والمقابر في مدرجها
الرياحي
أنا خابرك تاجر تعرف الاسواق والتجار = لكن أذاعتك منذو سنه خربت برامجها
تحولت السفينه طايرة يا لله يا ستار = سفينة طايرة صوب السماء وانت امتولجها
بن شايق
انا بالشعر متنبي شهاده من طوال اعمار = وانا ما آهرج الكرعان بل الروس آهرجها
يقولون الرخوم تشك لكن الحرار احرار = آسمع ناس واسمعها ما تزعجني ولا أزعجها
الرياحي
وانا للشعر مثل الجامعة يا الطالب المكار = أدرسك أنت مع طلابها واحضر تخرجها
ابن شايق خطب ليلى وأظنه حلم ليل وطار = خطبها له ثلاث سنين وازرى ما تزوجها
بن شايق
يا زين العفو والغفران يا معبود يا غفار = عرب متشنجه واليا متى يكبر تشنجها
بغيت أنسى هوى ليلى وآطلق حبها السحار = لكن ليلى حلالة قوم ساحرني تغنجها
الرياحي
أنا بآخيرك يا خوي في المعذار والمقدار = ترى ظيفك ما حقه بالعلوم اللي تمروجها
زمانٍ فات تغنج لك وتهرج لك بعض لسرار=وهالحينه ما تقبل لو على ظهرك تحججها
بن شايق
مسا الخير وصباح الخير ودك خير ولا خار = كلامي جرهدي ماهو بـ اشاعاتٍ تروجها
لنا وجه ولنا جاه ولنا مثل القبايل كار = وبعض الناس لا كار ٍ ولاجاهٍ ولا وجها
الرياحي
علومك لا تطولها يا بن شايق وهي قصار = ترى الافعال والاقوال تحسب من نتايجها

محاورة جميلة وانا شخصيا معجب ببن شايق ولكن الكلام الرخيص والله اني ارفضه من أي شاعر كبير ولا صغير.

بخصوص هذه المحاورة وانت ابخص مني ...المفروض ان الشخص البداع يكون معه المعنى ويعطيه الشاعر المقابل شوي شوي لين ينتهي القاف وبعدها يطلبون التغيير.
المهم انه هو المتحكم في المحاورة .
هنا وجدت الرياحي اصبح هو المتحكم وبن شايق صار يرد على ابيات الرياحي هذي نقطة.

النقطة الثاني: هل ترى لزوم لهذا البيت (وانا ما آهرج الكرعان بل الروس آهرجها) ومع وضوح القصد من الكرعان كترميز للردئ من الناس لكن هل يعقل ان يخاطب كراع؟؟؟؟

النقطة الثالثة: مسا الخير وصباح الخير ودك خير ولا خار(ماهو الفائده من هذا الشطر الى ترى انه حشو كلام وتصفيف كلمات لاتعني شيئا)

انتظرك يالقرم