يا معجب وا عجب وشلون ترضى ,,, الله يحييك يا معجب العتيبي !!

[معجب العتيبي]

الراي السديد

يا معجب وا عجب وشلون ترضى وانته الماسول=ترا دولتك صارت كلها شلّات و احزابي
من اوّل كانت الدوله تميّز بالذهب و اللول=لكن اليوم صارت و انت خابر سحت و ترابي

معجب العتيبي

تعال اقرب وسمّعني وقلي ويش كنت تقول=ترا بث الاشاعه يعتبر تشويش وارهابي
للا عقل البنادم ماعرفنا المنطق المعقول=ياكثر اللي يجمع من علوم الناس ويبابي

الراي السديد

تفكّر طال عمرك في سياسة خبز زايد فول=ترا الصادق نهار الحق يسكت كل كذابي
حسافه كان ما ميّزت هرجي و انته المامول=لكن احذر ترا اللعّاب قسمه راس مشعابي

معجب العتيبي

تغني وانت جايع لين قفل مخك المشلول=ترا الكذاب مثل ابليس هابي والردي هابي
ليامنك نويت الامر بالمعروف عرض وطول=لابد تقدم حلول القضيه بعد الاسبابي

الراي السديد

الا و ا شيب عيني فالكلام اللي بلا مدلول= عطيت العلم صالونٍ رجع لي العلم دبابي
طريق الحق واضح ويش اسوي بالعيون الحول=ليا منّك نطقت الحق قالو الناس نصابي

معجب العتيبي

تقوله وانت بالنسبه لنا ياصاحبي مجهول=مدام الوجه مابين ولابيّنت الانسابي
ليا اهتزت شباك القول قلنا ياجماعه قول=ماحد ينكر ولايجحد ورجل الخط ماغابي

الراي السديد

ترا ما فيه داعي نفتح الباب الذي مقفول=مصير الوقت يا معجب يبيّن سر الالقابي
تقولونه و لكن ما يفيد القول دون فعول=عسى الشيشان ما تنسى فعول الشيخ خطّابي

معجب العتيبي

اجل خله على قفله وعندي للسؤال حلول=وخل الاسم واسراره تولع كل مشهابي
ليامن المزارع جوّد المهنه يجي محصول=لكن ليا جهل في مهنته ياكثر الاتعابي

الراي السديد

ترا الراي السديد يميّز الصاحي من المهبول=يموت العود و يقوم الولد للحق طلابي
كلامك صح غير المشكله صار الزَرَع ماكول=و لا يدري عن الموضوع غير اصحاب الالبابي

معجب العتيبي

عساه يطول عمر اللي يقدم جهده المبذول=ويبقى الشعب والحكام والضيفان الاحبابي
انا ماقول غير الصح.. وانت لسانك المعسول=يبا يرفع مكانك عند عدوانك والاصحابي

التوقيع